Navigation

Inhaltsbereich

Dumonda Locher Benguerel concernent il deposit da las armas da servetsch militar en l'arsenal

Sessiun: 12.02.2008
Lingias grossas en ils meds da massa stampads e statisticas dals onns passads cumprovan cleramain: sche la disponibladad d'armas è memia facila, periclitescha quai la segirezza da l'uman. Armas na garanteschan betg dapli segirezza, anzi, savens èn ellas sezzas ina ristga per la segirezza. 60% dals mazzaments vegnan fatgs en il ravugl da la famiglia. Per 40% da quels vegnan duvradas armas da fieu. En spezial tar la violenza a chasa è la disponibladad d'armas da fieu in potenzial da smanatscha inacceptabel.
En quest connex tutga l'arma da servetsch militar tar las ristgas da segirezza las pli grondas da la Svizra. Da las circa 2,3 milliuns armas da fieu modernas ch'ins stima ch'ellas sa chattian en chasadas svizras è la part da las armas da servetsch militar tar 1,7 milliuns. 252 000 armas han las appartegnentas ed ils appartegnents da l'armada a chasa. 1,4 milliuns armas èn vegnidas surlaschadas ad anteriuras schuldadas ed ad anteriurs schuldads. La part la pli gronda da questas armas n'è registrada nagliur. En la situaziun da smanatscha actuala na datti strusch pli ina motivaziun militara per l'armada svizra per surdar l'arma d'ordonanza a sias appartegnentas ed a ses appartegnents per la tegnair en salv en la chasa privata.
La lescha militara prescriva en l'art. 112 che las appartegnentas e ch'ils appartegnents da l'armada stoppian procurar sezs per il deposit segir da lur equipament persunal. Ina segirezza ch'è cleramain meglra pudess dentant vegnir garantida, sche l'arma da servetsch militar vegniss depositada en localitads che vegnan messas a disposiziun spezialmain per quest intent en ils arsenals.
Il chantun Genevra preceda dapi il 1. da schaner 2008 cun il bun exempel. Appartegnentas genevrinas ed appartegnents genevrins da l'armada pon depositar lur arma gratuitamain en ina localitad segira da l'arsenal.
Il medem pass en direcziun d'in tractament segir da l'arma da servetsch militar duess – tenor l'opiniun da las sutsegnadras e dals sutsegnaders – er vegnir realisà en il chantun Grischun. Per quest motiv dumandain nus la regenza:

1. È la regenza pronta d'introducir svelt er en il chantun Grischun ina regulaziun correspundenta che permetta a las appartegnentas ed als appartegnents da l'armada da depositar lur arma da servetsch militar persunala facultativamain e gratuitamain en l'arsenal e da dar uschia in signal per dapli segirezza, en spezial per dunnas e per uffants?

2. Sa la regenza, tge che capita cun tut quellas armas (da servetsch militar) che na vegnan betg pli duvradas e che sa chattan en las chasadas svizras? È ella pronta da prender mesiras per rimnar las anteriuras armas d'ordonanza ed autras armas da fieu sco er la muniziun che sa chattan en possess privat e d'endrizzar posts da consegna correspundents?

Cuira, ils 12 da favrer 2008

Name: Locher Benguerel, Gartmann-Albin, Bucher-Brini, Arquint, Baselgia-Brunner, Bezzola (Samedan), Blumenthal, Bühler-Flury, Caduff, Candinas, Casparis-Nigg, Caviezel-Sutter (Tusaun), Christoffel-Casty, Conrad, Dermont, Florin-Caluori, Frigg-Walt, Gartmann-Albin, Jaag, Jäger, Jenny, Kessler, Kleis-Kümin, Krättli-Lori, Menge, Meyer-Grass, Noi-Togni, Peer, Perl, Pfäffli, Pfenninger, Pfiffner-Bearth, Tenchio, Thöny, Thurner-Steier, Trepp, Degiacomi, Grendelmeier, Monigatti, Wasescha

Session: 12.02.2008
Vorstoss: rg Anfrage


Resposta da la regenza

Tenor l'art. 60 al. 1 da la constituziun federala èn la legislaziun militara sco er l'organisaziun, l'instrucziun e l'equipament da l'armada chaussa da la confederaziun. Correspundentamain ha la confederaziun reglà il deposit da l'equipament persunal da las appartegnentas e dals appartegnents da l'armada (AdA) en ils art. 25 al. 1 lit. a e 112 da la lescha federala davart l'armada e l'administraziun militara. Uschia han las persunas ch'èn obligadas da far servetsch militar da procurar sezzas per il deposit segir e per il mantegniment da lur equipament persunal.

Las obligaziuns en connex cun il deposit da l'equipament persunal da las e dals AdA vegnan concretisadas en l'ordinaziun davart l'equipament persunal da las appartegnentas e dals appartegnents da l'armada (OEPA). Tenor l'art. 5 OEPA ston las ed ils AdA depositar lur equipament persunal per regla a lur domicil. Excepziunalmain pon las ed ils AdA depositar l'equipament u parts da tal ordaifer lur domicil u – pajond ina taxa – tar la basa da logistica da l'armada (BLA). Las excepziuns vegnan enumeradas en l'art. 6 en moda definitiva. Quai èn la dimora a l'exteriur, ina midada frequenta da domicil u il domicil a l'exteriur damanaivel dal cunfin.

Il dretg federal na cuntegna nagina disposiziun che pussibilitass a la u al AdA da depositar sia arma, sch'ella u sch'el è da l'avis ch'i saja nunpussaivel da depositar l'armas a ses domicil uschia, ch'ella è segira.
Ina gruppa da lavur ch'è vegnida nominada dal departament federal da defensiun, protecziun da la populaziun e sport examinescha actualmain, sch'i duain vegnir stgaffidas ulteriuras pussaivladads per depositar armas d'ordonanza.

Resposta a las dumondas

1. Na. Sin basa dal fatg ch'il dretg federal regla en moda definitiva il deposit da l'equipament persunal da las e dals AdA n'è il chantun betg autorisà da relaschar regulaziuns davart il deposit da l'arma da servetsch militar persunala.

2. La regenza na sa betg, tge che capita cun quellas armas (da servetsch militar) che na vegnan betg pli duvradas e che sa chattan en las chasadas svizras.

Probablamain a partir da l'atun 2008 pon persunas privatas – sa basond sin il nov art. 31a da la lescha federala davart las armas, ils accessoris d'armas e la muniziun – dar giu gratuitamain a la polizia chantunala armas, parts d'armas, accessoris d'armas, muniziun u elements da muniziun. Persunas che possedan ina permissiun per il commerzi cun armas pon profitar da questa pussaivladad pajond in taxa. Ils centers da logistica u ils posts da restabiliment da la BLA prendan gia oz en consegna armas da servetsch militar veglias, e quai senza cundiziuns.

Datum: 16 d'avrigl 2008