Navigaziun principala

Cuntegn da la pagina

Incumbensa da la cumissiun per furmaziun e cultura (CFC) Claus concernent ina lescha per promover las scolas autas e la perscrutaziun

Sessiun: 23.10.2007
En il chantun Grischun èn domiciliads blers differents instituts da perscrutaziun sco en strusch in auter chantun senza universitad. In pèr exempels per mussar la dimensiun e la diversitad èn: l'institut federal per la perscrutaziun da naiv e lavinas a Tavau e l'institut per la perscrutaziun da la cultura grischuna a Cuira. Ultra da quai pon ins menziunar la perscrutaziun en las scolas autas ed en l'economia. La tgira e l'ulteriur svilup dal Grischun sco da furmaziun e da perscrutaziun porscha in avantatg persistent per il lieu. Ina perscrutaziun d'auta qualitad promova er la furmaziun e la domiciliaziun da branschas d'industria progressivas e rinforza il Grischun sco lieu da furmaziun.

Per il mument ha la confederaziun tramess en consultaziun la nova lescha federala davart l'agid a las scolas autas e davarat la coordinaziun en il sectur da las scolas autas svizras (LASA). La LASA vegn ad avair ina influenza er per las scolas autas ch'èn domiciliadas en il Grischun e per lur activitad da perscrutaziun (scola auta da tecnica ed economia, SATE, scola auta da pedagogia dal Grischun, SAPGR, sco er la scola auta teologica da Cuira, SATC). Eventualmain vegn ella a provocar tras las proceduras d'accreditaziun previsas ina concurrenza tranter ils chantuns sco lieus da furmaziun.

Per segirar a lunga vista il Grischun sco lieu da furmaziun unitara e da perscrutaziun e per augmentar sia activitad, duai la promoziun da las scolas autas e da la perscrutaziun en noss chantun vegnir francada en ina lescha. Ina resumaziun da questas regulaziuns che sa chattan en differentas leschas chantunalas sto medemamain vegnir prendida en mira. En quest connex duain vegnir cuntanschidas las suandantas finamiras:

- crear las cundiziuns generalas legalas per promover l'instrucziun e la perscrutaziun;

- promover instituziuns e projects davart cunvegnas da prestaziun sco er lur colliaziun internaziunala;

- promover la collavuraziun e la colliaziun d'instituziuns e da projects;

- posiziunar il chantun Grischun en il rom da la nova lescha federala davart l'agid a las scolas autas e davarat la coordinaziun en il sectur da las scolas autas svizras (LASA;

- represchentar en general pli fitg ils interess dal chantun Grischun en la cuntrada svizra da perscrutaziun.

La regenza vegn incumbensada da preparar in project da lescha correspundent e d'al suttametter al cussegl grond l'onn 2010.

Cuira, ils 23 d'october 2007

Name: Claus, Berther (Mustèr), Casparis-Nigg, Casty, Dermont, Florin-Caluori, Krättli-Lori, Mani-Heldstab

Session: 23.10.2007
Vorstoss: rg Auftrag


Resposta da la regenza

Per pudair garantir a lunga vista il standard da viver actual en il chantun Grischun sto il chantun sa participar al svilup economic dals chantuns e dals pajais vischins e sa confruntar cun las sfidas da la concurrenza naziunala ed internaziunala. Ina mesira strategica per cuntanscher questa finamira è la commembranza dal chantun Grischun en la fundaziun „Greater Zurich Area Standortmarketing“. Las incumbensas centralas da la fundaziun, resp. da la societad anonima ch'è vegnida incumbensada dad ella, èn d'augmentar il grad d'enconuschientscha dal spazi economic "Greater Zurich Area" en martgads elegids ed en branschas elegidas sco er d'acquirir interpresas da l'exteriur e da las domiciliar en il spazi Greater Zurich Area.

Ussa mussa il studi da la Credit Suisse, publitgà da curtsut il titel „Der Kanton Graubünden, Struktur und Perspektiven“, ch'il Grischun è sco lieu da qualitad per la furmaziun universitara e per la perscrutaziun cumpareglià cun ils auters chantuns sin il quartultim rang. La qualitad dals chantuns sco lieus da furmaziun universitara e da perscrutaziun vegn mesirada en il studi menziunà cun ils suandants indicaturs: l'attractivitad fiscala per persunas natiralas e per persunas giuridicas, la cuntanschibladad per il traffic, il stadi da scolaziun da la populaziun e la disposiziun da forzas da lavur fitg qualifitgadas. Gist dus da quests indicaturs stattan en relaziun cun il Grischun sco lieu da furmaziun universitara e da perscrutaziun e cun ils interess ch'èn cuntegnids en l'incumbensa da la cumissiun.

En la situaziun da concurrenza actuala èsi pussaivel che las interpresas ed ils instituts ch'èn domiciliadas actualmain en il Grischun e ch'èn activs en la perscrutaziun internaziunala pudessan tras l'internaziunalisaziun da la perscrutaziun e dal svilup bandunar il chantun Grischun. Ina purschida da scolaziun sin plaun universitar, in bun entretschament naziunal ed internaziunal e la forza innovativa da las scienziadas e dals scienziads pudessan esser mesiras adattadas per augmentar l'attractivitad dal lieu e permettan da realisar er en il Grischun ina perscrutaziun excellenta. Impuls pon ins spetgar da la nova fundaziun per innovaziun, svilup e perscrutaziun en il Grischun. A la finamira da focusar e d'entretschar las resursas da perscrutaziun ch'èn avant maun en ina regiun alpina serva però er la concentraziun da differents instituts da perscrutaziun en la "Academia Raetica" che collavura cun l'universitad per las scienzas umanas en il principadi da Liechtenstein ch'è renconuschida dal stadi.

La lescha per promover las scolas autas e la perscrutaziun che la cumissiun ha postulà po en concordanza cun ils svilups en l'entira Svizra e cun autras mesiras dar il rom che permetta a persunas creativas en la perscrutaziun ed a collavuraturas ed a collavuraturs fitg qualifitgadas da prestar contribuziuns impurtantas per l'economia publica en noss chantun ch'è attractiv dal puntg da vista turistic. Il medem mument permetta ina tala lescha da structurar e d'ordinar da nov las disposiziuns ch'èn menziunadas actualmain en differents relaschs per il Grischun sco lieu da furmaziun universitara e da perscrutaziun.

L'elavuraziun d'ina lescha chantunala per promover las scolas autas e la perscrutaziun sto vegnir fatga resguardond il svilup concernent la "lescha federala davart l'agid a las scolas autas e davart la coordinaziun en il sectur da las scolas autas svizras (LASA)". La lescha federala ch'è en consultaziun vegn ad entrar en vigur tenor il plan da termins actual il pli baud il 1. da schaner 2012.

Cun la cundiziun ch'il plan da termins chantunal per introducir la lescha per promover las scolas autas e la perscrutaziun vegnia accordà cun il plan da termins correspundent da la confederaziun è la regenza pronta d'acceptar l'intervenziun.

Datum: 21 da december 2007