Navigation

Inhaltsbereich

Sessiun: 11.06.2008

Ils ultims onns ha la pressa rapportà adina pli savens davart incidents criminals cun la cooperaziun da giuvenils, e tuttina sa tracti qua mo d'ina pitschna part da tut ils cas. Las experientschas ch'ils organs da segirezza, che la procura per giuvenils, che bleras autoritads da scola, ma er che singulas burgaisas e che singuls burgais fan en connex cun la violenza da giuvenils mussan in nausch maletg da la situaziun. En sia resposta dals 7 da settember 2007 a la dumonda Niederer concernent la violenza ed il vandalissem da giuvenils en il Grischun discurra schizunt la regenza d'in lev augment da la violenza da giuvenils; e la violenza commessa vegnia adina pli dira e pli brutala.
Las sutsegnadras ed ils sutsegnaders èn conscients dal fatg ch'il fenomen cumplex da la violenza da giuvenils sto vegnir schlià en moda cumplessiva. En il senn d'ina consideraziun cumplessiva dovri – tenor l'opiniun d'expertas e d'experts – quatter axas: mesiras preventivas e mesiras repressivas, ma er mesiras per manar ils giuvenils or da la spirala da la violenza e mesiras per sminuir las consequenzas da la violenza per las victimas sco er per las delinquentas e per ils delinquents.

In servetsch spezial independent che agescha en tut il chantun (e che n'ha naginas incumbensas d'auters champs) avess – cunzunt en il senn preventiv e repressiv – ina gronda influenza sin la criminalitad da giuvenils en il Grischun. Ina plivalur resultass tras quai che policistas e che policists da giuvenils pudessan – sco enconuschidras e sco enconuschiders da la scena – manar il discurs cun giuvenils, cumparair en lieus respectivs enconuschents ed intervegnir a temp, uschia ch'i pudess vegnir rendì conscient als giuvenils che la violenza e che auters acts chastiabels na vegnian betg tolerads. Sch'i na vegn fatg nagut cunter las acziuns chastiablas, po quai signifitgar per blers giuvenils ch'els hajan maun liber d'agir. "I na capita gea tuttina nagut", na dastgi betg avair num.

In'ulteriura strategia dal servetsch da giuvenils sto esser quella da promover e da sustegnair l'entretschament e la cooperaziun cun las educaturas e cun ils educaturs, cun las scolas sco er cun las persunas ch'èn incumbensadas per dumondas da giuvenils.
In tal servetsch da giuvenils en il senn d'in post da consultaziun polizial per giuvenils, che po ademplir tut ils basegns tant da gener preventiv sco er da gener repressiv, n'exista betg en il Grischun.

Servetschs da giuvenils en il senn da las sutsegnadras e dals sutsegnaders enconuschan ils chantuns Turitg, Son Gagl, Appenzell dador, Lucerna e Soloturn. Tenor las infurmaziuns da policistas e da policists da giuvenils sco er d'expertas e d'experts èn ils servetschs da giuvenils incontestads en quests chantuns ed han il sustegn politic da tut las varts. En in rapport dal "Bündner Tagblatt" dals 3 d'october 2007 davart la polizia da contact per giuvenils dal chantun Appenzell dador statti scrit: "La populaziun vul ina polizia da contact per giuvenils (PCG). En ina retschertga taxeschan 85 pertschient la lavur da la PCG da l'Appenzell dador sco fitg impurtanta."

Per meglierar la situaziun areguard la criminalitad da giuvenils en noss chantun e per dar a la polizia chantunala dal Grischun ina pussaivladad correspundenta d'intervegnir incumbenseschan las sutsegnadras ed ils sutsegnaders la regenza d'instradar entaifer in onn la creaziun d'in servetsch da giuvenils che n'ha naginas incumbensas d'auters champs, e quai cun persunal supplementar.

Cuira, ils 11 da zercladur 2008

Niederer, Hartmann (Cuira), Parolini, Arquint, Augustin, Baselgia-Brunner, Berni, Berther (Sedrun), Bezzola (Samedan), Blumenthal, Bondolfi, Brandenburger, Bundi, Caduff, Cahannes Renggli, Candinas, Casutt, Cavigelli, Clavadetscher, Darms-Landolt, Dermont, Dudli, Florin-Caluori, Gartmann-Albin, Geisseler, Jäger, Jenny, Keller, Kessler, Kleis-Kümin, Koch, Kollegger, Mani-Heldstab, Menge, Meyer-Grass (Claustra Vitg), Michel (Tavau Monstein), Montalta, Noi-Togni, Parpan, Pfister, Portner, Ragettli, Righetti, Stiffler, Tenchio, Troncana-Sauer, Tuor, Wettstein, Furrer-Cabalzar, Hartmann (Küblis), Luzio, Märchy-Caduff (Domat), Michel (Cuira), Patt, Scartazzini

Session: 11.06.2008
Vorstoss: rg Auftrag

Resposta da la regenza

Dapi l'onn 2006 elavura la polizia chantunala – ensemen cun la polizia da la citad da Cuira – dumondas polizialas en connex cun la giuventetgna e cun la violenza da giuvenils (gruppa da lavur "MINOR"). I sa tracta da preschentar e da giuditgar fatgs che pertutgan la violenza da giuvenils a Cuira e ch'èn relevants per la polizia giudiziala e per la polizia da segirezza, sco er da mussar il basegn d'agir en quest connex. Quest rapport vegn renovà mintga onn.

Ils onns 2005 fin 2007 èn vegnids registrads a Cuira mintga onn tranter 111 e 136 cas relevants: in terz da quels pertutgava la polizia giudiziala, dus terzs la polizia da segirezza. Per quests cas èn stads responsabels 351 giuvenils l'onn 2006 resp. 251 giuvenils l'onn 2007; ils giuvenils ils pli "activs" – quai èn 5 pertschient – han dal rest chaschunà sulets passa in terz dals cas. La statistica criminala da la polizia chantunala mussa plinavant che la quota dals giuvenils vi da las delinquentas e vi dals delinquents ch'èn vegnids eruids, è restada circa tuttina ils ultims 5 onns. Tut en tut na mussa il fenomen da la violenza da giuvenils – abstrahà da singulas valurs signifitgantas – betg ina significanza statistica.

En ses rapport mussa la gruppa da lavur "MINOR" ch'i stoppia – per identifitgar e per cumbatter a temp svilups sumegliants sco quels en citads pli grondas, p.ex. a Turitg – vegnir creà in servetsch da giuvenils entaifer la polizia chantunala. Quest servetsch duaja entrar en acziun avant e durant las retschertgas en connex cun la criminalitad da giuvenils sco er per coordinar talas retschertgas. El duaja vegnir concepì sco agen servetsch spezial da la polizia criminala ed duaja collavurar stretgamain cun la procura per giuvenils. Per quest intent stoppia dentant vegnir mess a disposiziun persunal supplementar.

La regenza vegn a respunder la dumonda concernent la creaziun d'in servetsch da giuvenils en il rom dal rapport da polizia 2010 che vegn elavurà per mauns dal cussegl grond sin basa da l'incumbensa da la cumissiun per giustia e segirezza. Ella è pronta d'acceptar questa incumbensa cun la restricziun ch'i vegnia fatga l'emprim la discussiun politica davart il rapport da polizia.

Datum: 10 da settember 2008