Navigation

Inhaltsbereich

Sessiun: 10.06.2008
Durant ils ultims onns è la criminalitad da giuvenils adina puspè vegnida tematisada. Malfatgs e vandalissem ch'èn vegnids commess da giuvenils han figurà displaschaivlamain bler memia savens sin las emprimas paginas dals meds da massa naziunals ed er grischuns. Cas sco la profanaziun da fossas sin tscherts santeris dal Grischun, sco divers assagls da rapinament e sco la violenza fisica tranter ils giuvenils ed envers las persunas creschidas, èn preschents a nus tuttas ed a nus tuts. Vandalissem e disturbis dal ruaus da la notg fatschentan ils organs da polizia er tar nus e quai prest mintga di. Tenor ina communicaziun a las medias davart la statistica criminala e davart la statistica dals accidents da traffic en il Grischun da l'onn 2006 è ina gruppa da lavur da la polizia chantunala dal Grischun e da la polizia da la citad da Cuira s'occupada detagliadamain cun la criminalitad da giuvenils ed ha fatg in rapport da quai. Displaschaivlamain vegn quest rapport tractà cun discreziun e na po betg vegnir consultà da la publicitad. La communicaziun a las medias tradescha mo ch'il dumber dals eveniments che vegnan valitads sco relevants per la polizia giudiziala è s'augmentà.

Considerond il nov dretg penal per giuvenils ch'è entrà en vigur il 1. da schaner 2007 supplitgeschan las sutsegnadras ed ils sutsegnaders la regenza da respunder las suandantas dumondas:

1. Constat l'impressiun subjectiva che la criminalitad da giuvenils è s'augmentada ils ultims onns?

2. Po la regenza dar ina survista dals delicts dals ultims tschintg onns e da lur grevezza?

3. Po la regenza furnir ina glista da las mesiras penalas cunter giuvenils ch'èn vegnidas pronunziadas en il Grischun ils ultims tschintg onns?

4. Tge mesiras ha la regenza instradà – sin fundament dal rapport ch'è vegnì elavurà da la polizia chantunala dal Grischun – per restrenscher la criminalitad da giuvenils en il Grischun?

5. Tgi coordinescha entaifer l'administraziun – tranter il DECA ed il DGSS – las mesiras cunter la violenza da giuvenils?

Cuira, ils 10 da zercladur 2008

Hartmann (Cuira), Candinas, Parolini, Arquint, Barandun, Baselgia-Brunner, Berther (Sedrun), Bezzola (Zernez), Bischoff, Bleiker, Blumenthal, Bondolfi, Brandenburger, Brantschen, Brüesch, Buchli, Caduff, Campell, Castelberg-Fleischhauer, Casty, Casutt, Caviezel (Pitasch), Caviezel-Sutter (Tusaun), Christoffel-Casty, Claus, Clavadetscher, Darms-Landolt, Dermont, Donatsch, Dudli, Felix, Feltscher, Florin-Caluori, Frigg-Walt, Gartmann-Albin, Geisseler, Hardegger, Hartmann (Champfèr), Hasler, Jäger, Jenny, Keller, Kessler, Kleis-Kümin, Koch, Kollegger, Krättli-Lori, Kunz, Mani-Heldstab, Märchy-Michel (Malans), Marti, Meyer-Grass (Claustra Vitg), Michel (Tavau Monstein), Nick, Niederer, Peyer, Pfäffli, Pfenninger, Portner, Quinter, Ragettli, Rathgeb, Ratti, Rizzi, Sax, Stiffler, Tenchio, Thomann, Toschini, Trepp, Troncana-Sauer, Valär, Vetsch (Claustra Vitg), Wettstein, Furrer-Cabalzar, Hartmann (Küblis), Hemmi, Janett, Locher Benguerel, Märchy-Caduff (Domat), Michel (Cuira), Patt, Scartazzini

