Las manevras a chaschun da las votaziuns en il cussegl grond èn senza dubi divertentas. Ultra da quai adempleschan ellas er la pretensiun da transparenza almain transitoricamain. Tenor l'art. 47, al. 1 da l'urden da gestiun dal cussegl grond (UGCG) pon las debattas vegnir assistidas publicamain. Sch'ins vul dentant reconstruir intgins dis pli tard tgi che ha votà co, alura na pon ins betg far quai.
Plinavant duai vegnir constatà che vers saira daventan las retschas en la sala dal cussegl grond adina pli vidas. L'abilitad da decider dal cussegl grond è vegnida strapatschada fermamain en singuls cas. I fiss desiderabel da posseder in instrument che impediss in tal cumportament.
Il cussegl naziunal e differents parlaments chantunals sco Berna (dapi 1997), Friburg (dapi 2000), Vad e Vallais (dapi 2001), Genevra e Son Gagl (dapi 2002), Tessin (dapi 2003), Basilea-Champagna, Appenzell dador, Argovia (dapi 2005) e Turitg (dapi 2007) adempleschan questas pretensiuns cun agid da l'instrument da la votaziun electronica. Il dumber da las commembras e dals commembers dals parlaments da quests chantuns tanscha da 65 (Appenzell dador) fin 180 Turitg.
L'avantatg d'in sistem da votaziun electronic è ch'il cumportament da votaziun vegn rendì visibel en moda nunbirocratica. El è visibel immediatamain ed anc emnas suenter la sessiun. Las burgaisas ed ils burgais da noss chantun han il dretg da pudair chapir da tut temp co che lur deputadas e lur deputads voteschan al cussegl grond.
Cun ina tala installaziun pon dentant vegnir eliminads er sbagls da dumbraziun. Tar decisiuns cun ina maioritad fitg pitschna è quai fitg impurtant.
Cun smatgar in nuf èsi plinavant pussaivel d'inditgar, sch'ins vul dar ses votum. La presidenta u il president dal cussegl grond na sto betg pli observar ils mauns levads ed er il pitgim cun ils cullis vegn a svanir.
Ils custs per l'introducziun d'in sistem da votaziun electronic importan tenor las cifras dals auters chantuns la summa da circa 500'000 francs.
Sa basond sin l'art. 50 da la lescha davart il cussegl grond po il cussegl grond prender in conclus en il sectur da sias cumpetenzas tras in conclus direct.
Las sutsegnadras ed ils sutsegnaders proponan al cussegl grond da realisar sut la direcziun da la conferenza da las presidentas e dals presidents in sistem da votaziun electronic en la sala dal cussegl grond. Per quest intent sto vegnir adattà l'urden da gestiun dal cussegl grond (UGCG).
Cuira, ils 31 d'avust 2007
Name: Thöny, Rathgeb, Loepfe, Augustin, Bachmann, Baselgia-Brunner, Berther (Sedrun), Bischoff, Bondolfi, Brüesch, Bucher-Brini, Buchli, Fasani, Felix, Florin-Caluori, Frigg-Walt, Gartmann-Albin, Jaag, Jäger, Kleis-Kümin, Kunz, Menge, Meyer Persili (Cuira), Parolini, Peyer, Pfäffli, Pfenninger, Pfiffner-Bearth, Pfister, Tenchio, Thomann, Trepp, Tuor, Wettstein, Flütsch
Session: 31.08.2007
Vorstoss: rg Antrag auf Direktbeschluss