Navigation

Inhaltsbereich

Dumonda Thöny concernent il tractament da l'aua persa d'autostradas e da vias chantunalas

Sessiun: 30.08.2007
En l'avegnir sto vegnir nettegiada l'aua persa d'autostradas, avant ch'ella cula en la chanalisaziun u en las proximas auas. Quai prescriva la lescha davart la protecziun da l'ambient. Fin ussa culava l'aua engrevgiada ubain en la chanalisaziun ubain directamain en las auas dals conturns.

Perquai fa il chantun Berna ussa tests cun sereneras spezialas. Quellas filtreschan var 90 pertschient da las substanzas nuschaivlas, cunzunt las particlas dals pneus d'autos ch'èn contaminadas tranter auter cun zinc. Mintga di vegni isà giu ina quantitad da 13 pneus d'autos sin mintga kilometer d'autostrada. L'utilisaziun da tals indrizs protegia las auas vischinas cunter la contaminaziun tras substanzas che na tutgan betg en la circulaziun natirala.

En quest connex tschentan las sutsegnadras ed ils sutsegnaders las suandantas dumondas:

1. Vegn nettegiada l'aua persa da la A13 e da la via dal Partenz gia oz separadamain u cula ella en las auas vischinas senza vegnir tractada?

2. Co sa preschenta la situaziun tar las vias chantunalas ch'èn fitg frequentadas?

3. Er en ils tunnels datti aua persa malnetta. Tge mesiras vegnan prendidas qua?

4. En cas che l'aua persa na vegn betg nettegiada separadamain: Fin cura quinta la regenza da realisar questa disposiziun da la lescha davart la protecziun da l'ambient?

Cuira, ils 30 d'avust 2007

Name: Thöny, Bucher-Brini, Arquint, Baselgia-Brunner, Berni, Blumenthal, Christoffel-Casty, Dermont, Fasani, Florin-Caluori, Frigg-Walt, Gartmann-Albin, Jäger, Jenny, Keller, Kleis-Kümin, Koch, Menge, Meyer Persili (Cuira), Niederer, Noi-Togni, Peyer, Pfenninger, Pfiffner-Bearth, Thurner-Steier, Trepp, Troncana-Sauer

Session: 30.08.2007
Vorstoss: rg Anfrage


Resposta da la regenza

La lescha federala dals 24 da schaner 1991 davart la protecziun da las auas pretenda da proteger las auas en moda cumplessiva e da mantegnair las circulaziuns da l'aua en in stadi uschè natiral sco pussaivel. L'aua persa malnetta sto vegnir tractada e l'aua persa netta sto sche pussaivel vegnir laschada sfundrar. Per che questas pretensiuns possian vegnir ademplidas, stoi vegnir fixà en connex cun l'allontanament da l'aua da precipitaziuns che defluescha da vias da traffic, cur che l'aua persa ha da valair sco aua malnetta ubain sco aua netta. Per quest intent ha l'uffizi federal d'ambient (UFAM) edì in mussavia per la protecziun da las auas en quai che reguarda l'allontanament da l'aua da vias da traffic.
Il factur d'influenza il pli impurtant per la contaminaziun da l'aua persa da las vias da traffic è il volumen da traffic (particlas isadas giu dals pneus e dals frains, restanzas dals carburants e.u.v.). Pli grond ch'il volumen da traffic è e pli gronda che la contaminaziun da l'aua persa è. Tar il volumen da traffic sin las vias naziunalas e sin las vias chantunalas en il chantun Grischun poi da princip vegnir constatà che la contaminaziun da l'aua persa da las vias da traffic è pitschna fin mesauna e ch'igl è en general admissibel da laschar sfundrar u d'inducir l'aua persa da las vias en in'aua sur terra senza la tractar en ina serenera. Sulettamain tranter La Punt ed il cunfin cun il chantun Son Gagl stuess vegnir examinà in tractament, avant che l'aua persa da las vias vegn inducida en in'aua sur terra.

1. L'aua persa da la A13 e da la via dal Partenz sfundra da princip sur l'ur da la via u cula sco aua malnetta en ils prefluents. Tar mesiras da mantegniment vegnan las auas da surfatscha da la via manadas dapi circa 8 onns sche pussaivel en in indriz da sfundrada.

2. L'aua persa da las vias chantunalas vegn da princip laschada sfundrar sur l'ur da la via u cula sco aua malnetta en ils prefluents.

3. Tar novs tunnels vegnan las auas persas (aua netta or dal grip ed aua malnetta) da princip deducidas en sistems separads. L'aua persa da las vias cula en in batschigl da deposit e/u en in zavrader d'ieli resp. en in zavrader da gravitaziun. Stabiliments pli vegls che n'han betg anc in tal indriz vegnan dotads cun in tal a chaschun d'ina sanaziun.

4. Las disposiziuns davart la protecziun da las auas vegnan observadas, e quai tar las vias chantunalas, tar la via naziunala A28 (via dal Partenz) e per gronda part er tar la via naziunala A13. Sulettamain tranter La Punt ed il cunfin cun il chantun Son Gagl stuessi vegnir examinà, sche l'aua persa da las vias sto vegnir tractada, avant che l'inducir en in'aua sur terra. A partir dal 1. da schaner 2008 vegn la confederaziun sco proprietaria futura da las vias naziunalas ad esser cumpetenta per questa dumonda.

Datum: 8 d'october 2007