Navigation

Inhaltsbereich

Dumonda Flütsch concernent il potenzial turistic d'infrastructuras en connex cun meglieraziuns e cun vias da guaud

Sessiun: 01.09.2007
Sche meglieraziuns generalas servan oravant tut a l'utilisaziun tras l'agricultura, vegnan ellas er duvradas pli e pli sco instruments multifuncziunals dal svilup dal territori ed han in niz uschè vast sco pussaivel. Sut quests aspects ston er vegnir consideradas da nov las funcziuns da vias champestras existentas ch'èn vegnidas construidas sco vias agriculas en il rom da meglieraziuns generalas e che sa chattan per part en territoris fin sur 2000 m.s.m. Questas vias servan actualmain en emprima lingia a l'agricultura e vegnan mo pli manadas fin tar quellas parcellas che vegnan anc utilisadas da l'agricultura e che vegnan uschia er avertas da questas vias. Questas vias pudessan ozendi er ademplir funcziuns che van pli lunsch, en spezial per il turissem. Bleras giadas mancan lungs trajects da colliaziun cun sendas da biking e da viandar. Cun paucas mesiras architectonicas supplementaras e cun ina regulaziun da las servituts areguard l'utilisaziun turistica vegniss la valur dal territori rural augmentada fermamain e l'infrastructura che deriva da la meglieraziun pudess vegnir utilisada uschia en moda pli vasta e frequentada meglier. Quai fiss ina schanza per nossas regiuns periferas en il rom da la nova politica regiunala. Las medemas ponderaziuns valan er per vias da guaud.

Las sutsegnadras ed ils sutsegnaders supplitgeschan perquai la regenza da respunder las suandantas dumondas:

Vesa la regenza pussaivladads er en connex cun la nova politica da finanzas da la confederaziun da cumbinar vias champestras agriculas e vias da guaud cun colliaziuns che vegnan utilisadas dal turissem sco sendas da biking e da viandar e da resguardar uschia pli fitg ils interess dal turissem?

Cuira, il 1. da settember 2007

Name: Flütsch, Donatsch, Sax, Augustin, Bachmann, Bezzola (Zernez), Blumenthal, Brandenburger, Brüesch, Buchli, Bühler-Flury, Butzerin, Campell, Castelberg-Fleischhauer, Casty, Caviezel-Sutter (Tusaun), Christoffel-Casty, Felix, Feltscher, Geisseler, Hanimann, Hardegger, Hartmann (Cuira), Hasler, Jaag, Jäger, Kessler, Loepfe, Mani-Heldstab, Märchy-Michel, Michel, Montalta, Nick, Parolini, Peer, Pfäffli, Stiffler, Thomann, Trepp, Tuor, Vetsch (Claustra), Wettstein, Capeder, Patt, Rischatsch

Session: 01.09.2007
Vorstoss: rg Anfrage


Resposta da la regenza

Meglieraziuns generalas
Tar la dumonda d'utilisar en moda multipla ils stabiliments d'avertura en il rom da meglieraziuns generalas sa tracti d'ina vart da la planisaziun e da l'approvaziun da projects d'avertura dal territori agricul e da l'autra vart da la finanziaziun dals stabiliments previs.

