Navigation

Inhaltsbereich

Dumonda Troncana concernent l'execuziun da la lescha federala davart l'acquist da bains immobigliars tras persunas a l'exteriur: vendita d'ina abitaziun da vacanzas ad in'autra persuna a l'exteriur (abitaziun da segund maun)

Sessiun: 30.08.2007
Uschè ditg che la lex Koller è en vigur, dovri ina permissiun da l'inspecturat dal register funsil per vender talas abitaziuns a persunas senza domicil en Svizra. Sco finamira da prestaziun ha il cussegl grond fixà "ina cussegliaziun ed ina infurmaziun professiunala irreproschabla". Sch'ina abitaziun duai vegnir vendida sco segunda fatschenta, sto la proprietaria u il proprietari vertent (persuna estra) cumprovar che questa abitaziun na possia betg vegnir vendida ad ina persuna cun domicil en Svizra per ils custs da producziun. Per pudair cumprovar quai, ston vegnir plazzads plirs inserats da vendita en gasettas surregiunalas. Dal text da l'inserat stoi er resultar cleramain ch'i sa tractia d'ina vendita urgenta per in pretsch favuraivel (custs da producziun u valur commerziala actuala). Tut questas pretensiuns èn fitg raschunaivlas e correctas e purschessan er a la populaziun indigena ina schanza da cumprar in'abitaziun favuraivla. Displaschaivlamain na stoi dentant betg vegnir definì exactamain, da tge immobiglia ch'i sa tracta, e l'inserat po cumparair sco inserat da cifra.

Nus supplitgain la regenza da respunder las suandantas dumondas:

1. Co po l'inspecturat dal register funsil controllar, sch'igl èn entradas offertas sin inserats da cifra?

2. Co valitescha la regenza las pussaivladads d'ina cumpradra u d'ina cumprader interessà da persequitar il resultat da la dumonda da permissiun tar in inserat da cifra, suenter ch'ella u ch'el ha annunzià ses interess, ma suenter che ses interess n'è betg vegnì respundì?

3. Na stuessan talas offertas betg vegnir drizzadas a la vischnanca u a l'inspecturat dal register funsil?

4. Na fissi betg raschunaivel, sche talas abitaziuns stuessan vegnir inseridas er en l'organ da publicaziun uffizial da la regiun?

5. È la regenza pronta d'elavurar ina proposta che mantegna quest avantatg per la populaziun indigena, sche questa regulaziun vegniss medemamain abolida pervia da l'aboliziun da la lex Koller?

Cuira, ils 30 d'avust 2007

Name: Troncana, Arquint, Augustin, Baselgia-Brunner, Berni, Bucher-Brini, Campell, Candinas, Casutt (Falera), Dermont, Frigg-Walt, Gartmann-Albin, Geisseler, Giovanoli, Jaag, Jäger, Jenny, Keller, Kleis-Kümin, Koch, Menge, Mengotti, Meyer Persili (Cuira), Nigg, Pedrini, Perl, Peyer, Pfenninger, Ratti, Thöny, Trepp, Wettstein, Casutt-Derungs (Falera), Clalüna, Patt

Session: 30.08.2007
Vorstoss: rg Anfrage


Resposta da la regenza

Dapi la revisiun da la lescha introductiva dals 26 da november 2000 tar la lescha federala dals 16 da december 1983 davart l'acquist da bains immobigliars tras persunas a l'exteriur (LItLAIE; DG 217.600) vegn en vischnancas cun restricziuns entaifer il rom dal dretg federal fatga dependenta la permissiun per acquistar in'abitaziun da vacanzas d'ina autra persuna a l'exteriur, in'uschenumnada abitaziun da segund maun, sulettamain da la cumprova che l'abitaziun na possia betg vegnir vendida per ils custs da producziun sin il martgà svizzer d'immobiglias. En media vegnan concedidas 60 fin 70 permissiuns ad onn per abitaziuns da segund maun. Sco cumprovas per l'invendibilitad ston vegnir suttamessas a l'inspecturat dal register funsil ed al register da commerzi (IRFRC) ina copia dals inserats per cumprovar che quels sajan vegnids publitgads pliras giadas per la valur commerziala uffiziala en ina u en pliras gasettas surregiunalas, sco er la conferma, sche ed eventualmain quantas respostas ch'èn entradas sin ils inserats, ensemen cun eventualas respostas negativas en scrit d'interessentas svizras e d'interessents svizzers.

