Navigation

Inhaltsbereich

Sessiun: 12.06.2008
Il "certificat euregio" è ina qualificaziun supplementara che emprendistas e che emprendists da differentas professiuns survegnan suenter ch'ellas e ch'els han fatg cun success lur examen final d'emprendissadi, sch'ellas e sch'els han lavurà durant lur emprendissadi sis emnas en in auter pajais u mintgamai quatter emnas en dus differents pajais (p.ex. en Germania ed en Frantscha).

La finamira da quest praticum è quella da sviluppar e da rinforzar ina conscienza europeica tar las emprendistas e tar ils emprendists sco er tar las furmaturas e tar ils furmaturs, da far experientschas en novas tecnicas da lavur e da stabilir contacts cun in'autra cultura d'interpresa. Las emprendistas ed ils emprendists vegnan integrads meglier en ils connexs regiunals. Uschia pon ins s'avischinar ad auters spazis culturals, emprender ina lingua estra e promover la mobilitad professiunala. Perquai che las linguas estras n'èn anc adina betg ina part integrala fixa dal plan d'instrucziun da las scolas professiunalas, pudess quest deficit en la scolaziun vegnir egualisà cun il barat internaziunal d'emprendistas e d'emprendists.

Ils chantuns Basilea-Citad, Basilea-Champagna, Argovia, Soloturn e Giura han gia introducì quest barat internaziunal d'emprendistas e d'emprendists cun la Germania e cun la Frantscha ed emettan in certificat euregio. En quests chantuns vegn pajada l'indemnisaziun da scolaziun vinavant tras il manaschi. La confederaziun ed ils chantuns participants sa participeschan mintgamai cun 50% vi da la garanzia per ils custs da 300 euros che mintga emprendista e che mintga emprendist survegn per il transport e per las pernottaziuns.

Las sutsegnadras ed ils sutsegnaders dumondan la regenza il suandant:
1. Tge tenuta ha la regenza en general envers in barat internaziunal d'emprendistas e d'emprendists?
2. Exista gia ina tala purschida da barat en il chantun Grischun?
3. Sche gea, exista en il chantun Grischun gia la pussaivladad per emprendistas e per emprendists da survegnir in sustegn per in praticum a l'exteriur ed ina renconuschientscha da tal?
4. È la regenza pronta da realisar en il Grischun la purschida d'ina qualificaziun supplementara per emprendistas e per emprendists cun in certificat che cooperescha per exempel cun l'Italia, cun la Germania e cun l'Austria e che pussibilitescha in barat europeic-regiunal?

Cuira, ils 12 da zercladur 2008

Michel (Cuira), Locher Benguerel, Bucher-Brini, Arquint, Baselgia-Brunner, Bleiker, Blumenthal, Brandenburger, Campell, Casty, Caviezel-Sutter (Tusaun), Christoffel-Casty, Conrad, Feltscher, Frigg-Walt, Jaag, Jäger, Menge, Meyer-Grass (Claustra Vitg ), Montalta, Peyer, Pfiffner-Bearth, Thöny, Trepp, Pedrini (Soazza), Scartazzini

Session: 12.06.2008
Vorstoss: rg Anfrage

Resposta da la regenza

En noss mund globalisà po in praticum a l'exteriur – tenor l'opiniun da la regenza – propi sviluppar e rinforzar ina conscienza europeica tar las emprendistas e tar ils emprendists. I vala bler da far experientschas cun in barat e da stabilir contacts cun in'autra cultura d'interpresa, d'emprender ad enconuscher novas relaziuns professiunalas e da far novas enconuschientschas. Bler pleda per in tal barat. La regenza beneventa las pussaivladads correspundentas.

1. La regenza dal chantun Grischun ha en general ina tenuta positiva envers in barat internaziunal d'emprendistas e d'emprendists.

2. Il Grischun sa participescha dapi l'onn 2001 al project "xchange", ina purschida da barat che sumeglia a quella da la regiun d'euregio. Dapi l'onn 2005 ha il chantun rinforzà sias stentas da persvader giuvenils sco er manaschis da scolaziun da sa participar pli savens a quest project. Ils onns 2007 e 2008 han tschintg emprendistas u emprendists dal Grischun absolvì in praticum da barat.

Il project "xchange" promova il barat d'emprendistas e d'emprendists en la regiun da la cuminanza da lavur da las regiuns alpinas (ARGE ALP) e da la conferenza internaziunala dal Lai da Constanza (CILC). I sa participeschan: la Baviera ed il Baden-Württemberg da la Germania; il Salzburg, il Tirol ed il Vorarlberg da l'Austria; il Tirol dal sid, il Trentino e la Lumbardia da l'Italia; il principadi da Liechtenstein; ed ils chantuns Turitg, Schaffusa, Turgovia, Son Gagl, Appenzell, Argovia, Tessin e Grischun da la Svizra. Dapi il cumenzament da l'onn 2008 è il territori da barat vegnì extendì sin l'Elsass ed a partir da la stad 2008 sin il pajais federativ Oberösterreich.

Emprendistas ed emprendists che sa participeschan ad "xchange" pon lavurar durant quatter emnas a l'exteriur en in manaschi d'emprendissadi che scolescha professiuns sumegliantas. En il cas normal vegn preferì in barat vicendaivel. Quai vul dir ch'il manaschi d'emprendissadi che trametta in'emprendista u in emprendist prenda er si ina tala u in tal. Il barat ha lieu durant la furmaziun fundamentala professiunala. Tut en tut han lieu mintga onn var 100 acziuns da barat en il project xchange.

3. "Xchange" sustegna finanzialmain il barat cun indemnisar ils custs da viadi e cun pajar ina pauschala da fin 30 euros per di. Ils manaschis da scolaziun respectivs pajan a lur emprendistas ed a lur emprendists vinavant il salari, ed er la garanzia tras l'assicuranza va vinavant tut normal.
En il rom d'in act festiv dattan La ARGE ALP e la CILC in certificat a tut las emprendistas ed a tut ils emprendists che han terminà cun success in barat.

4. Las explicaziuns tar las dumondas 1 fin 3 mussan ch'il chantun Grischun sustegna gia concretamain in project da barat che dat la pussaivladad a las giuvnas emprendistas ed als giuvens emprendists da far experientschas supplementaras en in manaschi da la Germania, da l'Austria u da l'Italia e da laschar confermar quai cun in certificat.

Datum: 14 d'avust 2008