Navigation

Inhaltsbereich

Dumonda Pfäffli concernent la creaziun d'in label chantunal per "IPM cun in engaschi social extraordinari"

Sessiun: 13.06.2007
Tras mesiras dal stadi, tras pretensiuns e tras giavischs vegnan spetgads in cumportament pli e pli social ed in engaschi pli e pli grond da las interpresas pitschnas e mesaunas (IPM) sin il martgà da lavur. Latiers tutgan p.ex.:

- la flexibilisaziun dal temp da lavur (rapport grischun da famiglia)
- la creaziun da plazzas da scolaziun supplementaras en manaschis d'emprendissadi
- l'occupaziun e la reintegraziun da dapli persunas che retiran prestaziuns da la AI (5. revisiun da la AI)
- ils giavischs dals centers regiunals per intermediaziun da lavur (CIL), da las autoritads socialas e tutelaras sco er da las assistentas socialas e dals assistents socials da crear plazzas che pussibiliteschan ina reintegraziun

Interpresas che adempleschan questas ed er autras obligaziuns socialas demussan in grond senn da responsabladad sociala e distgargian considerablamain las finanzas da las instituziuns publicas. A medem temp acceptan questas IPM dentant er custs administrativs supplementars considerabels tras lur engaschi.
En las proceduras da submissiun dal maun public e tar la surdada da lavurs en l'economia privata èn questas IPM dentant savens dischavantagiadas pervia da la structura da lur custs. Las lavurs van alura a la concurrenza da la Svizra e da l'exteriur interpresas che han oz pli pauca conscienza sociala. Ils motivs per las differentas situaziuns da partenza en il sectur dals custs na vegnan il pli savens betg resguardads.
In label chantunal correspundent pudess p.ex. influenzar decisivamain las surdadas da lavurs dal maun public en la procedura d'invit u en la procedura directa (art. 13 al. 1 Lsub). In tal label procurass en general per dapli transparenza ed augmentass la reputaziun da questas IPM.

En vista a quests fatgs vegn la regenza supplitgada da respunder las suandantas dumondas:

1. È la regenza pronta da crear en collavuraziun cun las organisaziuns da tetg da l'economia grischuna la basa per in label chantunal per "IPM cun in engaschi social extraordinari"?

2. Entaifer tge spazi da temp po la regenza s'imaginar che la basa per in tal label possia vegnir creada?

3. Cun tge instruments, cun tge impuls u cun tge mesiras pudess la regenza procurar ch'in tal label fetschia er propi effect?

Cuira, ils 13 da zercladur 2007

Name: Pfäffli, Conrad, Parpan, Arquint, Barandun, Baselgia-Brunner, Berther (Sedrun), Bezzola (Zernez), Bischoff, Bleiker, Blumenthal, Brandenburger, Brantschen, Bucher-Brini, Buchli, Candinas, Casparis-Nigg, Casty, Caviezel (Pitasch), Christoffel-Casty, Claus, Clavadetscher, Fallet, Felix, Feltscher, Florin-Caluori, Frigg-Walt, Gartmann-Albin, Giovanoli, Hanimann, Hartmann (Cuira), Hartmann (Champfèr), Jaag, Jäger, Jenny, Kessler, Kleis-Kümin, Koch, Kunz (Cuira), Marti, Meyer Persili (Cuira), Meyer-Grass (Claustra), Michel, Nick, Niederer, Noi-Togni, Parolini, Perl, Peyer, Pfenninger, Pfiffner-Bearth, Portner, Ragettli, Rathgeb, Rizzi, Stiffler, Thomann, Thöny, Thurner-Steier, Toschini, Trepp, Valär, Vetsch (Pragg-Jenaz), Wettstein, Kunz (Fläsch), Hauser, Just

Session: 13.06.2007
Vorstoss: rg Anfrage


Resposta da la regenza

Fin oz na datti anc nagina terminologia internaziunala unifitgada per la noziun "label". Il pled "label" vegn savens duvrà sco sinonim per expressiuns sumegliantas sco decleraziun, denominaziun, inscripziun u logo. Labels èn instruments da l'economia da martgà e servan a promover la vendita dirigind il cumportament da cumpra da las consumentas e dals consuments en ina tscherta direcziun. Cuntrari a prescripziuns da designaziun e cuntrari a decleraziuns da rauba èn labels inscripziuns facultativas che vegnan duvradas per in product u per in servetsch. Labels socials signifitgeschan ch'ils dretgs socials fundamentals fixads u che postulats vegnian observads e garanteschan per regla in standard minimal en il commerzi global. Per utilisar in label basegni in sistem da label. Quel sistem cuntegna tut las regulaziuns e tut las proceduras ch'èn necessarias per sviluppar, per conceder, per utilisar, per controllar e per abgiuditgar in label.

Organisaziuns pon crear novs labels tenor plaschair, quai che ha chaschunà in grond dumber ed ina vasta diversitad da labels naziunals ed internaziunals. Labels èn da princip ina chaussa dal sectur privat. La regenza è da l'avis che la promoziun da labels saja en emprima lingia ina incumbensa da las organisaziuns nunstatalas, per exempel d'organisaziuns da branschas u d'organisaziuns da consumentas e da consuments.

Tar las dumondas:

1. La regenza resguarda la realisaziun d'in label per "in engaschi social extraordinari" sco betg cunvegnenta. En il rom dal sistem da label stuess vegnir definì in standard minimal ch'è meglier che las pretensiuns legalas u las normas per ils secturs che vegnan numnads en la dumonda sco p.ex. ils temps da lavur, la reintegraziun da persunas che retiran prestaziuns da la AI, las plazzas da scolaziun e.u.v. Sche quest standard vegniss ademplì, dess quai il dretg da purtar in label. La concepziun e la gestiun d'in tal sistem da label para da chaschunar blera lavur e gronds custs. Ultra da quai na para in tal betg d'esser pratitgabel. Labels èn adattads per far resortir ch'ina norma vegn ademplida e betg per premiar ina prestaziun extraordinaria. Ultra da quai èn ils secturs suttamess ad in svilup permanent. Quai ch'è oz "extraordinari" po damaun gia esser la regla. Per promover l'engaschi social pari d'esser pli cunvegnent da surdar ina distincziun u in premi sco ch'i vegn fatg per exempel da la pro infirmis e da la "fundaziun Schwab per social entrepreneurship". Las experientschas en connex cun la surdada dal cristal da la pro infirmis, en la giuria da tala era represchentada la regenza, mussan ch'i vul bler per fixar criteris adattads e per als applitgar. Tar labels uffizials u tar distincziuns uffizialas vegn pretendida in'objectivitad anc pli gronda.

Distincziuns e labels er en il sectur social duessan tenor l'opiniun da la regenza vegnir surdads en emprima lingia d'organisaziuns privatas. Per pudair satisfar a las differentas premissas d'ina branscha dastgassan vegnir favurisadas soluziuns da branscha.

Sin basa da questas ponderaziuns desista la regenza da stgaffir in label sco ch'el è vegnì proponì en la dumonda.

2. Il spazi da temp per stgaffir eventualmain in tal label po vegnir fixà pir, cur ch'in sistem da label concret è avant maun.

3. Mesiras da promoziun pon er pir vegnir examinadas cur ch'il sistem da label è avant maun. Perquai ch'i sa tracta qua d'ina intervenziun en il martgà, stuess il stadi far quai cun grondas retegnientschas.

Datum: 11 da settember 2007