Navigation

Inhaltsbereich

Sessiun: 12.02.2008
En il rom da las proximas refurmas da scola vegn la regenza incumbensada d'installar ina scola internaziunala en la Val dal Rain grischuna.

En collavuraziun cun l'uffizi per economia e turissem (UET) fa il chantun grondas stentas per domiciliar firmas cun gronda valur agiuntada en questa regiun. Talas firmas èn per regla orientadas a l'export ed èn activas en il sectur da la hightec. Grazia a la vischinanza da Turitg, a la buna qualitad da viver ed ad in clima favuraivel s'interessan fitg bleras firmas per la Val dal Rain grischuna sco plazza economica. Igl è en quel senn er reussì da domiciliar qua differentas interpresas. Talas firmas èn però dependentas da spezialistas e da spezialists cunzunt per sviluppar novs products. Inschigneras ed inschigners fitg qualifitgads n'èn però betg da chattar sin il martgà da lavur regiunal u naziunal, mabain sin il pli ordaifer l'Europa (America/Asia). La mobilitad da talas persunas è per regla fitg gronda ed ellas stattan cun lur famiglias tar nus sin il pli in per onns tar nus e van alura puspè vinavant u turnan en lur patria. Ellas n'han betg la pussaivladad da laschar ir qua lur uffants en la scola populara. Nus purschain bain classas che vegnan manadas per englais en il sectur da las scolas professiunalas e da las scolas autas professiunalas a la scola auta da tecnica ed economia (SATE), ma sin il stgalim da la scola populara na vegnan betg purschidas classas separadas en englais u en tudestg-englais. Ina tala purschida na rinforzass consequentamain betg mo la SATE e la scola d'hotellaria, ella fiss er abla da concurrer cun autras plazzas economicas. A Buchs SG ed a Triesen FL vegnan manadas talas scolas cun success. Ellas han contribuì per gronda part che la Val dal Rain songagliaisa è daventada ina plazza economica per manaschis da hightec. Nus supplitgain il chantun da fundar – ensemen cun ils circuls interessads – ina scola internaziunala, en la quala l'instrucziun vegn manada mo en englais u en englais-tudestg.

Cuira, ils 12 da favrer 2008

Name: Tscholl, Kunz, Loepfe, Berni, Bezzola (Zernez), Bleiker, Bondolfi, Brandenburger, Brüesch, Buchli, Bühler-Flury, Bundi, Butzerin, Caduff, Cahannes Renggli, Campell, Candinas, Casparis-Nigg, Caviezel-Sutter (Tusaun), Christoffel-Casty, Conrad, Donatsch, Federspiel, Felix, Feltscher, Florin-Caluori, Giovanoli, Hardegger, Hartmann (Cuira), Hasler, Kessler, Kollegger, Mani-Heldstab, Möhr, Nick, Niederer, Nigg, Parolini, Parpan, Pedrini, Peer, Perl, Pfäffli, Pfister, Portner, Quinter, Ragettli, Ratti, Sax, Stiffler, Tenchio, Vetsch (Claustra Vitg), Wettstein, Furrer-Cabalzar, Grendelmeier, Hartmann (Küblis), Schädler, Wasescha

Session: 12.02.2008
Vorstoss: rg Auftrag


Resposta da la regenza

Per rinforzar la Val dal Rain grischuna sco plazza economica duai la regenza survegnir cun questa intervenziun l'incumbensa d'installar ina scola internaziunala en questa regiun.

