Navigation

Inhaltsbereich

Dumonda Feltscher concernent tschertas mesiras per il tempo 30 sin vias communalas e chantunalas

Sessiun: 10.06.2008
Ils ultims diesch onns han bleras vischnancas introducì il tempo 30 en il vitg a favur da las participantas e dals participants il pli flaivels dal traffic, ils uffants e las senioras ed ils seniors. L'ordinaziun davart la signalisaziun da las vias, art. 2a, 22a, l'ordinaziun davart las zonas da tempo 30 e davart las zonas d'inscunter sco er las directivas chantunalas "diminuziun dal traffic entaifer il vitg" furman la basa legala. La cumissiun chantunala per la determinaziun da sveltezzas maximalas differenziadas per il traffic sin via (cumissiun per sveltezzas maximalas differenziadas) e las spezialistas ed ils spezialists da la polizia chantunala han l'ultim temp adina puspè integrà er vias chantunalas cun caracter da colliaziun subordinà, gea perfin trajects da vias principalas en il perimeter da tempo 30. Ils accidents en las zonas da tempo 30 èn sa reducids per la mesadad. Cun tempo 30 è la grevezza da la canera bler pli pitschna e perfin la qualitad da l'aria daventa in pau meglra.

Cuntrari a las vias communalas prescriva il chantun sin sias vias – en cas che la valur v-85 vegn surpassada, quai vul dir, sche 15 % dals vehichels che vegnan controllads sin in tschert traject van pli spert che 42 km/h resp. 44 km/h – automaticamain almain dus uschenumnads impediments orizontals (schlargiaments dal passape). Questas "schicanas" effectueschan in augment da la canera per las abitantas e per ils abitants pertutgads e retardeschan il moviment dal traffic. Las mesiras da construcziun chaschunan ultra da quai investiziuns che na dastgan betg vegnir negligidas e ch'èn savens l'unic motiv per refusar politicamain il tempo 30. La valur v-85 che sto esser ademplida avant che l'introducziun dal tempo 30 vegnia realisada para ultra da quai – cun 42 km/h resp. cun 44 km/h – d'esser fixada vaira bass. In augment per ca. 5km/h effectuass che la reducziun dal tempo vegniss alura propi er introducida sin vias fitg privlusas.

In onn suenter l'introducziun d'ina zona da tempo 30 vegn examinà l'effect. Sche la reducziun dal tempo avess manà al success sin ils trajects numnads da la via chantunala er senza las mesiras architectonicas, na po deplorablamain betg pli vegnir eruì.

La zona da tempo 30 na duai – tenor la pratica chantunala – da princip betg vegnir introducida sin vias che han da tuttas duas varts in passape. Sch'i sa tracta d'ina via da quartier, nua che uffants giogan sin via u d'ina via da scola impurtanta, na para questa restricziun betg raschunaivla. En quest connex ston ins er constatar che sche la via sa cruscha cun ina via da scola impurtanta, na vegn quai betg resguardà sco in criteri per introducir il temp 30. Tuttina capitan ils pli blers accidents cun pedunas e peduns, nua ch'ina via sto vegnir traversada.

Perquai dumandain nus la regenza:

1. sch'ella prevesa d'adattar las directivas per quietar il traffic uschia, che las mesiras architectonicas per il tempo 30 ston vegnir realisadas pir en il rom da las controllas posteriuras obligatoricas?

2. sch'ella è pronta dad auzar la valur v-85 per ca. 5 km/h avant che introducir la redcuziun dal tempo?

3. sch'ella è pronta da reponderar ils criteris ch'èn fixads en las directivas numnadas areguard ils passapes da tuttas duas varts da la via ed areguard il traversar la via.

Cuira, ils 10 da zercladur 2008

Feltscher, Thöny, Geisseler, Arquint, Berni, Brantschen, Bucher-Brini, Casutt, Caviezel-Sutter (Tusaun), Clavadetscher, Conrad, Donatsch, Felix, Frigg-Walt, Jaag, Jenny, Kleis-Kümin, Kollegger, Krättli-Lori, Mani-Heldstab, Menge, Meyer-Grass (Claustra vitg), Michel (Tavau Monstein), Niederer, Noi-Togni, Perl, Peyer, Pfiffner-Bearth, Pfister, Ragettli, Rathgeb, Ratti, Rizzi, Sax, Stiffler, Trepp, Wettstein, Furrer-Cabalzar, Locher Benguerel, Michel (Cuira), Patt, Scartazzini

