Navigation

Inhaltsbereich

Sessiun: 10.06.2008

Tenor la repartiziun da las cumpetenzas ch'è determinada en la constituziun federala èn las documentaziuns publicas chaussa dals chantuns. Concernent ils fatgs da notariat è il chantun Grischun sa decidì per in sistem maschadà tranter il notariat uffizial ed il notariat professiunal. Sco persunas da notariat en il senn da la lescha chantunala davart il notariat valan pia (a) las notaras patentadas ed ils notars patentads, (b) las notaras cirquitalas ed ils notars cirquitals e (c) las administraturas ed ils administraturs dal register funsil sco er lur substitutas e lur substituts. Las cumpetenzas da questas persunas da notariat sa differenzieschan en plirs reguards. Uschia èn las administraturas ed ils administraturs dal register funsil cumpetents per la documentaziun publica d'acts giuridics concernent ils bains immobigliars en lur circuls da register funsil. Questas documentaziuns publicas pon dentant vegnir fatgas er da las notaras patentadas e dals notars patentads (per l'entir territori chantunal) sco er da las notaras cirquitalas e dals notars cirquitals (per il territori cirquital respectiv).
Per lur activitad en connex cun ils dretgs reals immobigliars èn las persunas da notariat dependentas da las descripziuns dals bains immobigliars sco quai ch'ellas èn actualmain cuntegnidas en il register funsil (extracts dal register funsil). En il register da commerzi pon vegnir clamads giu extracts actuals en furma electronica. Quai è ina facilitaziun da la lavur tant per las partidas che dumondan la documentaziun publica sco er per l'uffizi sez, perquai che almain in pass da lavur sco er la correspundenza inutila n'èn betg pli necessaris qua tras. L'experientscha cun quest instrumentari ha mussà dad omaduas varts ina gronda effizienza e blera satisfacziun. I n'è betg chapibel, pertge che quest med d'agid electronic na duess betg er pudair vegnir applitgà en il register funsil, cunquai ch'i vegnissan distgargiads gist ils uffizis dal register funsil ch'èn per regla surchargiads. Vitiers vegni che tant las notaras patentadas ed ils notars patentads sco er las notaras cirquitalas ed ils notars cirquitals avessan en maun ils extracts dal register funsil ch'els dovran per exequir lur funcziun en moda conscienziusa, e quai senza ch'ellas e ch'els perdian temp u hajan lavur ed expensas supplementaras, che ston la finala vegnir adossadas a las partidas che dumondan la documentaziun publica. Betg sco ultim survegnissan er tut las persunas da notariat en il chantun Grischun las medemas premissas, cunquai che las administraturas ed ils administraturs dal register funsil han – sin basa da lur uffizi – gia oz access direct e gratuit a tut las inscripziuns en il register funsil.

Sin basa dals motivs numnads qua survart vegn la regenza incumbensada da stgaffir la basa legala che pussibilitescha a tut las funcziunarias ed a tut ils funcziunaris da documentaziun publica en il chantun d'acceder directamain e gratuitamain a tut las inscripziuns en il register funsil. Durant ina fasa transitorica ston ils extracts dal register funsil almain vegnir tramess svelt e gratuitamain a las persunas da notariat per posta u sin via electronica, fin che l'access direct è implementà.

Cuira, ils 10 da zercladur 2008

Bondolfi, Kunz, Augustin, Berther (Sedrun), Bezzola (Samedan), Blumenthal, Bundi, Caduff, Cahannes Renggli, Candinas, Claus, Fallet, Hartmann (Cuira), Jenny, Keller, Kessler, Niederer, Parolini, Peyer, Plozza, Portner, Righetti, Tenchio, Tuor, Furrer-Cabalzar, Patt, Pedrini (Soazza)

Session: 10.06.2008
Vorstoss: rg Auftrag

Resposta da la regenza

Tenor l'art. 111m al. 1 lit. a da l'ordinaziun federala concernent il register funsil (CS 211.432.1) pon ils chantuns conceder a las funcziunarias ed als funcziunaris da documentaziun – en la procedura d'invista – l'access a las datas ch'èn disponiblas tenor l'art. 111i. Per quest intent ston ils chantuns far cunvegnas cun las utilisadras e cun ils utilisaders confurm al model obligatoric da l'uffizi federal per dretg dal register funsil e per dretg funsil (al. 4). L'art. 35 al. 3 da l'ordinaziun chantunala dal register funsil (OCRF; DG 217.100) prevesa che funcziunarias e che funcziunaris da documentaziun dastgan sa procurar mo indirectamain las datas ch'ellas e ch'els basegnan per ademplir lur incumbensas. Las taxas che vegnan incassadas per in extract dal register funsil sa drizzan tenor l'art. 18 da l'ordinaziun davart las taxas dals uffizis dal register funsil (DG 217.200).