En ils gronds centers economics (Genevra, Losanna, Berna, Basilea, Turitg, Winterthur e.u.v.) datti gia dapi onns scolas internaziunalas. Il public en mira da questas scolas èn famiglias da l'exteriur che van da pajais a pajais suenter las obligaziuns professiunalas dals geniturs e stattan temporarmain en Svizra. Als uffants da questas famiglias duai vegnir purschì sin tut ils stgalims da scola pussaivels ina scolaziun internaziunala che po vegnir cuntinuada en mintga autra scola internaziunala sin l'entir mund e nua ch'i po vegnir fatg in diplom ch'è valaivel sin plaun internaziunal. Per che quai saja pussaivel correspundan ils plans d'instrucziun da las scolas internaziunalas cuminaivlamain al "International-Baccelaureate-Curriculum (IB)". Las purschidas dal IB existan dal "Primary Years Programme" (a partir da 3 onns) fin tar il "IB-Diploma Programme" (che vegn fatg cun 19 onns). Ils examens dals diploms IB pon vegnir fatgs ozendi en englais, en franzos ed en spagnol. En ina scola da IB è ina da questas linguas la lingua d'instrucziun. Scolas internaziunalas èn scolas privatas. Finanziadas vegnan ellas per gronda part da contribuziuns dals geniturs e da las firmas. Perquai che questas scolas valan pli e pli sco facturs impurtants dal lieu, vegnan ellas l'ultim temp sustegnidas – en il senn da la promoziun da l'economia – er da singuls chantuns da staziunament, e quai cun emprests da daners cun tschains favuraivels, cun contribuziuns per renovaziuns e per construcziuns novas, cun garanzias da deficit e.u.v.

La scola internaziunala Val dal Rain (SIVR) a Buchs/SG, menziunada en l'intervenziun, è vegnida fundada l'onn 2002. Lur purschida sa drizza en emprima lingia als uffants da persunas da cader sco er da spezialistas e da spezialists che lavuran en la Val dal Rain da Son Gagl, en il Vorarlberg, en il Liechtenstein u che abitan a la riva tudestga dal Lai da Constanza e che lavuran en interpresas cun colliaziuns internaziunalas.

Pli e pli dumandadas èn dentant er scolas bilinguas. Entant che scolas internaziunalas sa drizzan oravant tut ad uffants da famiglias da l'exteriur che abiteschan mo per curt temp en Svizra, è il public en mira da las scolas bilinguas spezialmain las famiglias indigenas. Adina daplirs geniturs tschertgan instituts da scola privats per lur uffants. Er tar la scola "formatio" a Triesen FL, che vegn menziunada en l'intervenziun, sa tracti d'ina scola bilingua privata. Ella consista d'ina scola primara e d'in scola secundara che sa drizzan omaduas tenor ils plans d'instrucziun uffizials dal Liechtenstein. La scola privata da Triesen vegn manada en moda bilingua (tudestg-englais) ed è – areguard la cumbinaziun da las linguas d'instrucziun – cumparegliabla cun las scolas bilinguas (rumantsch-tudestg) da l'Engiadin'ota. Cuntrari a la scola "formatio" a Triesen na vegnan las bleras scolas bilinguas privatas en Svizra betg sustegnidas dal stadi ed èn uschia avertas oravant tut a famiglias bainstantas.

Sin fundament da la legislaziun da scola actuala n'èsi betg pussaivel d'installar en il chantun ni scolas internaziunalas ni scolas bilinguas en il senn da l'intervenziun. Tenor l'art. 3 al. 2 da la lescha da scola valan per las scolas privatas, cun excepziun da las disposiziuns davart las persunas d'instrucziun sco er davart las obligaziuns da las vischnancas e davart la finanziaziun, las disposiziuns da questa lescha confurm a lur senn. Quai ha tranter auter la consequenza che l'instrucziun sto vegnir dada en las scolas privatas che sa chattan en il chantun – sco en las scolas popularas – en ina lingua chantunala. Per prender sco lingua d'instrucziun l'englais u in'autra lingua che n'è betg lingua chantunala manca la basa legala.

La regenza è da l'avis ch'i na saja er en l'avegnir betg sia lavur d'installar e da manar sezza scolas internaziunalas, e quai ni en la Val dal Rain ni en auters lieus. Ella va però d'accord che tar la proxima revisiun totala da la lescha da scola stoppia vegnir creada la basa che pussibilitescha d'installar scolas internaziunalas sco scolas privatas. Er la dumonda, sche, ed en tge furma che la cumbinaziun da las linguas en scolas bilinguas po vegnir extendida sur las linguas chantunalas ora senza sutminar tras quai il fundament da la scola populara grischuna, sto vegnir examinada en il rom da la revisiun da la lescha. La regenza propona d'acceptar questa incumbensa en il senn da las explicaziuns.

Datum: 6 da matg 2008