Dumonda Pfenninger concernent ils interess chantunals tar la Rezia energia SA
Sessiun: 03.12.2007
La situaziun europeica sin il martgà d'electricitad, ma er la liberalisaziun dal martgà d'electricitad en Svizra, han procurà l'ultim temp e procuran probablamain er en l'avegnir per intginas midadas e per inquala nova orientaziun tar ils producents d'electricitad, ma er tar ils commerziants e tar ils provediders. La Rezia energia SA vi da la quala il chantun Grischun è participà cun 46% è sa sviluppada ils ultims onns da l'actura regiunala a l'actura chantunala ed ussa schizunt ad in'actura internaziunala. En connex cun la participaziun finanziala impurtanta dal chantun vi da questa interpresa che lavura ussa sin plaun internaziunal ed en connex cun las midadas enormas da questa interpresa, datti intginas dumondas concernent il svilup futur e concernent la defensiun dals interess dal chantun Grischun.
1. Tge interess chantunals persequitescha la regenza a lunga vista cun la gronda participaziun finanziala vi da la Rezia energia SA en in martgà d'electricitad e d'energia che sa mida internaziunalmain?
2. Co vul la regenza far valair quests interess e tge pussaivladads ha ella per influenzar l'activitad commerziala da la Rezia energia SA en il rom da sia participaziun finanziala?
3. Ha la regenza fatg ponderaziuns strategicas davart il svilup da la Rezia energia SA a media vista ed a lunga vista resp. datti directivas u ina discussiun materiala cun ils represchentants dal chantun en il cussegl d'administraziun?
4. Co giuditgescha la regenza l'engaschi da la Rezia energia SA a l'exteriur, sco p.ex. en l'Italia dal sid (ovra electrica da gas) u en l'Europa da l'ost resp. en Germania (ovra electrica da charvun), en vista a la cumpatibilitad ecologica ed a la posiziun da la Rezia energia SA sco interpresa cun "energia netta"?
5. Co giuditgescha la regenza ils onuraris dal cussegl d'administraziun che creschan enormamain? Ed è er la regenza da l'avis ch'i stoppia vegnir fatg spezialmain attenziun ad ina buna mesira en connex cun ils salaris da las commembras e dals commembers da quests gremis, sche l'engaschi finanzial chantunal è pli grond saja quai tar interpresas da l'economia privata u saja quai tar instituts da dretg public?
6. Tras in agir versà e tras in ambient pli favuraivel è la Rezia energia SA daventada ils ultims onns ina interpresa impurtanta cun in augment correspundent da la valur. Co giuditgescha la regenza sut l'aspect da l'instituziunalisaziun resoluta da questa interpresa il manaschament da las ristgas, e quai er areguard il mantegniment da la valur da la participaziun chantunala?
7. Sco grond acziunari ed a medem temp sco instanza da permissiun è il chantun en ina situaziun difficila en quai che reguarda la consideraziun dals interess tar intginas decisiuns. Examinescha la regenza sin basa da la situaziun actuala sin il martgà d'electricitad ed en il senn d'in detretschament dals interess ina reducziun da l'engaschi finanzial tar la Rezia energia SA?
Cuira, ils 3 da december 2007
Name: Pfenninger, Peyer, Arquint, Baselgia-Brunner, Frigg-Walt, Gartmann-Albin, Jaag, Jäger, Menge, Meyer Persili (Cuira), Pfiffner-Bearth, Thöny, Trepp
Session: 03.12.2007
Vorstoss: rg Anfrage
Resposta da la regenza
Las dumondas en connex cun il svilup futur e cun la protecziun dals interess dal chantun Grischun vi da la Rezia energia SA respunda la regenza sco suonda:
1. La participaziun dal chantun a la Rezia energia SA (RE) al permetta da persequitar activamain differentas finamiras da la politica d'energia. La pussaivladad da pudair utilisar via Grischelectra SA la forza electrica che deriva da participaziuns chantunalas en in martgà collià internaziunalmain, pussibilitescha ina valurisaziun supplementara e stgaffescha plazzas da lavur. Ultra da quai proveda l'interpresa circa la mesadad da las chasadas grischunas e surpiglia uschia ina incumbensa da provediment d'ina dimensiun considerabla en il chantun. Cun la RE "dispona" il chantun d'ina interpresa che agescha cun success sin il martgà internaziunal. Quai stgaffescha er avantatgs per l'utilisaziun da l'energia che deriva da participaziuns dal chantun e da las vischnancas sco er ulteriuras opziuns en cas che ovras partenarias returnan a la proprietaria u al proprietari.
