La regenza ha chapientscha per il giavisch ch'è vegnì exprimì cun l'intervenziun da duvrar en ils documents da consultaziun davart projects da lescha ina preschentaziun sinoptica dals texts da lescha, en ina furma pli survesaivla, per obtegnair uschia meglras premissas da pudair elavurar la fatschenta en ina moda pli raziunala. Ad ella pari dentant pli cunvegnent, sche las preschentaziuns sinopticas na vegnan betg recepidas directamain en las missivas, mabain sch'ellas vegnan preparadas e consegnadas supplementarmain e separadamain. En favur d'ina tala schliaziun pledan plirs motivs. Oz vegnan fatgs ils sbozs da revisiun en l'uschenumnà format GR.dot ed èn publitgads en las missivas. Suenter la discussiun en il cussegl grond pon els vegnir surpigliads senza stuair midar il format en il protocol dal cussegl grond ed en il cudesch da dretg dal Grischun. Questa procedura da producziun raziunala ch'è sa cumprovada duess vegnir mantegnida en mintga cas. La preparaziun separada avess plinavant er l'avantatg che la preschentaziun sinoptica pudess suenter la predeliberaziun dal project tras la cumissiun cumpetenta vegnir cumplettada simplamain cun sias propostas ed alura vegnir consegnada a las deputadas ed als deputads per la tractativa en il cussegl grond. Sche la preschentaziun vegniss percunter integrada en la missiva, stuess suenter la predeliberaziun tras la cumissiun vegnir fatg mintgamai supplementarmain anc in tal document per ch'i stettia a disposiziun a las deputadas ed als deputads ina preschentaziun che cumpiglia il dretg vertent, il sboz da la missiva e las propostas da la cumissiun. Sche las preschentaziuns sinopticas vegnissan integradas en las missivas, s'augmentass lur volumen e lur producziun daventass pli chara. Cun consegnar sistematicamain la preschentaziun sinoptica en ina furma fotocopiada a las commembras ed als commembers da las cumissiuns respectivamain a las deputadas ed als deputads pon percunter vegnir spargnads custs. Pervia dal format pli grond (A4 empè da A5) sa meglierescha la finala er la legibladad cun questa soluziun.

La regenza propona perquai la suandanta soluziun:

Il departament ch'è cumpetent per il project da revisiun fa mintgamai ina preschentaziun sinoptica en il format orizontal A4 cun trais colonnas: "Dretg vertent" (1. colonna), "sboz tenor la missiva" (2. colonna) e (anc vid) "propostas da la cumissiun predeliberanta" (3. colonna). Suenter che la missiva è vegnida deliberada da la regenza vegn la preschentaziun tramessa al secretariat dal cussegl grond che la spedescha vinavant a las commembras ed als commembers da la cumissiun per la predeliberaziun. Suenter la sesida da la cumissiun vegn cumplettada la terza colonna da la preschentaziun tras il secretariat dal cussegl grond e la preschentaziun vegn alura tramessa a tut las deputadas e a tut ils deputads per tractar la fatschenta en il cussegl grond. La preparaziun d'ina tala preschentaziun sinoptica supplementara sto dentant sa restrenscher da princip sin revisiuns parzialas. Per regla na fa ina preschentaziun sinoptica betg senn per revisiuns totalas. La sistematica dals relaschs ed il cuntegn dals artitgels sa midan normalmain uschè ferm ch'ina cumparegliaziun directa cun il dretg vertent na sa lascha strusch etablir. Per tut ils cas duain las missivas dentant cuntegnair en il futur vinavant ils sbozs da revisiun ed il dretg vertent respectiv, e quai en il format GR.dot.

La preparaziun da preschentaziuns sinopticas chaschuna ina lavur supplementara considerabla per l'administraziun. Cun la soluziun ch'è vegnida proponida duai questa lavur dentant restar en in rom che po vegnir responsà. Suenter las explicaziuns è la regenza pronta d'acceptar l'incumbensa en il senn da questas ponderaziuns.

Datum: 7 da settember 2007