Dumonda Pfäffli concernent l'imposiziun da taglia sin la valur da l'atgna locaziun en connex cun il plan directiv regiunal "construcziun d'abitaziuns secundaras" en il circul da l'Engiadin'ota
Sessiun: 21.04.2008
L'art. 22 da la lescha da taglia (LT) regla per il chantun Grischun il princip, che la valur da l'atgna locaziun stoppia correspunder a la valur dal martgà. L'art. 22 al. 5 LT fixescha ultra da quai che la valur da locaziun dal martgà stoppia er esser ina basa per l'imposiziun, sch'igl è cunvegnì tranter duas persunas che stattan datiers ina a l'autra in tschains da locaziun che divergescha considerablamain da la valur da locaziun dal martgà.
En quest connex sto il plan directiv regiunal "construcziun d'abitaziuns secundaras" en il circul d'Engiadin'ota – che vegn ad ir en vigur – anc vegnir sclerì. Quest plan directiv vegn numnadamain a differenziar en l'avegnir tranter abitaziuns principalas, abitaziuns secundaras ed uschenumnadas abitaziuns dal dretg vegl. Tenor l'art. 2 al. 2 dal plan directiv regiunal "construcziun d'abitaziuns secundaras" valan en quest connex tut las surfatschas d'abitar ch'èn vegnidas permessas avant il relasch da las mesiras communalas per promover la construcziun d'abitaziuns principalas e per restrenscher la construcziun d'abitaziuns secundaras en la vischnanca respectiva sco abitaziuns dal dretg vegl. Sco las abitaziuns secundaras, na suttastattan questas abitaziuns dal dretg vegl a naginas restricziuns d'utilisaziun.
Il medem mument vegn – sin fundament da las regulaziuns da contingentaziun ch'existan ussa en la gronda part da las vischnancas da l'Engiadin'ota e ch'èn previsas per il circul – la purschida d'abitaziuns secundaras pli e pli stgarsa e l'augment massiv dals pretschs vegn a cuntinuar. Per consequenza na s'augmenta betg mo il squitsch da la retschertga, mabain spezialmain er il squitsch dals custs resp. da la taglia sin las uschenumnadas abitaziuns dal dretg vegl ed uschia sin las abitaziuns senza chargias. Sch'ins analisescha numnadamain la situaziun effectiva sin il martgà d'immobiglias da l'Engiadin'ota, pon ins constatar che tranter las abitaziuns secundaras dad ina vart e las abitaziuns principalas da l'autra vart exista ina differenza da pretsch da fin 50%. Quest svilup è fatal, perquai che las abitaziuns dal dretg vegl, ch'èn praticamain messas a pèr cun las abitaziuns secundaras, vegnan duvradas gia dapi decennis da la populaziun indigena u ch'ellas vegnan dadas a fit a persunas che stattan datiers. Quest squitsch dals custs resp. da la taglia che s'augmenta pli e pli en il segment dal martgà da las abitaziuns dal dretg vegl vegn en consequenza ad effectuar che las abitaziuns dal dretg vegl vegnan duvradas sfurzadamain adina pli savens sco abitaziuns secundaras. Il medem mument vegn la populaziun indigena a sa chasar pli e pli en zonas spezialas nua ch'i vegnan construidas unicamain abitaziuns per persunas indigenas u ch'ella sto perfin bandunar la regiun.
A quest svilup sto vegnir fatg frunt. Perquai supplitgain nus la regenza da respunder las suandantas dumondas:
1. È la regenza er da l'avis che las uschenumnadas abitaziuns dal dretg vegl (abitaziuns senza chargias) stuessan vegnir resguardadas resp. valitadas areguard la taglia sco abitaziuns principalas, uschenavant ch'ellas vegnan duvradas da persunas indigenas, q.v.d. da persunas cun domicil da dretg civil en il senn da l'art. 23 CCS.
2. Vesa la regenza – eventualmain sco alternativa – ina pussaivladad da prevair per las abitaziuns dal dretg vegl ina reducziun da la valur da l'atgna locaziun en il senn da l'art. 22 al. 4 LT (regulaziun da cas da direzza)?
3. Cun tge ulteriuras pussaivladads dal sistem da taglia pudess il chantun avair tenor la regenza ina influenza sin il svilup skizzà qua survart?