Cuntrari a las pussaivladads da l'exteriur vischin (p.ex. da la Baviera), nua ch'i vegnan rimnadas cun uschenumnads projects per renovar il vitg rimnadas tut las mesiras ch'èn necessarias per il svilup d'in vitg, integradas en il plan da svilup dal vitg e realisadas cun agid d'ina procedura communabla e speziala per approvar il project, sa basan tar nus las pussaivladads per planisar mesiras e per approvar ils projects sin la lescha da meglieraziun dal chantun Grischun (LMG; DG 915.100) che s'occupa en emprima lingia cun la dumonda da la cultivaziun agricula e da la protecziun dal terren productiv cunter eveniments da la natira (art. 1 LMG).
Cun realisar meglieraziuns stoi vegnir tegnì quint adequatamain dals interess generals da l'ambient, sco er da la protecziun da la natira e dal mantegniment dal maletg dal vitg e da la cuntrada (art. 3 LMG); la planisaziun dal territori e l'arrundaziun dal terren ston vegnir accordadas ina cun l'autra (art. 13 LMG). Per reglar en moda cumplessiva tut las proximas dumondas d'avertura ordaifer la zona da construcziun s'occupan ils projects generals da meglieraziuns generalas da vegl ennà er cun ils basegns da l'avertura dal guaud, cun ils basegns da las vias e da las sendas da viandar sco er da nov cun ils basegns d'autras interessentas e d'auters interessents sco p.ex. da bikers e da skaters. Tar la planisaziun da la rait da vias champestras vegn ultra da quai adina prendì resguard dals basegns publics da las vischnancas. La confederaziun è sa dustada ditg cunter la furmaziun d'ina rait da vias circulara e cunter la colliaziun da raits da vias. Gist l'ultim temp èn dentant vegnidas renconuschidas las pretensiuns ad in'agricultura multifuncziunala. Ils basegns turistics supplementars èn vegnids integrads en il plan da project da las meglieraziuns generalas, sch'els èn vegnids fatgs valair correspundentamain. Uschia èn els er vegnids resguardads en l'approvaziun dal project. En quel reguard vegn gia oz tegnì quint cumplainamain dals giavischs ch'èn vegnids formulads en la dumonda.

Auter èsi cun la finanziaziun da tut las infrastructuras necessarias betg agriculas. Gia tar utilisaziuns cumbinadas tranter la zona da construcziun e la zona d'agricultura pretenda la confederaziun ch'ils custs vegnian zavrads consequentamain. Er per bains immobigliars betg agriculs vegn deducì in import adequat dals custs cun dretg da survegnir contribuziuns. Sch'il motiv per spustar vias e sendas da viandar u er auters indrizs u stabiliments n'è betg la consequenza d'in project da meglieraziun, na vegnan las construcziuns correspundentas betg finanziadas cun credits da l'agricultura.

Vias da guaud
Vias da guaud servan a transportar davent laina e sco plazza da lavur per lavurs forestalas (basa per implants da cranas a cabel, preparar bostga e.u.v.). L'utilisaziun da las vias da guaud per intents forestals preceda da princip las autras utilisaziuns. Vias da guaud valan sco edifizis e stabiliments forestals e suttastattan a la procedura per approvar il project tenor l'art. 14 da la lescha chantunala davart il guaud (LCG; DG 920.100) cun ina vasta cooperaziun dals uffizis e da la publicitad.

Tar la gronda part dals cas servan vias da guaud ultra als interess forestals er ad auters interess ch'èn savens interess turistics. Quels vegnan er resguardads correspundentamain, sche vias da guaud vegnan planisadas. Gia tar la planisaziun dal svilup dal guaud vegnan tractads tranter auter ils giavischs turistics e las pretensiuns turisticas al guaud ed i vegn mussà, co che eventuals conflicts pon vegnir schliads. Pia èsi pussaivel d'utilisar las vias da guaud sco vias da viandar e da biking. Disturbis memia gronds da spazis da viver per la selvaschina en territoris sensibels che derivan d'ina utilisaziun turistica excessiva ston dentant vegnir evitads. Er la dumonda da la segirezza per las utilisadras e per ils utilisaders da questas vias sto vegnir considerada adequatamain. In'extensiun ad in'utilisaziun illimitada da las vias da guaud tras il traffic motorisà che vegn chaschunada dal turissem n'è betg pussaivla pervia da l'art. 15 da la lescha federala davart il guaud (LG; CS 921.0) e pervia da l'art. 20 da la LCG.

Sche vias da guaud vegnan utilisadas dal turissem en moda considerabla, sa tschenta la dumonda da las instituziuns ch'èn responsablas per questa interessenza turistica e da lur participaziun finanziala a la construcziun ed al mantegniment da las vias da guaud correspundentas. La construcziun ed er la finanziaziun da sendas e da vias en il guaud che na servan betg primarmain ad intents forestals ed agriculs, na sa drizzan betg pli tenor la procedura d'approvaziun per edifizis e per stabiliments forestals confurm a l'art. 14 al. 1 LCG. Anzi, questas sendas e questas vias èn suttamessas a las proceduras da la planisaziun dal territori cun eventualas permissiuns supplementaras (edifizis pitschens betg forestals, proceduras da runcar).

Datum: 19 d'october 2007