Navigation

Inhaltsbereich

Dumonda Clavadetscher concernent la realisaziun da la lescha federala davart il provediment d'electricitad en il chantun Grischun

Sessiun: 13.06.2007
Ils 23 da mars 2007 ha l'assamblea federala da la confederaziun svizra deliberà la lescha federala davart il provediment d'electricitad (LPrEl). Questa lescha ha l'intent da stgaffir las premissas per in provediment d'electricitad segir sco er per in martgà d'electricitad che s'orientescha a la concurrenza.

En connex cun la garanzia dal provediment da basa ston ils chantuns tenor l'art. 5 al. 1 fin 4 LPrEl designar ils territoris da provediment da las gestiunarias da las raits ch'èn activas sin lur territori. In territori da provediment sto vegnir attribuì senza discriminaziuns; l'attribuziun po vegnir colliada cun ina incarica da prestaziun per las gestiunarias da las raits.

Tenor. l'art. 14 al. 4 han ils chantuns da prender mesiras adattadas per reducir differenzas sproporziunadas tranter las tariffas per utilisar las raits sin lur territori.

Tras il relasch da la lescha federala davart il provediment d'electricitad vegn adattada er la lescha d'energia dals 26 da zercladur 1998. En l'art. 9 al. 2 vegnan ils chantuns incumbensads da relaschar prescripziuns per utilisar l'energia en moda spargnusa e raziunala en edifizis novs ed existents sco er da sustegnair la realisaziun da standards d'utilisaziun correspundents.

Sco gestiunarias da las raits en il chantun Grischun èn activas bleras ovras communalas pli pitschnas e pliras interpresas d'electricitad grondas. Confurm a la LPrEl ston las gestiunarias da las raits ademplir en l'avegnir differentas novas obligaziuns. Las gestiunarias da las raits vegnan obligadas da colliar cun la rait d'electricitad sin lur territori da provediment tut las consumentas finalas e tut ils consuments finals entaifer la zona da construcziun, tut las immobiglias e tut ils abitadis ordaifer la zona da construcziun ch'èn abitads l'entir onn sco er tut las producentas d'electricitad. Il chantun po obligar las gestiunarias da las raits ch'èn activas sin ses territori da colliar cun la rait er las consumentas finalas ed ils consuments finals che sa chattan ordaifer lur territori da provediment. El po er relaschar disposiziuns davart colliaziuns ordaifer la zona da construcziun sco er davart las cundiziuns e davart ils custs da questas colliaziuns.

La realisaziun da la LPrEl po avair consequenzas considerablas per las gestiunarias da las raits en il chantun. Perquai dumandain nus la regenza il suandant:

1. Tge consequenzas ha la LPrEl tenor l'avis da la regenza per las gestiunarias da las raits, per las consumentas finalas e per ils consuments finals sco er per las producentas d'electricitad en il chantun Grischun?

2. Tge activitads e tge mesiras èn previsas en connex cun la realisaziun da la LPrEl en il chantun Grischun?

3. Tenor tge princips vegnan ils territoris da provediment attribuids a las gestiunarias da las raits?

4. Èsi previs d'integrar las vischnancas pertutgadas sco er la branscha d'electricitad resp. las interpresas da provediment per attribuir ils territoris da provediment?

5. Èsi necessari da far ulteriuras adattaziuns en la lescha chantunala d'energia en connex cun las prescripziuns per utilisar l'energia en moda spargnusa e raziunala?

Cuira, ils 13 da zercladur 2007

Name: Clavadetscher, Feltscher, Möhr, Bachmann, Barandun, Berni, Bezzola (Zernez), Bleiker, Blumenthal, Brüesch, Buchli, Bundi, Casparis-Nigg, Castelberg-Fleischhauer, Casutt, Conrad, Dudli, Geisseler, Hanimann, Hartmann (Cuira), Hartmann (Champfèr), Hasler, Heinz, Jäger, Jenny, Keller, Kessler, Kleis-Kümin, Koch, Kunz (Cuira), Marti, Meyer-Grass (Claustra), Nick, Noi-Togni, Parolini, Perl, Peyer, Pfäffli, Pfenninger, Quinter, Ragettli, Rathgeb, Rizzi, Stiffler, Stoffel, Thomann, Thöny, Thurner-Steier, Trepp, Troncana-Sauer, Vetsch, Wettstein, Zanetti, Hauser, Just, Kunz (Fläsch), Jecklin-Jegen, Joos, Pedrini (Soazza)