Cuira, ils 21 d'avrigl 2008
Name: Pfäffli, Bezzola (Samedan), Hartmann (Champfèr), Perl
Session: 21.04.2008
Vorstoss: rg Anfrage
Resposta da la regenza
Il plan directiv vegn ad effectuar che ultra da l'augment dals pretschs da las abitaziuns secundaras vegnan a s'augmentar considerablamain er ils pretschs dal martgà da las abitaziuns principalas. En quest connex ston ins menziunar che pervia da la stgarsadad d'abitaziuns secundaras s'augmenta er il squitsch sin l'uschenumnà spazi d'abitar senza chargias che vegn utilisà per gronda part da la populaziun residenta. In'autra situaziun chattain nus tar ils tschains da locaziun da las abitaziuns. Quels suttastattan al dretg da locaziun e na pon betg vegnir augmentads senz'auter tenor ils pretschs da vendita. Las retschertgas ch'ils organs da stimaziun fan permanentamain davart las abitaziuns che vegnan dadas a fit mussan er en la regiun da l'Engiadina'ota cleramain che l'augment dals pretschs en quest sectur correspunda al svilup normal dal tschains da locaziun. Areguard la concepziun dals pretschs per la valur commerziala e per il tschains da locaziun/la valur da l'atgna locaziun pon ins discurrer da dus differents martgads che funcziunan tenor agens mecanissems. Il svilup da las valurs da facultad na chaschuna pia da princip betg in augment correspundent direct da las valurs da l'atgna locaziun.
Dumonda 1
Las valurs da stimaziun ston s'orientar al martgà (art. 7 al. 1 da la lescha davart las stimaziuns publicas). Perquai vegnan er las valurs da l'atgna locaziun da las abitaziuns principalas stimadas sin basa da las datas d'abitaziuns cumparegliablas che vegnan dadas a en locaziun permanentamain. Questas valurs da cumparegliaziun suttastattan a las restricziuns dal dretg da locaziun e na pon betg vegnir auzadas sco ch'i para e plascha. Sin fundament da questa lescha ston tut las abitaziuns vegnir valitadas e stimadas tenor ils medems princips e tenor ils medems criteris. La dumonda po vegnir affirmada en quest senn.
Dumonda 2
L'art. 22 al. 4 da la lescha da taglia per il chantun Grischun è vegnì integrà a chaschun da l'ultima revisiun parziala en la lescha da taglia. El serva a reducir la valur da l'atgna locaziun suttamessa a la taglia, sche l'import da quella è fitg grond en relaziun cun las entradas en daner blut e po chaschunar problems da liquiditad. Il legislatur aveva en quest connex en mira persunas pensiunadas che disponan d'ina auta valur da l'atgna locaziun e che han relativamain paucas entradas en daner blut (cf. carnet da missivas nr. 10/2006-2007, p. 1188). Questa regulaziun na po ussa betg vegnir duvrada per curreger las valurs da l'atgna locaziun che correspundan als pretschs dal martgà en las singulas regiuns. Ultra da quai prescriva la lescha federala davart l'armonisaziun da la taglia directa dals chantuns e da las vischnancas ina imposiziun d'almain 60% dal pretsch da locaziun sin il martgà. Uschia vegn il spazi d'agir dal legislatur chantunal restrenschì. La regenza na vesa perquai nagina alternativa per crear in'ulteriura pussaivladad da reducir la valur da l'atgna locaziun per abitaziuns dal dretg vegl.
Dumonda 3
Sa basond sin la restricziun menziunada da la lescha d'armonisaziun da taglia na vesa la regenza en general nagina pussaivladad da schliar quest problem en il dretg fiscal. Ultra da quai na pudess ina tala differenziaziun strusch vegnir realisada en la pratica, sche regulaziuns sumegliantas vegnissan introducidas en differentas regiuns u en differentas vischnancas. Quest pensar cuntradi er a la pretensiun da simplifitgar il dretg fiscal, e quai è gia motiv avunda per al refusar. E la finala mussa la resposta a la dumonda 1 ch'i mancass ina motivaziun objectiva per ina mesira correspundenta.
Datum: 2 da fanadur 2008