Session: 10.06.2008
Vorstoss: rg Anfrage

Resposta da la regenza

Ils 15 da mars 2005 ha la regenza relaschà – sin dumonda dal departament da giustia, segirezza e sanadad – ina directiva per zonas da charrar plaun. Questa directiva serva a la cumissiun per sveltezzas maximalas differenziadas, a las vischnancas sco er a las planisadras ed als planisaders da traffic sco lingias directivas tar la procedura da decisiun e garantescha che las dumondas per reducir la sveltezza maximala per introducir ina zona da charrar plaun vegnian tractadas giuridicamain en moda eguala en il chantun. Ella differenziescha d'ina vart tranter vias communalas e vias chantunals da colliaziun, tar las qualas igl è da princip pussaivel dad operar cun mesiras architectonicas, e – da l'autra vart – tranter vias chantunalas principalas.

Tenor l'art. 108 al. 2 da l'ordinaziun davart la signalisaziun da las vias (OSV) pon las sveltezzas generalas maximalas vegnir reducidas, sch'in privel è visibel mo cun difficultads u sch'el n'è betg visibel a temp e sche questa situaziun na po betg vegnir liquidada en autra moda (lit. a), sche tschertas utilisadras e sche tscherts utilisaders da la via basegnan ina protecziun che na po betg vegnir cuntanschida autramain (lit. b), sche la circulaziun dal traffic po vegnir meglierada sin trajects cun bler traffic (lit. c) u sch'i po vegnir reducida uschia – en il senn da la legislaziun davart la protecziun da l'ambient – ina grevezza per l'ambient memia gronda, resguardond dentant il princip da la proporziunalitad (lit. d).

1. En zonas da tempo 30 po – en concordanza cun l'opiniun dal post da consultaziun svizzer per la prevenziun d'accidents – vegnir acceptada ina sveltezza (V85) da circa 38 km/h. Las experientschas mussan che la sveltezza, cun la quala i vegn charrà, po vegnir sbassada per 4 fin 6 km/h cun introducir zonas da charrar plaun sco er cun far las marcaziuns e cun montar las signalisa-ziuns ch'èn necessarias. Pervia da quai ha la regenza fixà la sveltezza per introducir ina zona da tempo 30 en las directivas sin 42 resp. 44 km/h. Tar sveltezzas pli grondas daventi necessari da prender mesiras architectonicas gia tar l'intro-ducziun da zonas da charrar plaun per cuntanscher la sveltezza pretendida. Ina midada da las directivas per quietar il traffic entaifer il vitg na s'impona betg sin basa da las experientschas ch'ins ha fatg. Mesiras per quietar il traffic ch'èn ra-schunaivlas e che vegnan realisadas correctamain augmentan la segirezza e la qualitad da viver.

2. Na, in augment da las valurs V85 per ca. 5 km/h na para betg raschunaivel, perquai ch'i ston vegnir cuntanschids la fin finala ils 38 km/h ch'èn prescrits.
Sin vias chantunalas principalas duain las zonas da tempo 30 esser las excepziuns e vegnir introducidas mo en cas da relaziuns spezialas. Tar quest tip da via na vegnan toleradas naginas mesiras architectonicas che pertutgan il vial. In augment da la valur V85 per ca. 5 km/h cuntegna il privel ch'ina zona stuess vegnir abolida gia suenter 1 onn, sche la valur finala da 38 km/h na vegniss betg cuntanschida. Ina disfatga resp. in'aboliziun da la zona na chattass strusch blera acceptanza tar la populaziun.
3. Na, ina midada generala da las directivas e da la pratica n'è betg necessaria. L'existenza d'ina via da scola – cun u oravant tut senza passapes – po esser in criteri per conceder ina zona da charrar plaun en il senn da l'art. 108 al. 2 lit. b OSV. Il medem vala per traversadas eventualas. La polizia chantunala examinescha ils privels sco er ils basegns da traversar ina via en il cas singul e decida en il cas da dubi er, sch'in passadi da pedunas e da peduns (strivla melna) existent duai vegnir mantegnì u betg. Da princip dastgan strivlas melnas tenor l'art. 4 al. 2 da l'ordinaziun davart las zonas da tempo 30 e davart las zonas d'inscunter (CS 741.213.3) vegnir plazzadas mo excepziunalmain en zonas da tempo 30, p.ex. tar scolas u tar chasas da dimora.

Datum: 28 d'avust 2008