Navigation

Inhaltsbereich

Incumbensa Cavigelli concernent in augment dals supplements per uffants e per scolaziun (lescha davart ils supplements da famiglia, LSF) e da las deducziuns per uffants da la vegliadetgna prescolara e per uffants en scolaziun (lescha da taglia, LT)

Sessiun: 06.12.2007
Il mument che questa incumbensa vegn inoltrada sa chatta ina revisiun parziala da la lescha davart ils supplements da famiglia (LSF) en consultaziun. Ella prevesa supplements per uffants resp. supplements per scolaziun "en l'autezza … tenor las tariffas minimalas da la confederaziun" (art. 4 al. 3 dal sboz da la LSF), q.v.d. 200 francs resp. 250 francs per mais resp. 2'400 francs resp. 3'000 francs per uffant per onn. I vegn a constar che la revisiun parziala da la lescha da taglia po entrar en vigur il 1. da schaner 2009. Il cussegl grond ha declerà ils 3 da december 2007 ina proposta da prender in conclus direct (iniziativa dal chantun) sco "betg impurtanta", e quai cun 52 cunter 60 vuschs. L'intent da quella proposta è stà quel da deliberar ils supplements per uffants e per scolaziun da la chargia da la taglia sin las entradas, e quai adattond la lescha federala da l'armonisaziun da la taglia.

En la debatta dal cussegl grond dals 3 da december 2007 èsi sa mussà ch'i vegnan preferidas duas autras mesiras sco alternativa tar l'intent tenor la proposta menziunada qua survart da prender in conclus direct, e quai per motivs da la transparenza, numnadamain: per l'ina d'augmentar ils supplements per uffants e per scolaziun tenor la lescha davart ils supplements per uffants en quest connex duain quests supplements restar suttamess a la chargia tras la taglia sin las entradas sco enfin ussa e per l'autra d'augmentar las deducziuns per uffants da la vegliadetgna prescolara e per uffants en scolaziun tenor la lescha chantunala da taglia. La finamira che las famiglias cun uffants stoppian urgentamain vegnir distgargiadas anc pli fitg per motivs da la politica sociala e da la politica da famiglia, e quai en in rom che po vegnir acceptà da la politica da finanzas, n'è mai stada contestada en la debatta dal cussegl grond.

Las deducziuns tenor la lescha chantunala da taglia per uffants da la vegliadetgna prescolara e per uffants en scolaziun èn vegnidas adattadas l'ultima giada en la sessiun dal cussegl grond da l'october 2006, e quai a chaschun da la revisiun parziala da la lescha chantunala da taglia (art. 38 al. 1 lit. d LT). Ellas importan da nov: 5'000 francs per uffants da la vegliadetgna prescolara ed 8'000 francs per uffants en scolaziun. Questa revisiun parziala entra en vigur il 1. da schaner 2008.

Sa basond sin questa situaziun da partenza sa lascha motivar in agir cumbinà che pertutga tant la revisiun parziala da la lescha davart ils supplements da famiglia sco er la revisiun parziala da la lescha da taglia, e quai considerond il medem mument las consequenzas respectivas per la politica sociala e per la politica da famiglia:

- In augment dals supplements per uffants e per scolaziun tenor la lescha davart ils supplements da famiglia privilegescha tut las famiglias cun uffants en moda eguala, q.v.d. en moda proporziunala. Passa 90% dals uffants vivan en famiglias cun entradas bassas u mesaunas. Pia poi vegnir giustifitgà da finanziar la promoziun supplementara da famiglias cun uffants ch'è necessaria ed urgentamain dumandada almain per part sur l'instrument dals supplements che vegnan pajads per uffant. Questa finanziaziun va a donn e cust da las patrunas e dals patruns resp. da l'economia.

- L'augment da las deducziuns tenor la lescha da taglia per uffants da la vegliadetgna prescolara e per uffants en scolaziun serva er a tut las famiglias cun uffants, privilegescha dentant pli fitg las famiglias cun uffants ch'èn economicamain pli fermas. Quai, perquai ch'ellas vegnan distgargiadas en imports absoluts en moda surproporziunala pervia da la progressiun fiscala. Questa mesira per promover famiglias cun uffants na chaschuna betg ina redistribuziun dals daners, cuntanscha dentant las finamiras da la politica sociala e da la politica da famiglia supplementarmain tar ils supplements per uffants e per scolaziun er en moda efficazia e gista en quel senn che las famiglias cun uffants pon utilisar las entradas en moda intenziunada per cuvrir lur agens custs ch'èn pli auts pervia dals uffants.

Correspundentamain supplitgeschan las sutsegnadras ed ils sutsegnaders la regenza

- da preschentar al cussegl grond ina missiva ed ina proposta davart quests dus giavischs, l'emprim en connex cun la revisiun parziala da la lescha davart ils supplements da famiglia ed il segund sche pussaivel il medem mument cun in'atgna missiva e cun in'atgna proposta cun ina revisiun parziala da la lescha da taglia;

- da preschentar al cussegl grond en quest connex en spezial er las parts centralas da la basa da calculaziun che resguarda tranter auter in augment dals supplements per uffants e per scolaziun tenor la lescha davart ils supplements da famiglia sin 300 francs resp. sin 350 francs per mais per uffant e/u in augment da las deducziuns per uffants da la vegliadetgna prescolara e per uffants en scolaziun per 25%.

