Navigation

Inhaltsbereich

Incumbensa Noi-Togni concernent l'acquisiziun d'in defibrillatur per il cussegl grond

Sessiun: 12.06.2008
Oz èsi normal, ed en Svizra correspundi a la recumandaziun da differentas organisaziuns e federaziuns dal cor, da metter a disposiziun in defibrillatur en lieus, nua ch'i sa trategnan pliras persunas. Sin proposta dal medi e cusseglier naziunal Paul Günter è vegnì installà avant intgins onns in defibrillatur en il cussegl naziunal. Quest defibrillatur è vegnì duvrà svelt e cun success. Oz èsi usità ch'in defibrillatur stat a disposiziun en ils gronds negozis e – sco ch'il cas da Tavau ans mussa – schizunt en il sectur dal traffic public. Tar ina insuffizienza dal cor sto l'intervenziun vegnir fatga entaifer 3 minutas. Mo alura sa laschan evitar donns da la sanadad irreversibels tar las persunas pertutgadas. Tenor l'avis da las expertas e dals experts è mintga secunda decisiva tar ina insuffizienza dal cor. Spetgar l'ambulanza po esser fatal.

I fa surstar che gist in manaschi sco l'edifizi dal cussegl grond – cun 120 deputadas e deputads, cun 5 commembras e commembers da la regenza sco er cun emploiadas e cun emploiads, e plinavant anc cun la funcziun accessorica da "chasa da congress" per differentas occurrenzas – n'ha betg a disposiziun in tal apparat da salvament.
Sin basa da questas ponderaziuns ed en vista al fatg che mesiras che salvan la vita han la preferenza, dumandain nus d'installar uschè svelt sco pussaivel in defibrillatur en l'edifizi dal cussegl grond.

Cuira, ils 12 da zercladur 2008

Noi-Togni, Portner, Caviezel-Sutter (Tusaun), Augustin, Barandun, Baselgia-Brunner, Berni, Berther (Mustér), Berther (Sedrun), Bleiker, Blumenthal, Bucher-Brini, Bühler-Flury, Caduff, Candinas, Casparis-Nigg, Casty, Casutt, Christoffel-Casty, Clavadetscher, Conrad, Darms-Landolt, Dermont, Felix, Florin-Caluori, Gartmann-Albin, Hardegger, Hartmann (Cuira), Hartmann (Champfèr), Jenny, Keller, Kessler, Kleis-Kümin, Koch, Kollegger, Krättli-Lori, Mani-Heldstab, Märchy-Michel (Malans), Marti, Mengotti, Meyer-Grass (Claustra Vitg), Michel (Tavau Monstein), Möhr, Nick, Niederer, Nigg, Parolini, Perl, Peyer, Pfister, Ratti, Stiffler, Tenchio, Toschini, Trepp, Troncana-Sauer, Tuor, Valär, Vetsch (Claustra Vitg), Hartmann (Küblis), Hemmi, Locher Benguerel, Luzio, Märchy-Caduff (Domat), Michel (Cuira), Patt, Pedrini (Soazza), Scartazzini

Session: 12.06.2008
Vorstoss: rg Auftrag

Resposta da la regenza

Tar 85 pertschient da tut las morts andetgas pervia dal cor datti l'emprim ina uschenumnada fibrillaziun da las chombras dal cor. I sa tracta qua d'ina activitad irregulara da las chombras dal cor, tar la quala la prestaziun da pumpa vegn interrutta. In defibrillatur po interrumper questa fibrillaziun da las chombras dal cor, che po esser mortala, stimulond las cellas dal muscul dal cor cun culps electrics. Per quest motiv vegnan plazzads adina dapli defibrillaturs automatics externs (DAE) tant en il spazi public sco er en il spazi privat, p.ex. en centers da cumpra, en eroports, en staziuns ed en auters edifizis publics che han grondas frequenzas da visitadras e da visitaders.
Per il solit èn ils DAE plazzads tar ils spurtegls d'infurmaziun u en portinarias, per ch'i stettia a disposiziun immediatamain persunal scolà. Ils defibrillaturs ch'èn accessibels libramain (sumegliantamain als stizzafieu) pon esser colliads cun in sistem d'alarm per clamar automaticamain ina gidantra u in gidanter scolà u per evitar enguladitschs. Sch'in DAE duai vegnir applitgà cun success, sto la reanimaziun cardiopulmunala vegnir fatga correctamain.
En il mussavia dal SECO da l'avust 2006 davart l'ordinaziun 3 tar la lescha da lavur vegni recumandà areguard l'art. 36 (emprim agid) ch'in DAE duess esser avant maun en manaschis senza privels spezials, sche 250 persunas u dapli lavuran en il medem edifizi.
La conferenza da las presidentas e dals presidents da las fracziuns dal cussegl grond ha discutà ils 7 da schaner 2008 il tema da l'emprim provediment medicinal. Ella ha incumbensà il secretariat dal cussegl grond da far scleriments correspundents. Sin basa dals scleriments dal secretariat dal cussegl grond ha la conferenza da las presidentas e dals presidents concludì ils 11 da favrer 2008 da desister per entant da cumprar in defibrillatur per l'edifizi dal cussegl grond.
Il manader dal project "Herzsicheres Davos" ch'è vegnì lantschà da l'ospital da Tavau ha offrì – suenter l'inoltraziun da l'incumbensa – al departament da giustia, segirezza e sanadad d'installar in defibrillatur automatic en l'edifizi dal cussegl grond senza chaschunar custs per il chantun. Il departament ha acceptà cun engraziament l'offerta ed ha instradà las mesiras ch'èn necessarias per installar l'apparat e per scolar sias utilisadras e ses utilisaders.
Correspundentamain è la regenza sa declerada pronta d'acceptar l'incumbensa. Ella propona a medem temp al cussegl grond da stritgar l'incumbensa, perquai che quella è vegnida ademplida. En quest connex renviescha ella al fatg che l'applicaziun correcta d'in defibrillatur automatic premetta ina scolaziun correspundenta. L'efficacitad da l'installaziun d'in defibrillatur automatic è pia mo dada, sch'in dumber pli grond da deputadas e da deputads absolva il curs d'applicaziun che vegn dà a sias uras.

Datum: 11 da settember 2008