Navigaziun principala

Cuntegn da la pagina

Dumonda Berni concernent in computer per mintga scolara e per mintga scolar

Sessiun: 23.10.2007
A chaschun da la sessiun da zercladur ha la regenza respundì intginas dumondas davart l'introducziun dad EED en las scolas. Confurm a las directivas da HarmoS prevesa la regenza d'introducir il scriver cun la tastatura en la scola primara.

Actualmain vegn quai instruì pir sin il stgalim superiur, ed ils meds tecnics (computers) vegnan mess a disposiziun da la scola. Per quest intent vegni per part duvrà installaziuns fixas, per part dentant er apparats mobils (laptops). Betg mintga scolara e mintga scolar na posseda in agen apparat, uschia ch'il diever per il sectur da la scola, q.v.d. en il senn d'in med d'instrucziun modern, è fitg restrenschì. Per part vegnan restrenschidas las pussaivladads tecnicas da trair a niz novs meds d'instrucziun, perquai che p.ex. adina dapli cudeschs vegnan cumplettads tras CDs resp. tras DVDs u tras l'internet.

Las sutsegnadras ed ils sutsegnaders èn da l'avis che l'emprender cun agid electronic (e-learning) daventia anc pli impurtant en l'avegnir, quai che sto vegnir considerà er sco schanza. Cunzunt per las regiuns vegnan stgaffidas uschia novas pussaivladads che vegnan ad influenzar las structuras da scola. Ma er per l'economia ha il diever da las novas tecnologias d'infurmaziun ina gronda impurtanza.

Pia vegnan fatgas las suandantas dumondas a la regenza:

1. Po la regenza ir d'accord cun la valitaziun che l'emprender cun agid electronic daventia anc pli impurtant en l'avegnir e vegnia pia ad influenzar fermamain las scolas e lur organisaziun? Sin tge sa basan questas enconuschientschas e nua sa chatta il chantun Grischun en la cumparegliaziun (naziunala, internaziunala)?

2. È la regenza pronta da metter a disposiziun a mintga scolara ed a mintga scolar sin il stgalim secundar I in computer persunal en il senn d'in med auxiliar ed eventualmain da promover cunzunt finanzialmain projects da pilot correspundents, sch'il scriver cun la tastatura vegniss introducì en la scola primara?

3. Tge custs chaschunass questa introducziun e tge expensas crudassan eventualmain davent?

Cuira, ils 23 d'october 2007

Name: Berni, Candinas, Bondolfi, Augustin, Berther (Mustér), Berther (Sedrun), Blumenthal, Caduff, Cahannes Renggli, Cavigelli, Darms-Landolt, Dermont, Fallet, Florin-Caluori, Keller, Kolleger, Loepfe, Niederer, Parpan, Pfister, Quinter, Thurner-Steier, Tuor, Märchy-Caduff (Domat)

Session: 23.10.2007
Vorstoss: rg Anfrage


Resposta da la regenza

Il svilup rasant ch'exista dapi decennis tar l'elavuraziun electronica da datas (EED) ha er consequenzas per il mintgadi da scola. Avant 40 onns ha ditg Gordon Moore che la prestaziun dals chips dals computers creschia en moda exponenziala. Cun questa profezia ha el gì raschun fin oz. Quai ha tranter auter per consequenza ch'i stattan a disposiziun er a nossas scolaras ed a noss scolars tant a chasa sco er en il temp liber ed en scola onn per onn dapli computers, megliers computers e computers pli favuraivels.

Per impedir in'eventual svilup nuncontrollà e per garantir ina quietezza ed ina constanza minimala en scola ha la regenza dapi intgins onns la suandanta strategia areguard l'introducziun ed areguard il diever da las ICT (tecnologias d'infurmaziun e da communicaziun) en la scola populara: En la scola primara duai il computer restar oravant tut in utensil da lavur per la persuna d'instrucziun. Las scolaras primaras ed ils scolars primars han in contact sporadic cun il computer. In'occupaziun sistematica da las scolaras e dals scolars cun las ICT ha lieu sin il stgalim superiur. Sco preparaziun en chaussa vegn il scriver cun la tastatura spustà sin la scola primara quai en connex cun l'introducziun planisada dal nov plan d'instrucziun ch'è accordà a las regiuns. Sch'i daventa necessari da reponderar e da repassar questa tenuta da basa pervia da l'ulteriur svilup da las ICT, è la regenza pronta da far adattaziuns che ston vegnir planisadas conscienziusamain.

Sut quest aspect pon las dumondas che vegnan tschentadas en l'intervenziun vegnir respundidas sco suonda:

1. Er la regenza va d'accord cun il giudicament che l'emprender cun agid electronic daventia adina pli impurtant er en l'avegnir. Per pudair garantir in svilup controllà en il sectur da las ICT en scola persequitescha la regenza en quest reguard ina strategia prospectiva moderada en la cumparegliaziun interchantunala. En il rom dal project "scolas en l'internet" da la Swisscom han var 65 scolas primaras, var 50 scolas superiuras, passa 20 scolas dal stgalim secundar II e dal stgalim terziar sco er intginas chasas da dimora ed intginas scolas spezialas survegnì fin oz access a l'internet en il chantun Grischun. A las scolas porschan plinavant er gestiunaris d'internet locals access pli favuraivels a l'internet. Cifras concretas n'èn betg avant maun en chaussa. Eventualas soluziuns cumplessivas dad ICT duain tenor l'avis da la regenza vegnir realisadas pir, cur ch'ins po tranter auter revegnir ad experientschas correspundentas d'auters chantuns.

2. La regenza è da l'avis ch'i na saja betg cunvegnent da metter a disposiziun a mintga scolara ed a mintga scolar dal stgalim secundar I in computer persunal senza resguardar ses basegns individuals ed il stadi da savida respectiv da sia classa. Gia oz èsi garantì che tut las scolaras e che tut ils scolars dal stgalim superiur emprendan ad enconuscher ed exerciteschan da lavurar cun il computer en il rom da l'instrucziun tenor il plan d'instrucziun. Sco fin ussa duain las instituziuns ch'èn responsablas per la scola avair er en l'avegnir la pussaivladad d'accordar areguard il mument ed areguard la dimensiun las acquisiziuns en il sectur da l'equipament da las ICT da lur stgalim superiur cun lur situaziun concreta sco er da resguardar en quest connex apparats ch'èn gia avant maun.

3. Sche tut las scolaras e sche tut ils scolars dal stgalim secundar I vegnissan equipads cun in computer persunal, stuessi vegnir fatg quint tar var 2000 scolaras e scolars per annada e tar in pretsch da 1000 francs per computer en media (senza la colliaziun e senza il support) cun custs totals annuals da var 2 milliuns francs. Sin basa da las experientschas ch'èn vegnidas fatgas fin ussa resultassan tras l'utilisaziun da computers nagins respargns pli gronds a curta vista ed a vista mesauna en il sectur dals auters meds auxiliars (meds d'instrucziun e.u.v.) e dal material da diever (palpiri e.u.v.).

Datum: 17 da december 2007