Navigation

Inhaltsbereich

Sessiun: 05.12.2007
La sala dal cussegl grond è vegnida renovada ils onns 1992/93. Malgrà las grondas investiziuns da 7,5 milliuns francs èsi vegnì renunzià ad in indriz da climatisaziun e da ventilaziun efficazi, e quai per spargnar 350'000 francs.

Dapi lura è la qualitad da l'aria nauscha ed insuffizienta. Cunquai ch'i sa tracta dal bainesser da las commembras e dals commembers da la regenza e dal cussegl grond, ha l'emprim sutsegnader inoltrà gia l'onn 1995 in postulat cun il titel "aria chamitscha en il salun". Malgrà 79 suttascripziuns èsi reussì ad Aluis Maissen, il schef da finanzas da lezza giada, da cuntanscher smanatschond gronds custs ch'il postulat è vegnì refusà nunchapiblamain cun 25 cunter 16 vuschs.

Uschia è la situaziun da la ventilaziun restada insupportabla fin oz. Surtut il sectur da la regenza e la part davos da la PPS e da la PCD èn pertutgads fermamain. Er en l'entira sala dal cussegl grond èsi savens (malgrà temperaturas externas bassas) gia in'ura fin in'ura e mesa suenter ch'il cussegl ha cumenzà cun sia sesida uschia er puspè il glindesdi suentermezdi dals 3 da december 2007 in'aria nauscha chamitscha ch'è fitg engrevgianta, e quai er per la cussegliera guvernativa Eveline Widmer-Schlumpf sco er per bleras autras e per blers auters.

L'edifizi dal cussegl grond appartegna a la cassa da pensiun. Malgrà ch'ils problems èn enconuschents, n'ha displaschaivlamain er l'uffizi da construcziun auta fatg nagut fin oz per meglierar questa situaziun. Las sutsegnadras ed ils sutsegnaders incumbenseschan la regenza da metter en urden il pli svelt pussaivel la nauscha qualitad da l'aria en la sala dal cussegl grond.

Cuira, ils 5 da december 2007

Name: Koch, Möhr, Righetti, Barandun, Baselgia-Brunner, Berther (Mustér), Berther (Sedrun), Bezzola (Samedan), Bezzola (Zernez), Blumenthal, Brandenburger, Brüesch, Butzerin, Caduff, Campell, Candinas (Rabius), Castelberg-Fleischhauer, Casty, Casutt, Caviezel (Pitasch), Caviezel-Sutter (Tusaun), Cavigelli, Christoffel-Casty, Claus, Clavadetscher, Conrad, Darms-Landolt, Dermont, Donatsch, Fasani, Federspiel, Felix, Feltscher, Frigg-Walt, Gartmann-Albin, Geisseler, Giovanoli, Hardegger, Hartmann (Cuira), Hartmann (Champfèr), Heinz, Jäger, Janom Steiner, Jenny, Kollegger, Krättli-Lori, Kunz, Loepfe, Mani-Heldstab, Märchy-Michel, Marti, Mengotti, Michel, Montalta, Nick, Nigg, Noi-Togni, Parolini, Parpan, Pedrini, Peer, Pfäffli, Pfiffner-Bearth, Pfister, Plozza, Portner, Quinter, Ragettli, Ratti, Sax, Stiffler, Stoffel, Tenchio, Thomann, Thurner-Steier, Trepp, Troncana-Sauer, Tscholl, Tuor, Vetsch (Claustra), Vetsch (Pragg-Jenaz), Zanetti, Brunold, Caluori, Candinas (Mustér), Cattaneo, Engler, Hartmann (Küblis), Hauser, Züst

Session: 05.12.2007
Vorstoss: rg Auftrag


Resposta da la regenza

Il cussegl grond respectivamain sia cumissiun ch'era vegnida engaschada per la renovaziun dals onns 1992/93 han refusà da ses temp sapientivamain d'installar in indriz da climatisaziun. Quai ha chaschunà tscherts respargns finanzials. Dal puntg da vista architectonic ha questa decisiun gì consequenzas considerablas. Entant ch'in indriz da climatisaziun po vegnir planisà en il rom d'in concept general e per regla vegnir realisà cun custs giustifitgabels a chaschun d'ina sanaziun totala, èn installaziuns posteriuras en chasas ed en locals d'impurtanza istorica colliadas cun custs supplementars considerabels, ed ina soluziun optimala na sa lascha savens betg pli realisar.

La qualitad da l'aria en la sala dal cussegl grond è stada repetidamain in tema dapi la renovaziun dals onns 1992/93. En il fratemp han la cassa da pensiun sco locatura da l'immobiglia e l'uffizi da construcziun auta sco uffizi cumpetent fatg differents sforzs per meglierar la qualitad da l'aria che n'era betg cuntentaivla al cumenzament. Igl è vegnì installà posteriuramain in indriz da ventilaziun che furnescha aria frestga a la sala dal cussegl grond e ch'è vegnì provedì cun ina installaziun che sfradenta las parts da la construcziun. En quest connex ha il tecnicist da ventilaziun cumpetent rendì attent repetidamain al fatg che l'indriz installà procuria che la sala vegnia provedida cun avunda aria frestga, premess che l'indriz vegnia mess en funcziun correctamain e ch'ils servis vegnian fatgs regularmain.

Responsabel per il manaschi da la ventilaziun è en quest cas tenor il contract da locaziun il chantun, represchentà tras l'uffizi da construcziun auta. Per garantir che l'indriz da ventilaziun e che l'installaziun che sfradenta las parts da la construcziun funcziunian en moda irreproschabla, metta il pedel en funcziun l'indriz mintgamai trais dis avant las sesidas dal cussegl grond, e tut las lavurs da servis vegnan fatgas da spezialistas e da spezialists.

Tenor las explicaziuns da las spezialistas e dals spezialists pon ins partir dal fatg che la soluziun actuala bastia per furnir avunda aria frestga a la sala dal cussegl grond, sche l'indriz da ventilaziun existent funcziuna en moda irreproschabla e vegn fatg ir correctamain.

Sin basa da las experientschas ch'èn vegnidas fatgas il passà, è la regenza pronta da controllar e d'adattar il concept da manaschi da l'indriz da ventilaziun existent cun la finamira da meglierar la qualitad da l'aria en la sala dal cussegl grond. Ella refusa dentant d'installar posteriuramain in nov indriz da climatisaziun, e quai pervia dals gronds custs e pervia da las intervenziuns considerablas en la substanza architectonica da l'edifizi dal cussegl grond.

La regenza propona d'acceptar questa incumbensa en il senn da las ponderaziuns.

Datum: 28 da favrer 2008