Navigation

Inhaltsbereich

Incumbensa Augustin concernent l'augment da l'effectiv da la polizia chantunala dal Grischun per 40 plazzas

Sessiun: 01.09.2007
Suenter avair fatg scleriments voluminus e suenter avair valità conscienziusamain la situaziun, ha la regenza grischuna concludì ils 20 d'avust 2002 d'augmentar l'uschenumnà effectiv reglamentar da la polizia chantunala per 33 plazzas, e quai per il 1. da schaner 2003. Suenter è quest conclus vegnì approvà er da la cumissiun da gestiun. En il rom dal plan da mesiras per sanar las finanzas chantunalas ha il cussegl grond dentant puspè stuì annullar quest conclus l'onn 2003. Las mesiras tenor il plan per sanar las finanzas chantunalas fineschan la fin da quest onn.

Sin la decisiun da betg augmentar l'effectiv ha la polizia chantunala alura reagì d'ina vart cun il project da reorganisaziun P 2003, da l'autra vart cun introducir in'uschenumnada planisaziun da renunzia. Ni l'ina ni l'autra mesira n'ha purtà ils resultats spetgads. Quai vul dir: La necessitad d'augmentar l'effectiv è restada ed è cumprovada er anc oz. Effectivamain èn vegnidas creadas ils ultims quatter onns var 40 plazzas novas entaifer la polizia chantunala. Quai è stà necessari pervia da novas prescripziuns legalas, ma er per empruvar d'ademplir l'incumbensa poliziala. Questas plazzas èn vegnidas creadas cun midar autras plazzas; pia èn persunas vegnidas prendidas davent da plazzas existentas. La consequenza da quai è per exempel che l'effectiv da la polizia chantunala en Engiadin'ota importava 46 persunas l'onn 1999, anc 36 persunas il matg 2002 e mo pli 29 persunas il 1. da matg 2007. L'effectiv reglamentar tenor il P 2003 stuess importar 39 persunas. Quest exempel da l'Engiadina ota po vegnir applitgà per autras regiuns, ma er per la centrala.

La situaziun tar il persunal da la polizia chantunala è actualmain uschè precara ch'il chantun Grischun na po betg pli garantir adequatamain la segirezza da la populaziun. Tenor las prescripziuns dal manaschi stuessan vegnir observads temps d'intervenziun da 30 minutas. Pervia da las stretgas tar il persunal è quai ina chaussa nunpussaivla. Tut tenor la situaziun e tut tenor las relaziuns datti temps d'intervenziun da 90 minutas. Ch'ins sto spetgar uschè ditg, fin che la polizia arriva en in lieu d'intervenziun, n'è en mintga cas betg acceptabel en cas d'ina periclitaziun acuta ed è collià cun consequenzas negativas gravantas. Senza augmentar l'effectiv vegnan messas en dumonda er la scolaziun e la furmaziun supplementara da las collavuraturas e dals collavuraturs da la polizia chantunala; questa scolaziun e questa furmaziun supplementara vegnan prescrittas da la polizia ed èn necessarias. Per exempel vegnivan manads tras fin ussa mintga onn curs da repetiziun da trais dis per il servetsch d'urden. Il curs da quest onn ha stuì vegnir stritgà pervia da stretgas tar il persunal. Var 110 collavuraturas e collavuraturs da la polizia chantunala n'han pia betg pudì far la scolaziun necessaria en il servetsch d'urden, malgrà che l'Euro 08 stat per exempel avant porta. Tals exempels pudessan vegnir numnads bunamain senza fin. La polizia chantunala stuess pudair prender mesiras urgentas cunter l'augment da la criminalitad da giuvenils. I fiss necessari d'endrizzar in servetsch spezial da giuvenils tar la polizia chantunala. Senza augmentar l'effectiv n'è quai betg pussaivel. Oz èsi in fatg che vegn prognostitgà er per il temp fin l'onn 2010 che l'effectiv real na cuntanscha oz gnanc ina giada l'effectiv reglamentar prescrit. Il 1. da schaner 2007 importava l'effectiv real 389,60 en cumparegliaziun cun l'effectiv reglamentar da 408,60.

La malcuntentientscha ed il displaschair da las polizistas e dals polizists creschan bunamain di per di. Quai na promova ni il clima da lavur en il manaschi ni la sanadad da las collavuraturas e dals collavuraturs. Il stress e la malcuntentientscha chaschunan dapli absenzas. Ils 31 da december 2006 importava il surpli da sururas resp. da pichet 29'425 uras, quai che correspunda a var 13 plazzas cumplainas d'in onn. Tras ina resoluziun supplitgeschan las polizistas ed ils polizists sco er la federaziun da la polizia chantunala grischuna perquai urgentamain las autoritads politicas cumpetentas da procurar il pli svelt pussaivel per in augment da l'effectiv per 40 plazzas.

Las sutsegnadras ed ils sutsegnaders van da lur vart d'accord cun questa pretensiun ed incumbenseschan la regenza d'augmentar immediatamain l'effectiv da la polizia chantunala per 40 plazzas.

