Incumbensa da la cumissiun per GIustia e segirezza Rathgeb concernent l'elavuraziun d'in rapport da polizia 2010 per mauns dal cussegl grond
Sessiun: 29.08.2007
Ils 15 da settember 1992 ha la regenza preschentà al cussegl grond in rapport davart la situaziun da la polizia en il Grischun. En il fratemp èn succedidas midadas impurtantas en il sectur da la segirezza entaifer il pajais. En pauc temp sa participescha la Svizra als contracts da Schengen/Dublin e la confederaziun sco er la conferenza da las directuras e dals directurs chantunals da giustia e polizia (CDCGP) han relaschà il cuntegn essenzial davart la repartiziun da las cumpetenzas e da las incumbensas tranter la polizia e l'armada. Però er sin plaun chantunal èn dumondas da la segirezza adina puspè in tema da discussiuns. En il center stattan en quest connex per exempel las acziuns da la polizia da segirezza, la criminalitad da drogas e da giuvenils, la repartiziun da las incumbensas tranter las polizias chantunalas e communalas e la dumonda davart il dumber da persunal da la polizia chantunala.
La cumissiun per giustia e segirezza (CGS) envida en quest cas la regenza, suenter las enconuschientschas dal di da la segirezza ils 25 da fanadur 2007 da suttametter al cussegl grond en furma d'in rapport ina da preschentaziun da las dumondas essenzialas che sa tschentan en connex cun ils fatgs da polizia dal Grischun.Il rapport duai cuntegnair spezialmain explicaziuns davart las sfidas dals organs da segirezza ch'ins po spetgar en l'avegnir en il sectur da la segirezza interna, preschentar las incumbensas e las cumpetenzas da la polizia sin mintga plaun statal. En quest connex duai vegnir sclerì, sche ed en tge furma ch'ils fatgs communals da la polizia (er da la citad da Cuira) han anc in avegnir e tge incumbensas communalas da la polizia che pon vegnir surpigliadas en l'avegnir da la polizia chantunala (polizia unitara) e sin tge cundiziuns che quellas sa basan; tge concept da scolaziun ch'è la basa per l'uschenumnada assistenta da polizia u per l'uschenumnà assistent da polizia e co che questa scolaziun sa lascha realisar; tge consequenzas che la lescha federala davart la procedura penala ha per ils fatgs da polizia chantunals (inclusiv per la polizia giudiziala) en il Grischun; tge incumbensas da polizia che vegnan ademplidas en l'avegnir en il concordat da polizia da la Svizra orientala e tge consequenzas che la collavuraziun interchantunala (ev. internaziunala) da la polizia e quella cun auters partenaris (p.ex. armada, corp da guardias da cunfin) ha per la polizia chantunala e co che la regenza s'imaginescha questa collavuraziun. Il medem mument duai vegnir rapportà al cussegl grond er davart il dumber da persunal da la polizia chantunala, e la dumonda d'augmentar quest dumber duai vegnir tematisada.
Cuira, ils 29 d'avust 2007
Name: Rathgeb, president da la cumissiun, Bezzola (Zernez), Bondolfi, Butzerin, Campell, Casutt, Christoffel-Casty, Hartmann (Champfèr), Menge, Sax
Session: 29.08.2007
Vorstoss: rg Auftrag
Resposta da la regenza
Ils 15 da settember 1992 ha suttamess la regenza al cussegl grond ina missiva cun il titel "Rapport davart la situaziun da la polizia en il Grischun" (missiva carnet nr. 8/1992-93). En quel eran skizzadas essenzialmain l'organisaziun e la structura da la polizia chantunala, sias incumbensas, la basa, las cundiziuns generalas e lur ambient sco er la planisaziun da l'effectiv. Il cussegl grond ha tractà questa missiva ed ha prendì enconuschientscha dal rapport da la polizia chantunala, inclusiv da la posiziun da la regenza, en la sessiun da november 1992. En consequenza è vegnida approvada la realisaziun d'ina scola da polizia l'onn 1994, è vegnì augmentà il dumber da persunal da la polizia chantunala per il 1. da schaner 1995 sin 360 plazzas e permess a la polizia chantunala in surpli en la dimensiun d'ina scola da polizia.
Dapi lura è la basa giuridica sa midada. Sin plaun federal coordineschan sa basond sin l'art. 57 da la constituziun federala (CF) dals 18 da december 1998 la confederaziun ed ils chantuns lur stentas en il sectur da la segirezza interna. Tenor l'art. 79 da la nova constituziun chantunala (CC) dals 18 da matg 2003 garanteschan il chantun e las vischnancas l'urden public e la segirezza publica.Il 1. da fanadur 2005 è entrada en vigur la nova lescha da polizia (DG 613.000) e la veglia ordinaziun davart la polizia chantunala dals 20 da november 1974 è vegnida abolida.
L'ambient da la polizia chantunala è spezialmain tras las intervenziuns da la polizia da segirezza u en vista als contracts da Schengen e da Dublin vegnida influenzada pli e pli tras ina collavuraziun pretensiusa cun in grond dumber da partenaris (p. ex. cun la polizia criminala federala a chaschun da l'engaschament per il WEF , cun l'armada en general e cun la segirezza militara en spezial, cun il corp da guardias da cunfin, però er cun organisaziuns privatas per la segirezza). Ultra da quai ston vegnir menziunadas en spezial las cunvegnas contractualas cun il corp da guardias da cunfin, però er l'augment dal basegns da sustegn che las vischnancas dovran per ademplir lur incumbensas da la polizia. Ultra da quai è vegnida pli intensiva er la collavuraziun en il concordat da la polizia da la Svizra orientala; dapi l'onn 2006 vegn manada ad Amriswil, empè d'ina atgna scola da polizia, ina scola da polizia communabla per la Svizra orientala.
Dapi l'onn 1995 e dapi la fixaziun dal dumber da persunal da quel temp è vegnì adattà il dumber da persunal da la polizia chantunala pliras giadas. En quest connex èn vegnidas resguardadas sin fundament da las incumbensas supplementaras las indemnisaziuns che la confederaziun ha pajà en il sectur da las controllas dal traffic pesant sco er las adattaziuns dal dumber da persunal ch'èn resultadas cun surpigliar incumbensas da la polizia communala tenor l'art. 5 da la nova lescha da polizia. Al medem temp ha la cumissiun da gestiun permess l'onn 2006 da surpigliar l'uschenumnà surpli en il plan da plazzas da la polizia chantunala e d'augmentar uschia il dumber da persunal da 378.6 a 408.6 plazzas.
Considerond quests svilups èsi giustifitgà d'elavurar in rapport da polizia actualisà. En il rapport duai vegnir fatga ina analisa ed ina preschentaziun cumplessiva da la situaziun da la polizia en noss chantun ed il medem temp duai la regenza s'exprimer davart las resursas finanzialas e persunalas ch'èn necessarias per ademplir las incumbensas. La regenza prevesa da far il rapport l'onn 2008 e d'al trametter al parlament. Correspundentamain è la regenza pronta d'acceptar questa incumbensa.
Datum: 26 d'october 2007