Dumonda Conrad concernent la carta europeica d'armas – essan nus pronts?
Sessiun: 23.04.2008
Tenor il conclus dal cussegl federal vegn la Svizra a realisar las cunvegnas da Schengen per il 1. da november 2008. Tranter auter duai er vegnir introducida la carta europeica d'armas en Svizra. Questa carta duai vegnir emessa dals uffizis d'armas chantunals ed è previsa per tiraduras e per tiradurs da sport sco er per chatschadras e per chatschaders che han l'intenziun da viagiar cun lur armas en in pajais da la UE.
Sin fundament da las infurmaziuns ch'ans vegnan dadas da CHATSCHA Svizra ston persunas interessadas inoltrar a l'uffizi d'armas chantunal ina dumonda correspundenta cun ils suandants documents:
- in extract dal register penal central svizzer ch'è vegnì emess maximalmain trais mais avant l'inoltraziun da la dumonda;
- ina copia dal passaport u da la carta d'identitad e
- duas fotografias da passaport actualas.
En vista a l'entrada en vigur da questas novas disposiziuns dumondan las sutsegnadas ed ils sutsegnads, sch'il chantun Grischun è pront per la realisaziun da questa cunvegna da Schengen.
Per quest motiv faschain nus las suandantas dumondas a la regenza:
1. Èsi vair ch'ils chantuns ston esser en il cas d'emetter la carta europeica d'armas a partir dal 1. da november 2008? Sche gea: vegn surdada questa incumbensa ad in uffizi d'armas chantunal?
2. Correspundan las modalitads ch'èn vegnidas menziunadas qua survart a las pretensiuns u ston vegnir ademplidas ulteriuras premissas? Sche gea, tgeninas?
3. Tge prescripziuns resp. tge restricziuns ston vegnir observadas per il transport d'armas, sche la chatschadra resp. sch'il chatschader u sche la tiradura resp. sch'il tiradur posseda la carta europeica d'armas?
4. Cun tge custs stoi vegnir fatg quint per l'emissiun d'ina carta d'armas?
5. È il chantun Grischun pront per l'emissiun da la carta europeica d'armas il 1. da november 2008?
Cuira, ils 23 d'avrigl 2008
Name: Conrad, Barandun, Berther (Mustér), Bezzola (Zernez), Bleiker, Campell, Casty, Geisseler, Hartmann (Champfèr), Keller, Kessler, Michel (Tavau-Monstein), Möhr, Parolini, Peer, Ragettli, Ratti, Thomann, Grass
Session: 23.04.2008
Vorstoss: rg Anfrage
Resposta da la regenza
1. Gea, il chantun Grischun vegn ad esser en il cas d'emetter a partir dal 1. da november 2008 la carta europeica d'armas da fieu. L'execuziun e la realisaziun dal nov dretg davart las armas vegn ad esser chaussa dal post spezialisà per armas tar la polizia chantunala. Sa basond sin l'art. 3 da las disposiziuns executivas tar l'ordinaziun executiva dal cussegl grond tar la lescha federala davart las armas, ils accessoris d'armas e la muniziun è quest post spezialisà l'autoritad chantunala cumpetenta per exequir la lescha davart las armas, l'ordinaziun davart las armas e lur reglaments.
2. Cun inoltrar il formular da dumonda declera la petenta u il petent da betg esser mess sut avugadia, da betg avair ina malsogna che fiss ina ristga augmentada per la manipulaziun d'armas, sco p.ex. la dependenza da medicaments, d'alcohol u da narcotics. A medem temp vegn l'autoritad cumpetenta autorisada da verifitgar las infurmaziuns.
A la dumonda ston vegnir agiuntads: in extract dal register penal central svizzer ch'è vegnì emess il pli tard trais mais avant l'inoltraziun da la dumonda, ina copia dal passaport u da la carta d'identitad sco er duas fotografias da passaport actualas.
La carta europeica d'armas da fieu vala tschintg onns. La valaivladad po vegnir prolungada duas giadas per mintgamai dus onns.
3. I dastgan vegnir prendidas cun sai mo armas ch'èn inscrittas en la carta europeica d'armas da fieu e la muniziun respectiva. Las armas ston vegnir transportadas betg chargiadas. Il magasin sto vegnir allontanà. Las ulteriuras disposiziuns dal pajais da destinaziun respectiv ston vegnir scleridas ordavant tar l'autoritad cumpetenta da l'exteriur.
4. Tenor il sboz da consultaziun tar l'ordinaziun davart las armas vegn la taxa per l'emissiun da la carta europeica d'armas da fieu probablamain ad importar 150.– francs, per la prolungaziun 100.– francs e per l'inscripziun da novas armas 50.– francs.
5. Il post spezialisà per armas tar la polizia chantunala è pront per l'emissiun da la carta europeica d'armas da fieu. La realisaziun da la revisiun parziala da la lescha davart las armas, da l'ordinaziun davart las armas e da la cunvegna da realisaziun da Schengen vegn a chaschunar incumbensas supplementaras per il post spezialisà, e quai tras las dumondas da permissiun d'acquistar armas, tras l'obligaziun d'annunzia da la possessura u dal possessur da l'arma, tras l'obligaziun d'annunzia dal passadi d'armas tenor in contract en scrit e tras l'emissiun da las cartas europeicas d'armas da fieu.
Datum: 3 da fanadur 2008