Navigation

Inhaltsbereich

Dumonda Kunz concernent las consequenzas da "J+S-Kids" per la promoziun dal sport en il chantun Grischun

Sessiun: 12.06.2008
Dacurt ha la confederaziun stgaffì il nov instrument da promoziun "J+S-Kids" che ha la finamira da promover l'activitad sportiva dals uffants en la vegliadetgna tranter 5 e 10 onns. Quai è correct, pertge che la fasa tranter il 5avel ed il 10avel onn da vegliadetgna è decisiva per il svilup corporal, spiertal e social d'in uffant. En general vegn questa fasa perquai er designada sco vegliadetgna ideala per emprender: La scolaziun motorica da basa ch'in uffant manchenta durant questa fasa da la vita, na vegn el strusch pli da cumpensar pli tard. Perquai ha "J+S-Kids" las duas suandantas finamiras principalas:

1. augmentar l'activitad motorica dals uffants (cunzunt dals uffants da scola)

2. augmentar il dumber da purschidas da sport e da moviment d'auta qualitad per uffants (cunzunt en las uniuns)

Areguard la scola prevesa J+S ch'i vegnian purschidas – ultra da l'instrucziun obligatorica da sport – ina fin duas lecziuns polisportivas per emna. Sche las uniuns vulan cuntanscher il status da "J+S-Kids", ston ellas da lur vart scolar ils uffants en moda polisportiva, e quai d'ina vart cun concepir lur lecziuns da trenament en moda polisportiva e da l'autra vart cun intermediar autras disciplinas da sport. L'atgna disciplina da sport principala dastga pia importar mo pli 50% dal trenament. Cunquai ch'il nov instrument federal "J+S-Kids" vegn introducì, vegn abolì il program chantunal respectiv che sustegneva ils uffants da 7 fin 10 onns.

En connex cun questa decisiun fundamentala per il sport da scola e d'uniuns sa tschentan las suandantas dumondas a la regenza:
1. Vegn il chantun Grischun a realisar "J+S-Kids" en las scolas?
2. A partir da cura vegn realisà en il chantun Grischun il program da promoziun "J+S-Kids" per las uniuns?
3. È il chantun Grischun en cas – areguard il persunal – da scolar er entaifer in curt temp las manadras ed ils manaders ch'èn necessaris per l'instrument da promoziun "J+S-Kids" e che ston avair qualificaziuns spezialas, e da mantegnair pli tard il manaschi da quest program da promoziun?
4. Quant enavant vegn il chantun Grischun – eventualmain ensemen cun las vischnancas u cun las federaziuns da sport – a sustegnair las uniuns tar la realisaziun dal nov concept (en spezial tar la coordinaziun da las differentas purschidas da sport)?

Cuira, ils 12 da zercladur 2008

Kunz, Bucher-Brini, Candinas, Barandun, Berther (Sedrun), Bezzola (Samedan), Bezzola (Zernez), Bischoff, Blumenthal, Brandenburger, Bundi, Caduff, Cahannes Renggli, Campell, Casparis-Nigg, Castelberg-Fleischhauer, Casty, Casutt, Caviezel (Pitasch), Caviezel-Sutter (Tusaun), Christoffel-Casty, Clavadetscher, Conrad, Darms-Landolt, Dermont, Dudli, Federspiel, Felix, Feltscher, Florin-Caluori, Gartmann-Albin, Geisseler, Hartmann (Cuira), Hartmann (Champfèr), Jaag, Jäger, Jenny, Keller, Kessler, Kleis-Kümin, Koch, Kollegger, Mani-Heldstab, Märchy-Michel (Malans), Menge, Mengotti, Michel (Tavau Monstein), Möhr, Montalta, Nick, Noi-Togni, Parolini, Parpan, Pedrini (Roveredo), Perl, Pfäffli, Pfister, Portner, Quinter, Rathgeb, Righetti, Rizzi, Sax, Stiffler, Thomann, Thöny, Trepp, Troncana-Sauer, Tscholl, Tuor, Valär, Wettstein, Furrer-Cabalzar, Locher Benguerel, Michel (Cuira), Pedrini (Soazza), Scartazzini

Session: 12.06.2008
Vorstoss: rg Anfrage

Resposta da la regenza

Er la regenza è da l'opiniun che la promoziun tempriva dal sport – che sa basa sin l'instrument da promoziun "J+S-Kids" e che vegn er tematisada en la dumonda parlamentara qua avant maun – saja da gronda impurtanza. En il rom da sia incumbensa globala e resguardond las resursas che stattan a disposiziun èsi il giavisch da la regenza da sustegnair – tras cundiziuns generalas optimalas – er quest aspect d'ina promoziun e d'in svilup che han lieu en moda cumplessiva.

Sin basa da quai pon las dumondas da l'intervenziun vegnir respundidas sco suonda:

1. La realisaziun da "J+S-Kids" è chaussa da las uniuns da sport. Las scolas pon medemamain porscher curs da sport en il rom da "J+S-Kids". "J+S-Kids" na fa dentant betg part dal plan d'instrucziun. Quai vul dir: Ina scola po, na sto dentant betg porscher quest program cumplementar.
Per persunas d'instrucziun interessadas organisescha il chantun curs da scolaziun, tras ils quals ellas pon acquistar la renconuschientscha sco manadra u sco manader da "J+S-Kids". Ultra da quai sustegna il chantun las manadras ed ils manaders tar la realisaziun da curs da sport sco er tar l'administraziun en connex cun la dumonda da survegnir contribuziuns da sustegn da la confederaziun.

2. Sur l'instrument da "J+S-Kids" pon las uniuns annunziar a partir dal 1. da schaner 2009 curs da sport. La premissa, per che curs da sport vegnian renconuschids en il rom da l'instrument da promoziun "J+S-Kids", è che las manadras e ch'ils manaders che vegnan engaschads per quest intent disponian da la renconuschientscha "Kids".

3. Per la qualificaziun cumplementara unica da las persunas ch'eran fin ussa manadras e manaders da J+S, èn vegnids mess a disposiziun l'onn 2008 ils meds finanzials necessaris tras in credit posteriur. Plinavant è vegnida engaschada ina manadra da project fin la fin da l'onn 2008. Per che las manadras e per ch'ils manaders da J+S possian sa qualifitgar vinavant a manadras ed a manaders da "J+S-Kids", stattan pia a disposiziun avunda meds persunals e finanzials. Sch'i duvrass resursas persunalas supplementaras per dar dumogn ad eventualas lavurs supplementaras, vegnissan quellas cumpensadas tras spustaments entaifer l'uffizi e/u tras adattaziuns dals andaments da lavur.

4. Per las uniuns vegn il chantun a metter a disposiziun en spezial ils suandants meds auxiliars:
- curs introductivs per manadras e per manaders: en il rom da lavuratoris emprendan las manadras ed ils manaders ad intermediar la basa da moviment e survegnan bleras ideas da trenament;
- banca da datas cun lecziuns: a las manadras ed als manaders stat a disposiziun in program d'internet, cun il qual ellas ed els pon planisar ils trenaments e preparar l'instrucziun;
- bursa cun trenaments da fufragnadi: en il rom da "J+S-Kids" èsi impurtant che las uniuns cumpletteschian lur purschidas tras trenaments da fufragnadi en autras disciplinas da sport. Per quest intent stat a disposiziun a las uniuns in program d'internet, sur il qual las persunas che porschan e che utiliseschan trenaments da fufragnadi pon contactar ina l'autra.

Datum: 21 d'avust 2008