1. Il IRFRC sa fida per regla da las indicaziuns da las petentas u dals petents. Sch'i dat dubis areguard la legitimitad da questas indicaziuns, vegnan pretendidas ulteriuras cumprovas, sco per exempel ina conferma da l'agentura d'inserats concernent il dumber da las offertas entradas.

2. Tenor la statistica vendan persunas estras mintga onn 100 fin 150 abitaziuns da vacanzas a persunas svizras. Ultra da quai na vegnan bleras abitaziuns da vacanzas betg vendidas, malgrà ina publicaziun. En tut quests cas na datti betg proceduras da permissiun. En quels cas ch'i dat ina procedura da permissiun controllescha il IRFRC, sche las premissas per la vendita ad in'autra persuna a l'exteriur e per l'acquist tras questa autra persuna èn ademplidas. Pervia dal secret d'uffizi n'èsi betg admess da laschar prender invista interessentas privatas ed interessents privats da questas proceduras.

3. L'execuziun da la lex Koller n'è betg chaussa da las vischnancas. L'obligaziun da stuair inoltrar las offertas da cumpra sur il IRFRC per cumprovar che la publicaziun saja vegnida fatga legitimamain, produciss tenor l'avis da la regenza custs administrativs nunnecessaris. La pratica da publicaziun ch'è vegnida sviluppada per las abitaziuns da segund maun era vegnida fixada da la dretgira administrativa en il senn d'ina precisaziun da la pratica precedenta ed è vegnida applitgada dapi lura dal IRFRC en moda cumplessiva (SDA 566/88, consideraziun 3c). Inobservanzas che ston vegnir attribuidas al fatg che las pussaivladads da controllar las publicaziuns èn nunsuffizientas, pon praticamain vegnir exclusas. Indicaziuns faussas u incumplettas da vart da las petentas e dals petents èn ultra da quai smanatschadas cun consequenzas penalas rigurusas.

4. En ina tscherta dimensiun serva la publicaziun ad evitar speculaziuns; en emprima lingia sto ella dentant ademplir la finamira secundara che vegn persequitada cun la lex Koller, numnadamain da manar enavos proprietad funsila estra en mauns svizzers. Las schanzas che persunas che na dovran betg ina permissiun cumprian enavos questas immobiglias èn pli grondas sin plaun surregiunal. Sche la publicaziun supplementara en ina gasetta regiunala gida a cuntanscher l'effect secundar che interessentas indigenas e che interessents indigens pon cumprar en cas singuls favuraivlamain in'abitaziun principala, sto quai segiramain vegnir beneventà. Igl è dentant intschert, sche las abitaziuns da vacanzas en discussiun che han per regla pitschnas surfatschas d'abitar nettas èn adattadas sco abitaziuns principalas.
Malgrà quai ha il IRFRC midà sia pratica e pretenda ussa ch'ils inserats vegnian publitgads er en ina gasetta regiunala.

5. Tras l'aboliziun da la lex Koller croda davent er la basa giuridica che pussibilitescha a l'autoritad cumpetenta da colliar la revendita d'ina abitaziun da vacanzas cun la cundiziun d'offrir questa abitaziun da vacanzas l'emprim per in pretsch favuraivel sin il martgà d'immobiglias svizzer resp. indigen. En il rom da l'urden giuridic vertent na vesa la regenza naginas pussaivladads per introducir in instrument substitutiv sin plaun chantunal.

Datum:19 d'october 2007