Session: 13.06.2007
Vorstoss: rg Anfrage


Resposta da la regenza

La lescha federala davart il provediment d'electricitad (LPrEl) dals 23 da mars 2007 ha ina istorgia pli lunga. Ella è resortida dal sboz per ina lescha davart il martgà d'electricitad (LME) che aveva fatg naufragi l'atun 2002. Gia en vista a quest emprim sboz èn vegnidas fatgas vastas lavurs preparatoricas en il chantun Grischun. La regenza ha preschentà al cussegl grond in rapport davart las consequenzas da la liberalisaziun dal martgà d'electricitad per il chantun Grischun (cf. missiva da la regenza al cussegl grond, carnet nr. 8/1999-2000, p. 843 ss.). Plinavant è vegnida installada l'onn 2001 ina cumissiun d'expertas e d'experts per preparar ina legislaziun executiva tar la LME. Questa cumissiun sa cumponiva da represchentantas e da represchentants da l'administraziun chantunala e da l'economia d'electricitad. Ensemen cun la associaziun da las interpresas electricas grischunas (AEG) èn vegnidas organisadas a medem temp occurrenzas da scolaziun cun la finamira da sensibilisar la branscha d'electricitad per las incumbensas vegnintas. La finala ha il chantun inizià in program per gidar las ovras electricas ad eruir ils custs da lur rait. Uschia dastgi vegnir constatà che la LPrEl na tutga betg il chantun e l'economia chantunala d'electricitad senza che quels sajan preparads.

Respostas a las dumondas:

1. En il chantun Grischun existan actualmain 92 interpresas da provediment d'electricitad (IPE) communalas e privatas che furneschan electricitad a tut las vischnancas. Ins sto partir dal fatg che la pressiun sin il martgà che resulta da la liberalisaziun, che las novas incumbensas legalas che ston vegnir ademplidas e che las pretensiuns pli e pli grondas a las IPE chaschunian ina consolidaziun en la branscha d'electricitad. Las producentas d'electricitad èn da l'avis che l'avertura dals martgads d'electricitad saja da princip ina schanza, cunzunt per commerzialisar l'electricitad or da forza idraulica.

2. La LPrEl pretenda ina legislaziun executiva chantunala. Las lavurs preparatoricas per quest project da lescha han cumenzà. En il rom da la conferenza da las regenzas dals chantuns alpins s'engascha il chantun Grischun er per mantegnair ses interess en la consultaziun tar l'ordinaziun federala davart il provediment d'electricitad e tar l'ordinaziun federala d'energia. Igl è previs d'exequir la LPrEl en collavuraziun cun la AEG.

3. Ils territoris da provediment duain vegnir attribuids en in emprim pass a norma da las relaziuns actualas. Suenter vegni a sa mussar, sche la consolidaziun menziunada chaschuna midadas resp. fusiuns da territoris da provediment.

4. Ils territoris da provediment saja quai sco conferma dal status quo en in emprim pass, saja quai tar fusiuns da territoris da provediment en il decurs dal process da consolidaziun pon vegnir attribuids mo cun integrar ils gremis pertutgads. Sch'i duessan vegnir disponidas midadas dals territoris da provediment, stuess quai succeder en il rom d'ina procedura formala cun mantegnair l'attenziun giuridica e suenter avair considerà detagliadamain ils interess.

5. Areguard la necessitad da far adattaziuns en la lescha chantunala d'energia per utilisar l'energia en moda spargnusa e raziunala vegni renvià a la resposta a l'incumbensa Feltscher concernent l'effizienza da l'energia en il chantun Grischun.

Datum: 30 d'avust 2007