Navigaziun principala

Cuntegn da la pagina

Incumbensa Kunz concernent las colliaziuns da viafier tranter Cuira e Turitg e la colliaziun directa da viafier tranter Cuira e Turitg-eroport

Sessiun: 23.10.2007
En la discussiun tar il project visiunari "porta alpina" han differents circuls accentuà l'impurtanza che bunas colliaziuns da traffic public tranter las regiuns periferas e las metropolas han. Deplorablamain vegn la porta alpina er cun agid da la direcziun da las VFF a tutgar per adina tar il passà. Ma il tema da colliaziuns da traffic sveltas tranter las regiuns periferas e las citads cun ina valur agiuntada ferma è anc adina actual ed è in grond basegn tant da bleras pendularias e da blers pendularis sco er da numerusas Grischunas e da numerus Grischuns ch'èn emigrads giu la Bassa. Il viadi dal grond dumber da Grischunas e da Grischuns che lavuran bain en il territori da Turitg ma che prefereschan da viver en il chantun Grischun, è actualmain bler memia lung (1 ura e 14 minutas). Tgi che vul arrivar uschè svelt sco pussaivel da Cuira a l'eroport da Turitg u da l'eroport da Turitg en il Grischun, fa in viadi dad 1 ura e 57 minutas. Er quest viadi dura memia ditg ed è malcumadaivel perquai ch'ins sto midar tren a la staziun principala da Turitg. Tant en sia qualitad sco dimora preferida ch'è situada sur il cunfin da la tschajera sco er en sia qualitad sco chantun da vacanzas da la Svizra profitass il chantun Grischun enorm da colliaziuns sveltas tranter Cuira e Turitg, colliaziuns che stuessan esser damain che 1 ura, sco er da colliaziuns directas tranter Cuira e l'eroport da Turitg (en omaduas direcziuns).

La confederaziun e las VFF na paran dentant betg da far stim da quest basegn cumprovà. Sco ch'igl è vegnì publitgà dacurt, propona il cussegl federal al parlament, d'integrar 29 mesiras per amplifitgar il traffic da viafier en la lescha davart l'infrastructura futura da la viafier (IFV). En tut duain vegnir impundidas 3.5 milliardas per la NVTA e 5 milliardas per auters projects da viafier. Da quests projects è il chantun Grischun vegnì excludì consequentamain. I na vegn investì gnanc in unic franc svizzer en la colliaziun tranter Cuira e Turitg. Las decleraziuns davart l'impurtanza da las colliaziuns da traffic per las regiuns periferas èn restadas vanas.
Las sutsegnadras ed ils sutsegnaders envidan perquai la regenza da s'engaschar ch'i vegnia realisada primo ina colliaziun directa da viafier tranter Cuira e Turitg-eroport (en omaduas direcziuns) e secundo ina colliaziun da viafier tranter Cuira e Turitg (en omaduas direcziuns) da main che 1 ura.

Cuira, ils 23 d'october 2007

Name: Kunz, Cahannes Renggli, Janom Steiner, Augustin, Barandun, Berni, Berther (Sedrun), Bezzola (Samedan), Bischoff, Bondolfi, Brandenburger, Brüesch, Bucher-Brini, Buchli, Bühler-Flury, Butzerin, Caduff, Campell, Candinas, Casparis-Nigg, Casty, Casutt, Caviezel (Pitasch), Cavigelli, Claus, Clavadetscher, Darms-Landolt, Dermont, Donatsch, Dudli, Fallet, Fasani, Felix, Feltscher, Gartmann-Albin, Hanimann, Hardegger, Hartmann (Cuira), Hartmann (Champfèr), Hasler, Jaag, Jäger, Jenny, Keller, Kessler, Kleis-Kümin, Kollegger, Krättli-Lori, Loepfe, Mani-Heldstab, Märchy-Michel (Malans), Marti, Menge, Mengotti, Meyer Persili (Cuira), Meyer-Grass (Claustra), Michel, Nick, Noi-Togni, Parolini, Parpan, Peer, Perl, Pfäffli, Pfister, Portner, Quinter, Ragettli, Rathgeb, Rizzi, Stiffler, Stoffel, Tenchio, Thomann, Thurner-Steier, Toschini, Trepp, Troncana-Sauer, Tscholl, Tuor, Valär, Vetsch (Claustra), Vetsch (Pragg-Jenaz), Wettstein, Godly, Grass, Grendelmeier, Märchy-Caduff (Domat), Strimer