Cuira, ils 6 da december 2007

Name: Cavigelli, Bucher-Brini, Koch, Arquint, Augustin, Barandun, Baselgia-Brunner, Berther (Mustér), Berther (Sedrun), Blumenthal, Bondolfi, Butzerin, Caduff, Cahannes Renggli, Candinas (Rabius), Casty, Casutt, Christoffel-Casty, Darms-Landolt, Dermont, Fasani, Federspiel, Florin-Caluori, Frigg-Walt, Gartmann-Albin, Geisseler, Jaag, Jäger, Kleis-Kümin, Kollegger, Loepfe, Menge, Meyer Persili (Cuira), Michel, Niederer, Noi-Togni, Parpan, Peyer, Pfenninger, Pfister, Plozza, Portner, Quinter, Righetti, Rizzi, Sax, Tenchio, Thomann, Thöny, Thurner-Steier, Trepp, Troncana-Sauer, Tuor, Zanetti, Brunold, Caluori, Candinas (Mustér), Cattaneo, Engler, Hauser, Mainetti

Session: 06.12.2007
Vorstoss: rg Auftrag


Resposta da la regenza

Las duas incumbensas miran en la medema direcziun e cuntegnan per part las medemas pretensiuns, uschia che la regenza respunda las duas incumbensas en ina giada.

En l'ultima revisiun parziala da la lescha da taglia èn las deducziuns ch'èn relevantas per uffants vegnidas augmentadas fermamain. Questa revisiun parziala è entrada en vigur il 1. da schaner 2008. Las deducziuns per uffants èn vegnidas augmentadas da 3'400 francs sin 8'000 francs (per uffants da la vegliadetgna prescolara sin 5'000 francs) e la deducziun per la tgira d'uffants ordaifer la famiglia da 2'800 francs sin in import maximal da 6'000 francs. Plinavant èn la regenza ed il parlament s'occupads en la discussiun parlamentara davart il rapport da famiglia detagliadamain da la dumonda davart l'import dals supplements per uffants e per scolaziun, ed ha constatà ch'ils supplements da famiglia èn in instrument impurtant per cumpensar las grevezzas da las famiglias e pia in element impurtant da la politica da famiglia.

L'import dals supplements per uffants e per scolaziun na vegn betg reglà en la lescha davart ils supplements da famiglia (LSF), mabain en las disposiziuns executivas e la regenza è cumpetenta per el. La lescha federala davart ils supplements da famiglia (LSFam) prescriva supplements minimals da 200 respectivamain da 250 francs per mais. La finanziaziun correspundenta tras las patrunas e tras ils patruns pudess vegnir garantida ord la cassa chantunala da cumpensaziun per famiglias che surpigliass ina contribuziun dad 1.7% da las summas dal salari ch'èn suttamessas a la AVS.

Dapli supplements pretendan dapli contribuziuns da finanziaziun; quai è ina grevezza supplementara per l'economia. Per sustegnair e per promover famiglias cun uffants po la regenza s'imaginar d'augmentar ils supplements per uffants e per scolaziun sur las tariffas minimalas da la LSFam, e quai en il rom da 10%, pia sin 220 francs respectivamain sin 270 francs. La tariffa da contribuziun per la finanziaziun correspundenta sto vegnir fixada en quest cas sin circa 1.9% da las summas dal salari ch'èn suttamessas a la AVS. In grevezza anc pli severa na vegn betg en dumonda per la regenza, e quai en l'interess dal Grischun sco lieu economic.

Areguard las pretensiuns fiscalas constatescha la regenza expressivamain ch'ella è dal medem avis sco l'incumbensa Tenchio, tenor la quala i sto vegnir tegnì quint da l'effect progressiv da las tariffas fiscalas er cun resguardar ils custs dals uffants. Grazia al ferm augment da las deducziuns per uffants da l'ultima revisiun parziala ha il Grischun ina posiziun excellenta en la relaziun interchantunala. La gronda maioritad dals chantuns ha deducziuns per uffants sut 8'000 francs; mo dus chantuns han ina deducziun pli auta. A la regenza na pari perquai betg opportun d'augmentar questa deducziun anc ina giada, e quai pauc temp suenter l'ultima adattaziun. Percunter para la deducziun per uffants en scolaziun ordaifer d'esser memia bassa en cumparegliaziun cun ils custs effectivs. Sch'ins resguarda ils custs che resultan per las studentas e per ils students che dimoran al lieu da studi durant l'emna, para la deducziun actuala da 14'000 francs memia bassa. La regenza è pronta da proponer qua in augment sin 18'000 francs.

Ils custs da las canortas d'uffants pitschens e da las canortas d'uffants dependan da las entradas dals geniturs. Questa structura da tariffa è ina premissa per pudair survegnir subvenziuns. Geniturs cun grondas entradas e/u cun gronda facultad pajan perquai trais fin quatter giadas dapli en cumparegliaziun cun geniturs en relaziuns economicas modestas. En las taglias pon vegnir deducids ils custs effectivs fin ad in import maximal da 6'000 francs. Questa limita para memia bassa en cumparegliaziun cun la tariffa maximala ch'è detg auta. La regenza è pronta da proponer in augment sin 10'000 francs da l'import maximal per ils custs da la tgira d'uffants ordaifer la famiglia. Ina deducziun per la tgira d'uffants entaifer la famiglia na po percunter betg vegnir previsa. La lescha federala davart l'armonisaziun da la taglia directa dals chantuns e da las vischnancas na permetta betg ina tala deducziun. Plinavant è la regenza da l'avis ch'il dretg fiscal na saja betg il dretg lieu per vulair realisar finamiras extrafiscalas.

Resumond pon ins constatar che la regenza è pronta d'acceptar las duas incumbensas Cavigelli e Tenchio en il senn da las ponderaziuns. La realisaziun da las duas incumbensas po vegnir integrada en la revisiun currenta da la legislaziun davart ils supplements da famiglia resp. en la revisiun parziala da la lescha da taglia che duai vegnir dada en consultaziun l'atun 2008 ed entrar en vigur il 1-1-2010.

Datum: 28 da favrer 2008