Resposta da la regenza

1. Ils onns 2001 fin 2006 han ins pudì registrar in augment da las proceduras penalas ch'èn vegnidas manadas da la procura per giuvenils, e quai en media da circa 360 sin 400 fin 450 cas per onn. L'onn 2007 han ins pudì constatar in augment sin totalmain 578 cas. Quest augment po vegnir deducì dal fatg che la procura per giuvenils ha stuì surpigliar per il 1. da schaner 2007 er la cumpetenza penala dals cussegls da scola. Pia 194 cas supplementars da giuvenils tranter 10 e 15 onns. En emprima lingia èn quai stads delicts senza cumponenta da violenza, q.v.d. cunzunt enguladitschs e donns materials, cuntravenziuns cunter la lescha davart il traffic sin via e cunter la lescha da narcotics. Ils cussegls da scola han gì ils onns 1997 fin 2006 mintgamai tranter 110 (2004) e 173 (1998) proceduras. Il dumber da las proceduras penalas per giuvenils che han gì lieu pervia da delicts da violenza è s'augmentà in pau l'onn 2007 (2004: 52; 2005: 50; 2006: 39; 2007: 59 proceduras).

Sch'ins resguarda las cifras da la statistica criminala, n'ha il fenomen da la criminalitad da giuvenils tut en tut nagina significaziun statistica. Ins po dentant constatar ch'i dat singulas valurs significativas che reveleschan in'energia criminala considerabla, sco tar ina retscha d'assagls da rapinament l'onn 2005, sco tar la profanaziun da fossas e sco tar ina seria d'attatgas violentas l'onn 2006. La culpa da questas delinquentas e da quests delinquents è vegnida cumprovada ed ellas ed els èn vegnids chastiads. Ma quests eveniments n'èn betg represchentativs per la situaziun generala a Cuira ed en ils conturns resp. en il chantun. Percunter sto vegnir resguardada la situaziun en citads pli grondas, p.ex. a Turitg, cun ina caracterisaziun tant qualitativa sco er quantitativa che pudess sa manifestar pli tard er en las relaziuns urbanas dal Grischun.

2. La statistica criminala da la polizia chantunala mussa che la part dals giuvenils vi da las delinquentas e vi dals delinquents ch'èn vegnids eruids è s'augmentada l'onn 2003 ed è suenter restada bunamain tuttina. Quai constat essenzialmain tant per la totalitad dals delicts sco er per las categorias da delicts ch'èn relevantas. La statistica criminala na resguarda dentant betg la grevezza da l'act chastiabel, mabain mo, co ch'el è vegnì giuditgà giuridicamain.

 

<> 

 

<> 

 

3. Chastis e mesiras/onn 2003 2004 2005 2006 2007
reprimanda 83 119 117 136 140
multa 94 112 107 76 84
prestaziun da lavur persunala 93 117 92 133 228
participaziuns a curs:

cussegliaziun per dumondas da dependenza

curs per prevegnir a la violenza

 

31

 

5

privaziun da la libertad 33 40 21 17 17
desister da

chasti + mesira

 

9

 

2

 

15

 

14

 

11

mesiras da protecziun:

surveglianza

assistenza persunala

tractament ambulant

collocaziun

 

 

 

5

 

 

 

2

 

 

 

 

2

 

 

 

 

2

 

6

1

3

2


4. Ultra dal fatg che la regenza ha amplifitgà la procura per giuvenils, ha l'anteriur schef dal departament da giustia, segirezza e sanadad incumbensà la polizia chantunala da metter prioritads en quest sectur, sche quai fa da basegn. Suenter ch'ella ha dà prioritad a las incumbensas, ha la polizia chantunala desistì fin ussa da spustar las resursas da persunal a favur dal cumbat specific cunter la criminalitad da giuvenils.

5. La gestiun e la coordinaziun dal tema "mesiras cunter la violenza da giuvenils" che tanghescha ils departaments pertutgads, numnadamain il departament d'economia publica e fatgs socials (DES), il departament d'educaziun, cultura e protecziun da l'ambient (DECA) ed il departament da giustia, segirezza e sanadad (DGSS), èn chaussa da l'uffizi per la scola populara ed il sport (USS). Quai duai er metter en evidenza che la polizia na po betg surpigliar suletta la responsabladad per dumagnar quests fenomens. Els pretendan ina collavuraziun interdepartamentala da tut ils posts da servetsch pertutgads.

11 da settember 2008