Navigation

Inhaltsbereich

Dumonda Locher Benguerel concernent il project cultural "Niki & Friends"

Sessiun: 11.06.2008
Il cumenzament da la stad 2009 vegn la firma Würth a preschentar in'exposiziun da l'artista da renum mundial Niki de Saint Phalle en sia sedia a la Ringstrasse a Cuira. L'exposiziun vegn concepida da Guido Magnaguagno, il directur dal Museum da Tinguely a Basilea. Gia oz pon ins dir che quai vegn a dar in'exposiziun d'emprima qualitad.

Tras questa exposiziun daventa la chapitala dal Grischun la citad culturala da la Svizra la pli impurtanta. Sch'ins profita da la situaziun da partenza unica, permetta quai d'avrir l'exposiziun menziunada, da rimnar tut las forzas e d'integrar en l'exposiziun er la chapitala cun sia aura chantunala, naziunala ed internaziunala.

Perquai che Niki de Saint Phalle aveva in cerchel illuster d'amitgs artists (tranter auter faschevan ils suandants artists enconuschents part da tal: Alfred Hofkunst, Ives Klein, Bernhard Luginbühl, Dieter Roth, Daniel Spoerri, Jean Tinguely, André Thomkins), pudess vegnir inscenada in'occurrenza artistica cumplessiva cun il sustegn dal chantun, da la citad e dal commerzi sco er da sponsuras e da sponsurs privats.

Las suandantas partenarias ed ils suandants partenaris han da princip gia confermà lur collavuraziun:
• Ils negozis da la citad veglia vegnan a surpigliar il tema "Niki & Friends". Els fan offertas e s'engaschan er en lur vaidrinas a favur da l'exposiziun.
• Las galarias ed ils ulteriurs locals d'art participeschan cun lur exposiziuns spezialas.
• La citad da Cuira expona sculpturas en il spazi public.
• Cuira turissem è vidlonder d'elavurar purschidas spezialas per quest event.

Planisada è in'ulteriura collavuraziun cun las suandantas partenarias e cun ils suandants partenaris:
• La VFF/VR vegn integrada cun products da "RailAway" (bigliets cumbinads, reclama naziunala a las staziuns impurtantas).
• Tut ils servetschs d'infurmaziun (Kulturplatz SF DRS1, DOK film documentar, mo dus da numerus exempels pussaivels) vegnan integrads.

La participaziun dal museum d'art a quest project unic fiss fitg impurtanta e zunt giavischada. Il museum d'art po prender la buna occasiun da deditgar sia exposiziun da stad 09 al tema "Niki & Friends" e da dar uschia anc dapli paisa a l'eveniment artistic.

Las sutsegnadras ed ils sutsegnaders sustegnan il project e pledan per ch'il chantun sustegnia l'eveniment artistic unic "Niki & Friends".

Nus faschain perquai las suandantas dumondas a la regenza:
1. Co giuditgescha la regenza ils impuls che sortan dal forum da cultura Würth?
2. Co giuditgescha la regenza il project d'art "Niki & Friends"?
3. Tge pussaivladads vesa la regenza per sustegnair quest project?

Cuira, ils 11 da zercladur 2008

Locher Benguerel, Tscholl, Rathgeb, Arquint, Augustin, Baselgia-Brunner, Bezzola (Zernez), Blumenthal, Bondolfi, Bucher-Brini, Cahannes Renggli, Casparis-Nigg, Casty, Casutt, Caviezel-Sutter (Tusaun), Christoffel-Casty, Claus, Darms-Landolt, Dermont, Dudli, Feltscher, Frigg-Walt, Gartmann-Albin, Hardegger, Hartmann (Cuira), Jaag, Jäger, Kessler, Kleis-Kümin, Krättli-Lori, Kunz, Märchy-Michel (Malans), Marti, Menge, Meyer-Grass (Claustra Vitg), Möhr, Montalta, Noi-Togni, Parolini, Perl, Peyer, Pfäffli, Pfenninger, Pfiffner-Bearth, Stiffler, Tenchio, Thöny, Trepp, Wettstein, Furrer-Cabalzar, Hemmi, Luzio, Michel (Cuira), Patt, Pedrini (Soazza)

Session: 11.06.2008
Vorstoss: rg Anfrage

Resposta da la regenza

Sper ils eveniments mensils (concerts da jazz e classics, gospel e cumedia) èn las exposiziuns d'art che vegnan organisadas dal forum da cultura Würth dapi l'atun 2002 in grond enritgiment per la scena d'art e da cultura da la citad da Cuira e dal chantun Grischun. Las exposiziuns temporaras en la halla d'entrada dal forum da cultura vegnan solitamain munidas cun ovras da la zunt vasta collecziun d'art Würth e permettan per il pli duas giadas ad onn mintgamai ina scuntrada fitg interessanta cun l'ovra d'ina artista u d'in artist elegì u cun ina tscherta tematica artistica. I vegn apprezià particularmain ch'i – vegnan purschids – ensemen cun las exposiziuns programs professiunals accumpagnants, en spezial l'uschenumnà "club d'art per uffants", nua che uffants e giuvenils pon sa confruntar cun l'art en moda divertenta.

Tenor quai ch'è vegnì ditg pon las dumondas vegnir respundidas sco suonda:

1. La regenza constatescha cun plaschair ch'ils impuls che sortan dal forum da cultura Würth èn d'ina impurtanza cardinala per la vita culturala da Cuira e dal Grischun.

2. Perquai che la sculptura giaglia da l'artista Niki de Saint Phalle enritgescha cleramain ed a moda umoristica sco statua dapi intgin temp la Ringstrasse a Cuira, èsi evident ch'i vegn deditgada a questa artista ed a ses ambient ina exposiziun en il forum da cultura Würth a Cuira. In tal project po mo vegnir beneventà, tant pli ch'el pudess er lantschar ina discussiun davart l'art en il spazi public. Sch'i reussiss d'entusiasmar – ultra dal forum da cultura Würth – er anc autras instituziuns a Cuira per questa idea, avess l'occurrenza ina resonanza ed ina impurtanza anc pli gronda; quai po mo vegnir desiderà per la cultura da Cuira e dal Grischun.

3. En il rom da la lescha per promover la cultura ha il chantun la pussaivladad da sustegnair finanzialmain quest project. La regenza è persvadida che la cumissiun per promover la cultura, la quala sustegna la regenza adina professiunalmain cur ch'i vegnan giuditgads projects da cultura e la quala procura er ch'il sustegn als singuls projects saja gist, vegnia ad examinar questa dumonda en moda bainvulenta. La regenza vegn en mintga cas ad acceptar en in senn positiv la proposta da la cumissiun per promover la cultura. Ultra da quai ha il museum d'art dal Grischun l'intenziun – en enclegientscha cun l'uniun grischuna d'art – da sa participar activamain al project "Niki & Friends", e quai cun ina exposiziun represchentativa d'in exponent impurtant ord l'ambient da Niki de Saint-Phalle (20 da zercladur fin 13 da settember 2009). L'exposiziun ha in connex cun l'atgna collecziun e pudess vegnir mussada er sco exposiziun autonoma independentamain dal project cumplessiv "Niki & Friends".

Datum: 04 da settember 2008