Navigation

Inhaltsbereich

Incumbensa Tenchio per rinforzar e per resguardar equivalentamain la tgira d'uffants "entaifer la famiglia" e cumplementara a la famiglia en il dretg fiscal

Sessiun: 06.12.2007
Il princip da la capacitad economica vegn realisà en il Grischun cun ina tariffa progressiva. Quest princip sa basa sin l'idea che ina part pli e pli gronda da las entradas stettia a libra disposiziun e che la capacitad da prestaziun s'augmentia pia surproporziunalmain. Ils custs ch'ils uffants chaschunan reduceschan dentant puspè questa capacitad da prestaziun; in fatg che sto er vegnir considerà en l'effect da la progressiun.
Tenor l'art. 36 lit. l da la lescha da taglia dal chantun Grischun (DG 720.000; LT) che entra en vigur il 1. da schaner 2008 e ch'è vegnida concludida dal cussegl grond ils 17 d'october 2006 vegnan deducids da las entradas ils custs che surpassan 500 francs per la tgira d'uffants tras terzas persunas, sche uffants sut 14 onns, per ils quals vegn concedida ina deducziun per uffants, vegnan tgirads durant il temp da lavur. La deducziun importa maximalmain 6'000 francs per uffant; ella vegn concedida a geniturs ch'educheschan sulets sco er a pèrs cun gudogn dubel e cun in'activitad da gudogn da passa 120 pertschient.

Ils 12 da favrer 2007 ha il cussegl grond prendì enconuschientscha dal rapport grischun da famiglia, en il qual igl è vegnì constatà expressivamain ch'il chantun Grischun ha gì il dumber da naschientschas il pli bass da tut ils chantuns l'onn 2005. Differentas mesiras èn vegnidas instradadas per meglierar la situaziun.
L'artitgel 7 alinea 1 da la lescha dals 18 da matg 2003 davart la promoziun da la tgira d'uffants cumplementara a la famiglia en il chantun Grischun (DG 548.300) prevesa anc adina da graduar las tariffas da las purschidas renconuschidas tenor la capacitad economica da las persunas cun la pussanza dals geniturs.

En la canorta d'uffants St. Joseph a Cuira importan ils custs per la tgira d'uffants a partir dal 1. da schaner 2008 per in uffant e per dus dis da tgira cumplains per emna (cun 4 emnas vacanzas per onn) sch'ins resguarda l'augment da las contribuziuns dal maun public per il 1. da schaner 2008 per il segment d'entradas il pli aut (q.v.d. cun entradas d'omadus geniturs, che vegnan resguardadas, da passa 160'000. francs [= entradas suttamessas a la taglia ch'èn decisivas per fixar la tariffa plus 10 pertschient da la facultad imponibla ch'è decisiva per fixar la tariffa] 10'868. francs per onn. Sche las entradas communablas ch'èn decisivas per fixar la tariffa importan passa 70'000. francs, na pon betg pli vegnir deducids tut ils custs da la tgira d'uffants.
Er sche tenor il rapport grischun da famiglia l'art. 7 al. 1 da la lescha menziunada duai vegnir abolì, vegnan las canortas d'uffants pitschens probablamain a resguardar vinavant la capacitad economica dals geniturs, per fixar las tariffas da la tgira d'uffants. Sch'ellas duessan chattar in'autra soluziun, vegnan ellas tuttina a fixar tariffas che cuvran lur custs.

Per cuntanscher ina imposiziun da taglia sin famiglias pli gista ed ina distgargia da la classa mesauna hai num suenter l'enconuschientscha da las cifras alarmantas en il rapport grischun da famiglia, en il qual igl è l'emprima finamira expressiva dal chantun Grischun cun sias annadas flaivlas da meglierar las cundiziuns generalas per augmentar il dumber da naschientschas d'ina vart da declerar ch'ils custs effectivs per la tgira d'uffants èn deducibels da l'entrada netta suttamessa a la taglia pli vastamain che quai ch'igl è oz il cas e da l'autra vart che la tgira d'uffants "entaifer la famiglia" na duai betg vegnir discriminada.

En vista als fatgs ch'èn vegnids constatads en il rapport grischun da famiglia e per obtegnair ina distgargia effectiva da las famiglias cun geniturs cun gudogn dubel envidan las sutsegnadras ed ils sutsegnaders la regenza da suttametter al cussegl grond in project per ina revisiun parziala da la lescha da taglia, en il qual bain en il rom dal concept da la lescha federala davart l'armonisaziun da la taglia directa dals chantuns e da las vischnancas igl è previs d'augmentar adequatamain las deducziuns per ils custs da la tgira d'uffants, las qualas vegnan fatgas sin las entradas nettas. En quest connex duai vegnir examinà a medem temp, sche la deducziun per uffants tenor l'art. 38 lit. d LT stoppia medemamain vegnir augmentada, cunzunt perquai che la tgira d'uffants cumplementara a la famiglia na dastga betg vegnir preferida a la tgira d'uffants "entaifer la famiglia".