Cuira, il 1. da settember 2007

Name: Augustin, Stiffler, Barandun, Berther (Sedrun), Bischoff, Bleiker, Blumenthal, Brandenburger, Buchli, Bundi, Candinas, Casty, Cavigelli, Darms-Landolt, Dudli, Fallet, Fasani, Felix, Florin-Caluori, Frigg-Walt, Hardegger, Jäger Jenny, Koch, Kollegger, Loepfe, Mani-Heldstab, Menge, Montalta, Niederer, Parolini, Peyer, Pfister, Tenchio, Thöny, Thurner-Steier, Tuor, Zanetti, Casutt-Derungs (Falera), Flütsch, Patt

Session: 01.09.2007
Vorstoss: rg Auftrag


Resposta da la regenza

Ils 20 d'avust 2002 ha la regenza decidì d'augmentar l'effectiv da la polizia chantunala per 33 plazzas. Da quest augment hai dentant stuì vegnir desistì en il rom da l'examinaziun da las structuras e da las prestaziuns per sanar las finanzas dal chantun (missiva, carnet nr. 2/2003-2004). Il project da reorganisaziun "P2003" n'è betg stà ina consequenza da questa decisiun, mabain era vegnì introducì gia pli baud sut il num "P200X". Tras la reorganisaziun ch'è sa cumprovada per gronda part èn vegnidas stgaffidas structuras pli efficazias, e tras quai che l'organisaziun districtuala è vegnida fusiunada cun la polizia da traffic èn vegnidas creadas las premissas per dapli flexibilitad e per l'utilisaziun da sinergias. Il project da reorganisaziun "P2003" aveva plinavant la finamira da distgargiar en tscherts secturs parzials las collavuraturas ed ils collavuraturs a la testa (p.ex. cun introducir instructuras ed instructurs en uffizi cumplain).
Tar la polizia chantunala èn vegnidas creadas ils ultims onns plazzas novas per ademplir las incumbensas en connex cun il traffic pesant e cun il center da controlla a Riòlta sut sco er per surpigliar incumbensas da la polizia communala. Quai è stà pussaivel malgrà il moratori tar l'effectiv da persunal, perquai che questas plazzas vegnan finanziadas da la confederaziun respectivamain da las vischnancas. Cun il conclus dals 7 da mars 2006 (prot. nr. 240) e cun il consentiment da la cumissiun da gestiun ha la regenza transferì l'uschenumnà surpli da 30 plazzas en il plan da plazzas ordinari ed ha fixà l'effectiv reglamentar a 408.6 plazzas. Uschia ha la polizia chantunala survegnì dapli flexibilitad per engaschar aspirantas ed aspirants ch'entran da nov en il corp da polizia sco er persunas che midan nà dad auters corps da polizia.
Igl è correct che incumbensas supplementaras han stuì vegnir surpigliadas da l'effectiv existent. Tras la planisaziun da renunzia ch'è stada necessaria pervia da las incumbensas ch'èn s'augmentadas permanentamain hai dentant er stuì vegnir desistì d'incumbensas (p.ex. la controlla dals formulars d'annunzia dals hotels, ils rapports davart la reputaziun per natiralisaziuns, l'accumpagnament da transports). Plinavant è vegnida delegada al corp da guardias da cunfin la cumpetenza da daventar activ en tscherts secturs senza clamar la polizia chantunala.

La regenza è infurmada davart las uras supplementaras e davart las bunificaziuns da temp ch'èn da princip resultadas cunzunt tras servetschs da pichet e tras plazzas che n'èn betg stadas occupadas ils ultims onns. In'analisa exacta mussa dentant che circa la mesadad da questas pretensiuns sa repartan sin circa 20 collavuraturas e collavuraturs e che questas pretensiuns resultan ultra da quai savens en connex cun servetschs al forum economic mundial. Dal departament superiur ha la polizia chantunala survegnì gia dapi in temp l'incarica da reducir las uras supplementaras e las bunificaziuns da temp e correspundentamain da metter prioritads en l'adempliment da sias incumbensas per uschia tegnair quint da la situaziun da lavur precara che vegn fatga valair d'intginas collavuraturas e d'intgins collavuraturs.

La pretensiun che la segirezza da la populaziun na possia betg pli vegnir garantida tras l'effectiv actual, na sa lascha betg cumprovar or d'in puntg da vista objectiv. Il svilup da la criminalitad è sa stabilisà ils ultims onns, la quota d'acts chastiabels sclerids è restada pli u main la medema ed il dumber dals accidents da traffic è schizunt sa reducì levamain. Il sentiment da segirezza subjectiv da mintga singula persuna na correspunda dentant savens betg al svilup effectiv da la criminalitad.

Ina incumbensa da la cumissiun per giustia e segirezza pretenda d'elavurar in rapport da polizia per mauns dal cussegl grond. La regenza è pronta d'acceptar questa incumbensa da cumissiun. Resguardond l'organisaziun, las structuras e las incumbensas da la polizia chantunala vegn quest rapport a sclerir er l'effectiv necessari. L'emprim stoi vegnir fixà, tge incumbensas che la polizia chantunala duai ademplir en emprima lingia e tge temps d'intervenziun che duain vegnir cuntanschids. Da questas infurmaziuns sa deducescha alura l'effectiv da persunal ch'è necessari. Sch'i sa mussa che l'effectiv sto vegnir augmentà, vegn la regenza a proponer quai al cussegl grond en connex cun il rapport da polizia ch'è vegnì incumbensà. Senza disponer da la basa da decisiun necessaria, na sa laschi betg giustifitgar da concluder in augment da l'effectiv. La regenza propona da refusar l'incumbensa e da spetgar l'emprim il rapport da polizia che duai vegnir suttamess al cussegl grond l'onn 2008.

Datum: 26 d'october 2007