Session: 23.10.2007
Vorstoss: rg Auftrag


Resposta da la regenza

L'augment da l'attractivitad dal Grischun sco plazza turistica, economica e sco domicil pretenda ina meglra colliaziun cun la rait da viafier naziunala respectivamain internaziunala, particularmain er cun la metropola da Turitg. Per quests motivs s'engascha il chantun Grischun dapi onns en favur da colliaziuns da viafier pli sveltas e pli frequentas tant si da la Bassa sco er si da Son Gagl u or da la Germania dal sid vers il Grischun. Quests accents strategics èn er cuntegnids en il plan directiv chantunal ch'è vegnì approvà dal cussegl federal ils 19 da settember 2003.
Cun la 1. etappa dal project "Viafier 2000" èn vegnids introducids la fin da l'onn 2004 trens rapids d'intercity tranter Turitg e Cuira. Quests trens circuleschan mintga ura ed han in temp da viadi da 74 minutas. Quai po senza auter vegnir resguardà sco concurrenza visavi la via. A partir dal december 2008 duain sco ulteriur pass vegnir colliads ils trens d'intercity tranter Basilea e Turitg che circuleschan en il tact d'ina mesa ura cun ils trens d'intercity tranter Turitg e Cuira. Quai ha per consequenza ch'il temp da viadi sa reducescha per 15 minutas sin il traject tranter Basilea ed il Grischun.

La finamira da la regenza è dentant d'introducir (en etappas) in tren d'intercity che circulescha en il tact d'ina mesa ura tranter Basilea, Turitg e Cuira. En emprima lingia duain circular en omaduas direcziuns trens d'intercity en il tact d'ina mesa ura sin il traject tranter Turitg e Cuira, e quai durant ils temps dal traffic principal, sche pussaivel a partir da la midada d'urari 2009. Tras quai po vegnir cuntanschida er ina reducziun d'ina mesa ura dal temp da viadi da las colliaziuns cun la Germania e cun la Frantscha, perquai ch'ils trens d'intercity da Cuira arrivan oz la mesa ura "fallida" a Basilea. Quests trens d'intercity supplementars permettan er ina meglra avertura da la cuntrada da Sargans cun Buchs e da la regiun dal Liechtenstein/Vorarlberg. Natiralmain sto vegnir adattada er la purschida da la viafier retica e dals autos da posta, per exempel cun garantir coincidenzas tranter Landquart - Veraina San Murezzan ch'èn analogas a quellas dal "Engadin Star". Per l'Engiadin'ota resulta uschia ina reducziun dal temp da viadi da ca. 15 minutas ed ina purschida alternanta en il tact d'ina mesa ura tras l'Alvra u tras il Veraina. Sin la lingia dal Partenz pudessan ils trens che circuleschan oz quasi a medem temp tranter Landquart e Tavau e tranter Landquart e Scuol vegnir spustads per ina mesa ura. Il traffic regiunal da la viafier retica vegniss uschia medemamain manà en il tact d'ina mesa ura.

Cun las concentraziuns da l'urari ch'èn vegnidas descrittas na po l'incumbensa Kunz che pretenda da reducir il temp da viadi tranter Cuira e Turitg betg anc vegnir ademplida. Ina reducziun da passa 14 minutas pretenda cumplettaziuns fitg charas da l'infrastructura (stabilisar il funs sin ils trajects gulivs, gulivar las stortas tranter Reichenburg e Thalwil). Per questas mesiras n'èn previs nagins meds finanzials correspundents ni a curta ni a media vista, ni tar la confederaziun ni tar las viafiers federalas svizras. Dal puntg da vista dal Grischun èsi d'emprima prioritad da serrar l'ultima largia che exista sin il traject a binari dubel tranter Tiefenwinkel e Mühlehorn e d'examinar ina guntgida al sid da Thalwil che utilisescha la bifurcaziun sutterrana existenta a Nidelbad.

Areguard la colliaziun directa tranter Cuira e Turitg-eroport (il temp da viadi dal tren d'intercity è oz 1 ura e 37 minutas) stoi vegnir constatà ch'il giavisch giustifitgà da l'incumbensa Kunz è vegnì menziunà dal cussegl federal gia en las explicaziuns davart la votaziun dal pievel da l'onn 1987 pertutgant il concept "Viafier 2000". En vista a las capacitads limitadas da la cruschada a Turitg èsi dentant er vinavant fitg difficil d'ademplir quest giavisch. La varianta che propona da passar tras il "Oberland" turitgais e da renovar la lingia tranter Schmerikon e Rüti vegn refusada dals chantuns da staziunament Son Gagl e Turitg. En vista a quests fatgs resta mo pli la dumonda a las viafiers federalas svizras da pussibilitar da midar tren a la staziun principala da Turitg sin il medem perrun, sin il qual arriva il tren d'intercity Cuira-Turitg, e quai en in tren che va a l'eroport; sco che quai è oz gia il cas a Thalwil per il tren d'interregio Cuira-Basilea.
La finala constatescha la regenza che tut las meglieraziuns dals access da viafier stoppian vegnir elavuradas en enclegientscha cun ils chantuns Son Gagl, Glaruna, Sviz e Turitg che vegnan "traversads" dals trens sco er en enclegientscha cun las viafiers federalas svizras e che las pussaivladads dal chantun Grischun sajan limitadas perquai. En il senn da las cundiziuns da basa ch'èn vegnidas descrittas qua survart è la regenza pronta d'acceptar l'incumbensa che sa drizza a las viafiers federalas svizras.

Datum: 21 da december 2007