Dapi l'avertura dal tunnel da basa dal Lötschberg hai stuì vegnir constatà ch'ils vaguns sin il traject da Turitg a Cuira èn per part vegnids remplazzads tras models pli vegls. Quai evochescha cunzunt la malcuntentientscha da las pendularias e dals pendularis dal Grischun sco er da las turistas e dals turists che arrivan en il Grischun cun la viafier.
Il Grischun è la destinaziun turistica la pli gronda en Svizra. Suenter che la lingia da la viafier retica Alvra-Bernina è vegnida recepida en la glista dal patrimoni mundial da la UNESCO, è l'attractivitad dal Grischun creschida anc pli fitg cunzunt tar las passagieras e tar ils passagiers da viafier. Quai vul dir che las frequenzas da passagieras e da passagiers vers Cuira vegnan a s'augmentar.
Per pussibilitar a las pendularias ed als pendularis sco er a las turistas ed als turists in viadi agreabel e svelt vers Cuira èsi absolutamain necessari che cumposiziuns che consistan da vaguns vegls vegnian remplazzadas p.ex. tras trens pendulins (ICN).
Ils 10 d'avust 2008 han ins pudì leger en la NZZ che las VFF publitgeschian l'atun 2008 ina concurrenza per 200 trens a dus plauns, perquai che quels porschian 40% dapli plazza. En circa 4 onns vegnan ils trens ICN remplazzads gist tras questas cumposiziuns novas. Ils trens ICN actuals vegnan alura utilisads sin auters trajects. Co e nua ch'ils trens ICN actuals duain vegnir utilisads, n'è betg anc enconuschent. Qua stuessan ins agir, per che quests trens ICN vegnian utilisads sin il traject da Turitg a Cuira.
En sia resposta dals 23 d'october 2007 a l'incumbensa Kunz scriva la regenza: "L'augment da l'attractivitad dal Grischun sco plazza turistica, economica e sco domicil pretenda ina meglra colliaziun cun la rait da viafier naziunala respectivamain internaziunala..."
La colliaziun pudess vegnir meglierada, sch'i dess pliras giadas per di trens da Cuira a Turitg e viceversa che sa fermassan mo a Landquart. Areguard il manaschi da viafier fiss quai pussaivel, perquai che las VFF provedan lur entira rait cun il sistem da controlla ETCS (european train control system). Quest sistem permetta sveltezzas pli autas ed intervals pli pitschens d'in tren al proxim.
Tras l'eventuala utilisaziun dals trens ICN sco er tras l'introducziun dal ETCS pudess il temp da viadi da Cuira a Turitg vegn reducì ad 1 ura – senza far investiziuns en la rait da viafier sco tala. E quai, perquai ch'ils trens ICN pon charrar tranter 10% e 20% pli svelt en las stortas. Ultra da quai è l'acceleraziun dals trens ICN bler pli gronda che l'acceleraziun dals trens d'intercity (IC) convenziunals.
Perquai incumbenseschan las sutsegnadras ed ils sutsegnaders la regenza:
- da s'engaschar tar la confederaziun ch'ils trens ICN, che vegnan libers, vegnianutilisads sin il traject da Turitg a Cuira;
- da s'engaschar tar la confederaziun ch'ils trens IC actuals circuleschian sin il traject da Turitg a Cuira mo cun vaguns climatisads;
- da s'engaschar tar la confederaziun ch'i dettia pliras giadas per di trens da Cuira a Turitg e viceversa che sa ferman mo a Landquart.
Cuira, ils 29 d'avust 2008
Hartmann (Cuira), Jeker, Geisseler, Baselgia-Brunner, Berther (Mustér), Bezzola (Samedan), Bezzola (Zernez), Bischoff, Blumenthal, Brantschen, Brüesch, Bucher-Brini, Buchli, Bühler-Flury, Bundi, Butzerin, Cahannes Renggli, Candinas, Casparis-Nigg, Casty, Caviezel (Pitasch), Christoffel-Casty, Claus, Clavadetscher, Conrad, Darms-Landolt, Donatsch, Dudli, Fasani, Feltscher, Frigg-Walt, Gartmann-Albin, Giovanoli, Hardegger, Hartmann (Champfèr), Jäger, Jenny, Kessler, Kleis-Kümin, Kollegger, Krättli-Lori, Kunz, Mani-Heldstab, Märchy-Michel, Marti, Meyer Persili (Cuira), Meyer-Grass (Claustra Vitg), Michel, Nick, Parolini, Parpan, Perl, Peyer, Pfäffli, Pfenninger, Pfiffner-Bearth, Pfister, Plozza, Ragettli, Stiffler, Thomann, Thöny, Thurner-Steier, Trepp, Tuor, Vetsch (Pragg-Jenaz), Wettstein, Zanetti (Li Curt), Clalüna, Engler, Fischer, Flütsch, Furrer-Cabalzar, Hartmann (Küblis), Mainetti, Schädler