2. Il chantun po exequir tut ils dretgs d'acziunari d'ina societad anonima ch'è quotada a la bursa. Actualmain èn sis da dudesch commembers dal cussegl d'administraziun, tranter quels il president ed il vicepresident, vegnids proponids da la regenza per l'elecziun. La regenza sa lascha infurmar regularmain da ses represchentants en il cussegl d'administraziun davart la strategia e davart projects impurtants ed adatta quels als interess da possessur.
3. Per la strategia e per la direcziun da l'interpresa èn responsabels ils organs da quella, spezialmain il cussegl d'administraziun. Cun la participaziun a la RE persequitescha la regenza finamiras da la politica d'energia e finamiras da l'economia publica. Tras la participaziun considerabla participescha il chantun al success da l'interpresa en differenta moda e maniera. Ultra da quai rinforza ella la posiziun da la politica d'energia dal chantun argeuard la segirezza da provediment, areguard l'utilisaziun da l'energia da participaziun ed areguard las opziuns en cas d'in return a la proprietaria u al proprietari.
4. In sistem general d'ovras electricas fitg diversifitgà quai che pertutga la geografia sco er las funtaunas d'energia è per ina interpresa ch'è internaziunalmain activa ina impurtanta premissa per avair ina creschientscha solida ed ina garanzia da retgav tant per la distribuziun sco er per il commerzi da forza electrica, dentant er per reducir ristgas da pretsch e da furniziun. Cumplementarmain vul l'interpresa extender vinavant sia posiziun sco producenta d'energia regenerabla cun amplifitgar la forza idraulica en il chantun ed er cun sa participar ad implants che tiran a niz la forza dal vent en l'Italia. La regenza è da l'avis che l'engaschament a l'exteriur da la RE saja correct e necessari per pudair mantegnair ils avantatgs per l'economia publica dal Grischun.
5. Ils onuraris da las cusseglieras e dals cussegliers administrativs da la RE èn vegnids auzads l'onn 2006 suenter sis onns. Sch'ins cumpareglia l'interpresa cun societads da pli u main la medema grondezza ch'èn quotadas a la bursa e resguardond il svilup da l'interpresa, giuditgescha la regenza ils onuraris da las cusseglieras e dals cussegliers administrativs che pon vegnir consultads avertamain en il rapport da gestiun sco adequats. Tenor l'avis da la regenza duain vegnir resguardads en tut ils secturs, per ils quals la regenza è cumpetenta per calcular las indemnisaziuns correspundentas, la ristga d'interpresa, la grondezza da l'interpresa, il gener da finanziaziun da l'interpresa sco er il temp che sto vegnir impundì.
6. Ils ultims diesch onns è sa multiplitgà per circa diesch giadas il curs da las aczias a la purtadra u al purtader da la RE. Tar ina gestiun d'interpresa che surpiglia responsabladad tutga senza dubi in manaschament da ristga efficazi. Quai mussa il rapport da gestiun 2007 da la RE. Ch'i sto er vegnir fatg quint cun pegiuraments dal resultat en l'ambient dinamic da l'economia da forza electrica per consequenza da pretschs che sa midan en il martgà, tutga tar la ristga d'interpresa che duess esser segirada sche pussaivel. Per la regenza èsi decisiv ch'il risk-management da la RE vegnia giuditgà da vart dals revisurs externs sco adattà.
7. Sco quai ch'igl è vegnì mussà pliras giadas sto la participaziun dal chantun a la RE vegnir considerada sco in instrument impurtant per realisar ina politica d'energia autonoma. I sa tracta d'ina strategia a pli lunga vista. Perquai na datti actualmain er nagina raschun per examinar la dimensiun da questa participaziun. Las incumbensas ch'èn colliadas cun l'execuziun da cumpetenzas suveranas ademplescha il chantun sa basond sin la legislaziun relevanta independentamain d'interess d'interpresa.
Datum: 7 da favrer 2008