Navigation

Inhaltsbereich

Sessiun: 13.06.2007
Ils problems psichics e las malsognas psichicas s'augmentan tar l'entira populaziun. Quest fatg pertutga cumplainamain er il chantun Grischun. Tras las particularitads geograficas n'è il provediment psichiatric betg garantì en tut las regiuns en medema moda.

Il provediment da la populaziun dal chantun en il sectur da la psichiatria d'uffants e da giuvenils sco er da la psichiatria sco tala sa chatta en emprima lingia tar il servetsch psichiatric per uffants e giuvenils dal Grischun sco er tar ils servetschs psichiatrics dal Grischun.

La fundaziun per la psichiatria d'uffants e giuvenils en il Grischun ed ils servetschs psichiatrics dal Grischun garanteschan per il provediment dals uffants, dals giuvenils e da las persunas creschidas, e quai tant en il sectur staziunar, en il sectur parzialmain staziunar sco er en il sectur ambulant.

Per ch'il provediment da la populaziun possia vegnir mantegnì cun ina professiunalitad fitg gronda ed uschia, ch'el correspunda qualitativamain al stadi actual da la scienza, dovri er en l'avegnir ina structura optimala sco er persunal e meds finanzials avunda. In element impurtant è er il fatg ch'ils servetschs existents coordineschian las prestaziuns respectivas in cun l'auter.

Medemamain èsi indispensabel d'integrar tut ils servetschs spezialisads ch'èn cumpetents per l'assistenza d'umans cun particularitads psichicas (servetsch da pedagogia curativa, servetsch psicologic da scola, fundaziun per la psichiatria d'uffants e giuvenils, spitex).

Sin plaun naziunal ha la conferenza svizra da las directuras e dals directurs chantunals da sanadad elavurà in mussavia davart la planisaziun psichiatrica (27 da november 2006).

Cun quest mussavia duain vegnir cuntanschidas trais finamiras impurtantas:

1. sustegnair ils chantuns a planisar in provediment psichiatric confurm a la lescha federala davart l'assicuranza da malsauns (LAM);

2. resguardar en moda pli adequata las prestaziuns ambulantas che vegnan furnidas en il rom da la planisaziun dals ospitals;

3. realisar programs da model, perquai che tals èn ina premissa indispensabla per sviluppar elements dal provediment psichiatric che cunvegnan a las pazientas ed als pazients.
La cumissiun da psichiatria ch'è vegnida nominada da la regenza ha elavurà il rapport da psichiatria da l'onn 2005 e l'ha deponì tar il departament da sanadad. Quest rapport sco er il rapport da psichiatria precedent da l'onn 1995 renvieschan a la necessitad da planisar in concept communabel ed interdisciplinar per il provediment psichiatric da la populaziun dal chantun.

Perquai envidan las sutsegnadras ed ils sutsegnaders la regenza d'elavurar in concept chantunal da psichiatria che mussa variantas da provediment tranter ils differents servetschs.

Cuira, ils 13 da zercladur 2007

Name: Bucher-Brini, Marti, Butzerin, Arquint, Bachmann, Barandun, Baselgia-Brunner, Bischoff, Brandenburger, Candinas, Casutt, Caviezel (Pitasch), Cavigelli, Christoffel-Casty, Clavadetscher, Conrad, Darms-Landolt, Felix, Frigg-Walt, Gartmann-Albin, Giovanoli, Hanimann, Jäger, Jenny, Keller, Kessler, Koch, Kollegger, Mani-Heldstab, Märchy-Michel, Menge, Mengotti, Meyer Persili (Cuira), Meyer-Grass (Claustra), Noi-Togni, Pedrini (Roveredo), Pfäffli, Pfenninger, Pfiffner-Bearth, Portner, Quinter, Righetti, Thöny, Trepp, Troncana-Sauer, Valär, Pedrini (Soazza), Hauser

Session: 13.06.2007
Vorstoss: rg Auftrag



Resposta da la regenza

Sco ch'i vegn menziunà correctamain en l'incumbensa, sa chatta il provediment psichiatric da la populaziun dal chantun en emprima lingia tar ils servetschs psichiatrics dal Grischun (SPGR) e tar il servetsch psichiatric per uffants e giuvenils dal Grischun (SPUG). Correspundentamain è la coordinaziun da las prestaziuns dals dus servetschs in element impurtant dal provediment psichiatric.

La midada vegninta dal schefmedi tar il SPUG porscha ina buna chaschun per sclerir da nov la collavuraziun tranter il SPUG ed ils SPGR e per intensivar u schizunt per instituziunalisar tala. Ils 25 da zercladur 2007 ha il cussegl da fundaziun dal SPUG respundì en moda positiva ina dumonda correspundenta dal departament.

Sin basa da quai ha il departament installà ina gruppa da lavur per examinar las pussaivladads da collavuraziun tranter il SPUG ed ils SPGR. En quest connex prevesa ina varianta respectiva da transferir la gestiun dal SPUG als SPGR. A questa pussaivladad ha la regenza renvià l'onn 2000 en ses sboz davart l'independenza da las clinicas psichiatricas Waldhaus e Beverin (M 2000-2001, p. 533).

Tar il mussavia da la CDS davart la planisaziun psichiatrica che vegn tematisà en l'incumbensa stoi vegnir menziunà ch'i n'è cun la basa giuridica vertenta da la LAM betg pussaivel d'integrar en ina planisaziun giuridicamain lianta las furnituras ed ils furniturs da prestaziuns che lavuran independentamain en il provediment psichiatric ambulant (cunzunt psichiatras e psichiaters, psicoterapeutas e psicoterapeuts). L'influenza dals chantuns sin il provediment ambulant sa restrenscha actualmain principalmain a l'admissiun da furnituras e da furniturs da prestaziuns a l'activitad a quint da la LAM. Cun integrar las furnituras ed ils furniturs da prestaziuns che lavuran independentamain en la planisaziun psichiatrica na pudessi dal rest betg vegnir garantì che lur activitad vegniss coordinada cun las ulteriuras furnituras e cun ils ulteriurs furniturs da prestaziuns.

Per optimar il provediment psichiatric po la regenza influenzar e coordinar in cun l'auter sulettamain quels elements che vegnan confinanziads tras il chantun. Las pussaivladads dal chantun da far valair sia influenza sa restrenschan pia principalmain a las purschidas dals servetschs psichiatrics dal Grischun e dal servetsch psichiatric per uffants e giuvenils dal Grischun, dals servetschs da la spitex, dal servetsch psicologic da scola e dal servetsch da pedagogia curativa.

La cumissiun da psichiatria è actualmain occupada cun l'actualisaziun dal rapport da psichiatria da l'onn 1995. Ina versiun definitiva dal rapport actualisà n'è betg anc avant maun. En il rom da las lavurs restantas sa tracti cunzunt d'examinar, sche las mesiras ch'èn cuntegnidas en il sboz dal rapport èn realisablas e finanziablas.

La regenza parta dal fatg ch'il rapport tematiseschia en il senn da l'incumbensa qua avant maun tranter auter er la collavuraziun tranter quels servetschs che vegnan confinanziads dal chantun. En la versiun definitiva dal rapport da psichiatria actualisà ston per motivs pratics la finala er vegnir integrads ils resultats dals scleriments che la gruppa da lavur menziunada qua survart ha fatg davart l'intensivaziun da las pussaivladads da collavuraziun tranter il SPUG ed ils SPGR.

La regenza propona d'acceptar questa incumbensa en il senn da las explicaziuns.

Datum: 14 d'avust 2007