Cuira, ils 6 da december 2007

Name: Tenchio, Pfäffli, Parolini, Arquint, Augustin, Barandun, Baselgia-Brunner, Berther (Sedrun), Bezzola (Samedan), Blumenthal, Bondolfi, Bucher-Brini, Caduff, Cahannes Renggli, Campell, Candinas (Rabius), Casparis-Nigg, Casty, Casutt, Caviezel (Pitasch), Caviezel-Sutter (Tusaun), Cavigelli, Claus, Dermont, Donatsch, Dudli, Fasani, Florin-Caluori, Figg-Walt, Gartmann-Albin, Giovanoli, Hardegger, Hartmann (Cuira), Hartmann (Champfèr), Jaag, Jäger, Kleis-Kümin, Koch, Kollegger, Krättli-Lori, Kunz, Loepfe, Menge, Meyer Persili (Cuira), Meyer-Grass (Claustra), Noi-Togni, Parpan, Pedrini, Peyer, Pfenninger, Pfiffner-Bearth, Plozza, Ragettli, Rathgeb, Righetti, Sax, Thomann, Thöny, Thurner-Steier, Trepp, Troncana-Sauer, Vetsch (Pragg-Jenaz), Brunold, Candinas (Mustér), Cattaneo, Hartmann (Küblis), Mainetti, Züst

Session: 06.12.2007
Vorstoss: rg Auftrag


Resposta da la regenza

Las duas incumbensas miran en la medema direcziun e cuntegnan per part las medemas pretensiuns, uschia che la regenza respunda las duas incumbensas en ina giada.

En l'ultima revisiun parziala da la lescha da taglia èn las deducziuns ch'èn relevantas per uffants vegnidas augmentadas fermamain. Questa revisiun parziala è entrada en vigur il 1. da schaner 2008. Las deducziuns per uffants èn vegnidas augmentadas da 3'400 francs sin 8'000 francs (per uffants da la vegliadetgna prescolara sin 5'000 francs) e la deducziun per la tgira d'uffants ordaifer la famiglia da 2'800 francs sin in import maximal da 6'000 francs. Plinavant èn la regenza ed il parlament s'occupads en la discussiun parlamentara davart il rapport da famiglia detagliadamain da la dumonda davart l'import dals supplements per uffants e per scolaziun, ed ha constatà ch'ils supplements da famiglia èn in instrument impurtant per cumpensar las grevezzas da las famiglias e pia in element impurtant da la politica da famiglia.

L'import dals supplements per uffants e per scolaziun na vegn betg reglà en la lescha davart ils supplements da famiglia (LSF), mabain en las disposiziuns executivas e la regenza è cumpetenta per el. La lescha federala davart ils supplements da famiglia (LSFam) prescriva supplements minimals da 200 respectivamain da 250 francs per mais. La finanziaziun correspundenta tras las patrunas e tras ils patruns pudess vegnir garantida ord la cassa chantunala da cumpensaziun per famiglias che surpigliass ina contribuziun dad 1.7% da las summas dal salari ch'èn suttamessas a la AVS.

Dapli supplements pretendan dapli contribuziuns da finanziaziun; quai è ina grevezza supplementara per l'economia. Per sustegnair e per promover famiglias cun uffants po la regenza s'imaginar d'augmentar ils supplements per uffants e per scolaziun sur las tariffas minimalas da la LSFam, e quai en il rom da 10%, pia sin 220 francs respectivamain sin 270 francs. La tariffa da contribuziun per la finanziaziun correspundenta sto vegnir fixada en quest cas sin circa 1.9% da las summas dal salari ch'èn suttamessas a la AVS. In grevezza anc pli severa na vegn betg en dumonda per la regenza, e quai en l'interess dal Grischun sco lieu economic.

Areguard las pretensiuns fiscalas constatescha la regenza expressivamain ch'ella è dal medem avis sco l'incumbensa Tenchio, tenor la quala i sto vegnir tegnì quint da l'effect progressiv da las tariffas fiscalas er cun resguardar ils custs dals uffants. Grazia al ferm augment da las deducziuns per uffants da l'ultima revisiun parziala ha il Grischun ina posiziun excellenta en la relaziun interchantunala. La gronda maioritad dals chantuns ha deducziuns per uffants sut 8'000 francs; mo dus chantuns han ina deducziun pli auta. A la regenza na pari perquai betg opportun d'augmentar questa deducziun anc ina giada, e quai pauc temp suenter l'ultima adattaziun. Percunter para la deducziun per uffants en scolaziun ordaifer d'esser memia bassa en cumparegliaziun cun ils custs effectivs. Sch'ins resguarda ils custs che resultan per las studentas e per ils students che dimoran al lieu da studi durant l'emna, para la deducziun actuala da 14'000 francs memia bassa. La regenza è pronta da proponer qua in augment sin 18'000 francs.

Ils custs da las canortas d'uffants pitschens e da las canortas d'uffants dependan da las entradas dals geniturs. Questa structura da tariffa è ina premissa per pudair survegnir subvenziuns. Geniturs cun grondas entradas e/u cun gronda facultad pajan perquai trais fin quatter giadas dapli en cumparegliaziun cun geniturs en relaziuns economicas modestas. En las taglias pon vegnir deducids ils custs effectivs fin ad in import maximal da 6'000 francs. Questa limita para memia bassa en cumparegliaziun cun la tariffa maximala ch'è detg auta. La regenza è pronta da proponer in augment sin 10'000 francs da l'import maximal per ils custs da la tgira d'uffants ordaifer la famiglia. Ina deducziun per la tgira d'uffants entaifer la famiglia na po percunter betg vegnir previsa. La lescha federala davart l'armonisaziun da la taglia directa dals chantuns e da las vischnancas na permetta betg ina tala deducziun. Plinavant è la regenza da l'avis ch'il dretg fiscal na saja betg il dretg lieu per vulair realisar finamiras extrafiscalas.

Resumond pon ins constatar che la regenza è pronta d'acceptar las duas incumbensas Cavigelli e Tenchio en il senn da las ponderaziuns. La realisaziun da las duas incumbensas po vegnir integrada en la revisiun currenta da la legislaziun davart ils supplements da famiglia resp. en la revisiun parziala da la lescha da taglia che duai vegnir dada en consultaziun l'atun 2008 ed entrar en vigur il 1-1-2010.

Datum: 28 da favrer 2008