Navigation

Inhaltsbereich

Sessiun: 12.02.2008
Impressiunada da l'augment da violenza dals ultims onns en noss pajais – inclusiv en il Grischun – sun jau m'infurmada gia l'onn 2007 en la cumissiun dal cussegl grond per sanadad e fatgs socials areguard in'eventuala registraziun da datas davart vicxtimas da violenza en ospitals grischuns. Quella giada na saveva nagin precisamain, sch'ina tala mesira vegnia prendida u betg.
Oz èn avant maun intginas infurmaziuns dapli. En quest connex pon ins intervegnir ch'igl èn avant maun studis (universitad da Turitg) e retschertgas ("Inselspital" a Berna). Retschertgas da blessuras tras acts da violenza vegnan fatgas en il center d'ospitals a Bienna (mo violenza da giuvenils), en l'ospital chantunal a Lucerna ed en auters ospitals en Svizra. Sin basa da questas retschertgas ha l'ospital chantunal a Lucerna schizunt pudì far in profil davart la delinquenta u davart il delinquent. L'ospital chantunal dal Grischun na registrescha naginas datas davart las victimas da violenza che vegnan tractadas.
Registraziuns da datas èn en general indicaturs impurtants per mussar tendenzas sco er per determinar ils stadis effectivs ed ils stadis previs, quai che po esser fitg util en il sectur da la prevenziun tar problematicas difficilas. Ina tala è segiramain la spirala sociala da violenza ch'è daventada pli intensiva e pli privlusa ils ultims onns (cf. cas letals, blessuras dal chau e.u.v.). Guardar davent e banalisar è – tenor l'avis da las expertas e dals experts – il mender ch'ins po far. Er la politica è dumandada.

Sin basa da questas explicaziuns tschent jau las suandantas dumondas a la regenza:

– È la regenza da l'avis ch'i saja cumplitgà, absurd, deplazzà e char d'introducir ina registraziun da datas davart victimas da violenza (mintga gener da violenza e mintga victima) en ospitals grischuns (sut la responsabladad da l'ospital chantunal dal Grischun)?

– Sche quai fiss uschia, na pudess la regenza betg sa laschar cussegliar en questa chaussa impurtanta tras persunas ch'èn expertas en la problematica da la violenza?

– Vuless la regenza sa laschar renfatschar ch'ella saja stada inactiva, sch'i dess in eventual cas letal (cf. eveniments a Locarno)?

– Co è organisada la collavuraziun tranter ils ospitals, la polizia e las autoritads en cas da violenza?

Cuira, ils 12 da favrer 2008

Name: Noi-Togni, Bucher-Brini, Niederer, Arquint, Casutt, Florin-Caluori, Frigg-Walt, Gartmann-Albin, Jaag, Jäger, Kleis-Kümin, Koch, Mengotti, Pfiffner-Bearth, Trepp, Locher Benguerel


Session: 12.02.2008
Vorstoss: rg Anfrage



Resposta da la regenza

Tenor l'avis da la regenza duessan datas vegnir registradas mo, sche la registraziun da questas datas è cumbinada cun in niz. Tar la registraziun da datas che vegn prendida en mira en ils ospitals grischuns stuess resultar in niz cunzunt per la lavur da la polizia, per che questa registraziun possia vegnir legitimada. In tal niz stuess eventualmain esser quel ch'i pudessan – sin basa da las datas registradas – vegnir fatgs profils davart las delinquentas e davart ils delinquents, e quai profils ch'èn tipics per la societad u specifics per in cas. Profils davart las delinquentas e davart ils delinquents ch'èn specifics per in cas pon dentant vegnir fatgs gia oz sin basa da las infurmaziuns ch'èn avant maun (uschenumnà profiling). Tals profils davart las delinquentas e davart ils delinquents vegnan dentant fatgs da criminalistas e da criminalists spezialisads (e betg dals ospitals), e quai mo, sch'i ston vegnir tschertgads delinquentas e delinquents nunenconuschents che han commess grevs delicts da violenza en seria. Per regla e tenor las experientschas sa tracti tar delicts da violenza dentant da delicts da relaziuns, nua che las delinquentas ed ils delinquents èn enconuschents. Da la registraziun da datas che vegn prendida en mira davart victimas da violenza en ils ospitals grischuns na resultass pia nagin niz per la polizia areguard il scleriment da delicts da violenza. Or dal puntg da vista da la polizia na resultass er nagin niz, sche questas datas permettessan da far profils davart las delinquentas e davart ils delinquents ch'èn tipics per la societad. En la lavur poliziala da prevenziun n'ha la polizia numnadamain naginas pussaivladads da trair a niz en il cas singul concret eventuals profils davart las delinquentas e davart ils delinquents ch'èn tipics per la societad e ch'èn vegnids fatgs sin basa da la registraziun da datas en ils ospitals.

La dumonda qua avant maun vegn motivada en spezial cun las retschertgas e cun ils studis ch'èn vegnids fatgs da differents ospitals. Questas retschertgas e quests studis han per part cuntanschì ina gronda publicitad. Che questas retschertgas e che quests studis avessan gì in niz concret, n'è betg enconuschent fin oz.

La regenza respunda las dumondas sco suonda:

1. La regenza è da l'avis ch'i na saja betg cunvegnent da registrar datas davart victimas da violenza en ils ospitals grischuns, perquai ch'i na pon vegnir tratgas naginas conclusiuns directas or da las datas per la lavur da la polizia. La registraziun da datas è ultra da quai colliada cun fitg blera lavur e cun custs considerabels. Ils custs da la registraziun da datas vegnan calculads mo da l'ospital chantunal dal Grischun cun var 300'000 francs per onn.

2. En cas da basegn è la regenza pronta da sa laschar cussegliar d'expertas e d'experts davart la problematica da la violenza. Tar questas expertas e tar quests experts tutga en emprima lingia la polizia chantunala. Per il mument è la regenza da l'avis ch'i na saja betg necessari da consultar ulteriuras expertas ed ulteriurs experts.

3. La dumonda sa basa sin in connex tranter in eventual cas letal e la nunregistraziun da datas davart victimas da violenza en ils ospitals grischuns. Quest connex n'è betg suandabel per la regenza.

4. La collavuraziun tranter ils ospitals resp. tranter las medias ed ils medis d'ina vart e la polizia da l'autra vart è reglada en l'ordinaziun davart la collavuraziun da las persunas medicinalas en la procedura penala (DG 350.070). Tenor questa ordinaziun exista in'obligaziun d'annunzia da la media u dal medi en cas da mortoris extraordinaris ed in dretg d'annunzia en cas da blessuras che laschan concluder sin in delict u sin in crim, quai ch'è p.ex. inditgà en cas da plajas pervia da sajettadas u pervia da furadas u en cas da blessuras vi d'uffants. Sin dumonda è la media u il medi plinavant obligà da dar perditga u rapport a las autoritads da persecuziun penala.

Datum: 23 d'avrigl 2008