Navigation

Inhaltsbereich

Dumonda Righetti concernent l'augment da crims da violenza

Sessiun: 10.06.2008
Senza dubi èn ils ultims onns tant la criminalitad sco er l'agressivitad, particularmain dals giuvenils, s'augmentadas fitg, e quai betg mo en noss pajais, mabain er en noss chantun. Er en il spazi public ed en il sectur da furmaziun è il dumber da blessuras corporalas e da smanatschas creschì considerablamain. I manca il respect e la protecziun da la vita e da l'integritad da nossas burgaisas e da noss burgais. Blessuras e smanatschas paran da daventar adina pli savens regularas er en il sectur da la furmaziun. Nus ans drizzain perquai a la regenza grischuna cun las suandantas dumondas:

1. Datti ina statistica sistematica en noss chantun davart las blessuras corporalas e davart ils delicts da mazzament ch'èn capitads ils ultims 10 onns, repartida tenor differents champs specifics sco il spazi public, la scola, las chasadas e.u.v.?

2. Tge conclusiuns pon ins trair pertutgant il svilup, pertutgant la grevezza, pertutgant ils motivs dals delicts e pertutgant l'origin da las delinquentas e dals delinquents?

3. Tge mesiras èn vegnidas prendidas u previsas per giuditgar il svilup da quest fenomen, per limitar ses donns e per evitar ch'el sa pegiureschia ils proxims onns?

4. Tge mesiras èn vegnidas prendidas visavi persunas agressivas creschidas, minorennas ed estras?

5. Co emprovan ins da proteger las gruppas da persunas ch'èn spezialmain periclitadas (persunas attempadas, uffants, persunas d'instrucziun, persunas d'uffizi e.u.v.)?

Cuira, ils 10 da zercladur 2008

Righetti, Keller, Pedrini (Roveredo), Augustin, Bondolfi, Cahannes Renggli, Dermont, Fallet, Kleis-Kümin, Parpan, Plozza, Portner, Quinter, Tenchio, Toschini, Tuor, Luzio, Pedrini (Soazza)

Session: 10.06.2008
Vorstoss: rg Anfrage

Resposta da la regenza

1. La statistica criminala chantunala infurmescha mo davart il dumber dals delicts cunter il corp e cunter la vita, sco blessuras corporalas u mazzaments, sco er davart las delinquentas e davart ils delinquents eruids. Il grad da la criminalitad da las vischnancas po er vegnir preschentà cun agid da la statistica. La statistica criminala registrescha ils acts chastiabels tenor lur qualificaziun legala. Ella na resguarda pia ni la grevezza individuala d'in act chastiabel ni il lieu specific dal delict. Questas indicaziuns dat mo il singul cas sez. In'excepziun èn ils acts chastiabels en la lètg ed en il partenadi, nua ch'il causal sa referescha a las relaziuns a chasa resp. en famiglia.

2. Il dumber dals delicts da violenza (en spezial ils delicts intenziunads cunter il corp e cunter la vita, cunter la libertad e cunter l'integritad sexuala) èn s'augmentads durant ils 12 onns passads. L'onn 2007 èn vegnids registrads pli che duas giadas uschè blers delicts da violenza che anc l'onn 1996. La grevezza dals delicts na vegn betg registrada en la statistica. Mintgatant constatescha la polizia chantunala dentant ch'i vegnan commess acts d'ina violenza pli intensiva. La part da las delinquentas e dals delinquents esters vi da las delinquentas e vi dals delinquents ch'èn vegnids eruids importa – er en la cumparegliaziun da plirs onns – circa in terz tar ils delicts da violenza. Per tut ils delicts è la part da las delinquentas e dals delinquents esters pauc sur 50 pertschient.

3. La prevenziun svizra da la criminalitad (PSC) ha lantschà – per incumbensa da la conferenza da las directuras e dals directurs chantunals da giustia e polizia (CDCGP) – l'onn 1999 la campagna "Communablamain cunter violenza". La finamira da quella campagna è stada quella da proteger uschè blers uffants e giuvenils sco pussaivel, ch'èn daventads victimas u auturs da delicts, cunter las consequenzas da la violenza, cun renviar a la necessitad d'ina collavuraziun pli intensiva tranter ils geniturs, la scola, las educaturas ed ils educaturs sco er la polizia. L'onn 2006 ha la CDCGP incumbensà la PSC d'elavurar in plan da mesiras "giuventetgna e violenza" che duai sensibilisar la publicitad pli fitg davart la problematica.

4. Las delinquentas ed ils delinquents ch'èn vegnids eruids vegnan manads davant la giustia penala, la quala ha – tenor il cudesch penal – la cumpetenza da pronunziar chastis e mesiras.

5. I na dat naginas mesiras generalas per proteger tschertas gruppas da la populaziun cunter delicts da violenza. La protecziun vegn fatga tenor la situaziun, cur ch'ina tscherta smanatscha sa manifestescha. Il post spezialisà "prevenziun" da la polizia chantunala surpiglia en general u sin dumonda servetschs da cussegliaziun. A medem temp realisescha el er las campagnas da la PSC.
Il cudesch penal tegna plinavant quint da tschertas gruppas da la populaziun ch'èn particularmain expostas. Uschia vegnan chastiadas en moda pli severa per exempel blessuras corporalas che vegnan commessas visavi uffants u visavi persunas che na pon betg sa dustar. Il medem vala per delicts en communitads da vita che vegnan persequitads d'uffizi e betg pir sin in plant penal. Ubain ch'il cudesch penal chastia en moda speziala acts cunter autoritads sco er cunter funcziunarias e cunter funcziunaris.

Datum: 11 da settember 2008