En il chantun Grischun existan trais sistems electronics per manar il register funsil (Capitastra, Terris, ISOV). Tar ils uffizis dal register funsil che han installà il register funsil electronic fissi tecnicamain gia oz pussaivel da realisar l'access individual, dentant mo a datas dal register principal ch'èn registradas en moda electronica, e mo en il circul da register funsil respectiv.

Tar la confederaziun vegni actualmain elavurà in project "eGRIS", cun il qual l'informatica dal register funsil duai vegnir armonisada en l'entira Svizra, e quai previsiblamain per l'onn 2011. Qua tras oblighescha la confederaziun ils chantuns da metter a disposiziun a vista mesauna datas electronicas dal register funsil per in sistem d'invista naziunal. I vegn elavurada ina interfatscha che definescha in model da datas unitar per ils differents sistems electronics dal register funsil. Questa interfatscha pussibilitescha da colliar ils differents sistems en la procedura d'invista, e quai er cun l'intent d'avair in access unitar en l'entira Svizra (www.egris.ch). En enconuschientscha da las activitads sin plaun federal è la regenza da l'avis ch'i saja – cunzunt per motivs da custs – sproporziunà da sviluppar ina soluziun praticamain identica per in'atgna procedura d'invista en il chantun Grischun. Perquai duai vegnir desistì per il mument da stgaffir ina basa legala chantunala che permettess a las persunas da notariat – sco dal rest er a l'ulteriura clientella dal register funsil (bancas, autoritads e.u.v.) – d'avair access direct a las datas dal register funsil en la procedura d'invista.

Per ils medems motivs stoi vegnir refusà per il mument da far midadas en l'ordinaziun davart las taxas dals uffizis dal register funsil per tscherta clientella (en quest cas per las persunas da notariat) u – sco ch'i vegn pretendì en l'incumbensa – da trametter gratuitamain ils extracts dal register funsil a las persunas da notariat, fin che l'access direct è implementà. La dumonda da las taxas per infurmaziuns da tut gener sur l'internet sto vegnir reglada da nov en il rom da la realisaziun dal project "eGRIS". Quant enavant che las taxas duain p.ex. vegnir regladas tut tenor il gener da la fatschenta (p.ex. exemziun da taxas per infurmaziuns restrenschidas che vegnan dumandadas en moda anonima, incassament da taxas per ulteriuras autorisaziuns d'access u per la procedura d'invista), sto vegnir discutà en il rom da quest project. Gia oz poi dentant vegnir ditg ch'i avess consequenzas per las cassas dals circuls da register funsil, sch'il chantun desistiss d'incassar taxas. Percunter ston ins partir dal fatg ch'i vegnian en mintga cas incassadas taxas per retrair datas sur il pool da datas centralas che duai vegnir creà da nov. Uschia menziunescha il rapport da la confederaziun dals 11 da favrer 2008 che la retratga da las datas centralas dal register funsil (che vegnan consolidadas pli tard) saja ina prestaziun da servetsch che chaschunia custs da realisaziun e da manaschi. Perquai saja necessari d'agiuntar ina summa fixa a las taxas chantunalas, e quai per concepir il manaschi da quest sistem uschia ch'el portia sasez resp. per amortisar las investiziuns fatgas.

Considerond ils svilups sin plaun federal è la regenza pronta d'acceptar l'incumbensa e d'examinar la dumonda da las taxas en general, ma er en spezial per las persunas da notariat, e quai en il rom da la realisaziun dal project "eGRIS" che pussibilitescha a las persunas da notariat l'access direct al register funsil.

10 da settember 2008