Navigation

Inhaltsbereich

Dumonda Jäger concernent las cundiziuns d'admissiun al corp da la polizia chantunala (extensiun a persunas cun ina permissiun da domicil C)

Sessiun: 29.08.2008
Tenor l'art. 20 da l'ordinaziun da polizia dals 21 da zercladur 2005 (OPol; DG 613.100) fixescha la regenza tant las premissas per vegnir admess sco aspiranta u sco aspirant ad ina scola da polizia sco er la procedura da recrutaziun per la polizia chantunala dal Grischun. Tras in conclus dals 21 da zercladur 2005 ha la regenza determinà ch'i vegn premess il dretg da burgais svizzer per il servetsch da polizia.

Dapi intgins onns datti chantuns che na premettan betg pli obligatoricamain il dretg da burgais svizzer per l'admissiun a lur corps da la polizia chantunala. En il chantun Giura vegnan persunas da derivanza estra admessas al servetsch da polizia, sch'ellas han la permissiun da domicil C. Il chantun Basilea-Citad pussibilitescha a persunas estras da vegnir admessas al servetsch da polizia, sch'ellas "han las relaziuns necessarias". En la pratica vegn questa pussaivladad dada a persunas che han ina permissiun da domicil, che vivan dapi 5 fin 10 onns en il chantun, che discurran la lingua locala, che han enconuschientschas localas e ch'èn integradas. En il chantun Sviz pon persunas betg svizras far dapi l'onn 2001 la scolaziun da polizia, sch'ellas èn "assimiladas". En il chantun Genevra pon candidatas e candidats esters s'annunziar per la scola da polizia.

Er tar singuls corps da polizia municipals vegnan persunas estras cun ina permissiun da domicil C admessas al servetsch da polizia. Suenter ch'il cussegl communal da Cuira ha acceptà ils 13 da settember 2007 ina intervenziun correspundenta, stattan las plazzas da scolaziun, ch'èn reservadas a la scola da polizia da la Svizra orientala ad Amriswil per la polizia da la citad da Cuira, da princip er a disposiziun ad aspirantas ed ad aspirants cun ina permissiun da domicil C.

Gist en vista a las sfidas actualas en il sectur da l'integraziun èsi tuttavia en l'interess da la polizia d'avair polizistas e polizists che derivan da famiglias immigradas. La finala sa tracti en emprima lingia da pudair recrutar – independentamain da la naziunalitad – las persunas ch'èn las pli adattadas per il servetsch da polizia. Suenter che gia l'abilitad da far servetsch militar è vegnida stritgada dacurt sco criteri d'admissiun a la polizia chantunala, supplitgeschan las sutsegnadras ed ils sutsegnaders la regenza da respunder la suandanta dumonda:

È la regenza pronta da modifitgar il conclus menziunà dals 21 da zercladur 2005, uschia che er aspirantas ed aspirants adattads cun ina permissiun da domicil C pon vegnir admess en l'avegnir al servetsch da la polizia chantunala?

Cuira, ils 29 d'avust 2008

Jäger, Hartmann (Cuira), Meyer Persili (Cuira), Arquint, Baselgia-Brunner, Brüesch, Candinas, Claus, Feltscher, Frigg-Walt, Gartmann-Albin, Jaag, Kessler, Kollegger, Kunz, Menge, Nick, Peyer, Pfenninger, Pfiffner-Bearth, Sax, Thöny, Trepp, Wettstein, Fischer, Furrer-Cabalzar, Locher Benguerel, Mainetti


Resposta da la regenza

Tenor l'art. 31 al. 1 da la lescha da polizia (LPol; DG 613.000) fixescha la regenza l'organisaziun da la polizia chantunala. L'art. 32 fixescha plinavant ch'i vala il dretg chantunal dal persunal per polizistas e per polizists, sche la lescha da polizia e sche las disposiziuns executivas correspundentas na cuntegnan naginas disposiziuns spezialas (al. 1). Ultra da quai ston las polizistas ed ils polizists frequentar cun success ina scola da polizia e far ina empermischun (al. 3). En l'art 20 da l'ordinaziun da polizia (OPol; DG 613.100) sa resalva la regenza il dretg da fixar las premissas per vegnir admess sco aspiranta u sco aspirant en ina scola da polizia.

Cun la participaziun a la scola da polizia da la Svizra orientala ha la regenza fixà en il conclus dals 21 da zercladur 2005 (prot. nr. 766) ch'ina da las premissas per vegnir admess a la scola da polizia da la Svizra orientala – ed uschia er per vegnir recepì en il corp da polizia dal Grischun – è tranter auter il dretg da burgais svizzer. Ella sa basa en quest connex sin la directiva da la conferenza da las cumandantas e dals cumandants da polizia da la Svizra orientala (CPSO) dals 12 da matg 2004 che pretenda en ses profil d'exigenzas il dretg da burgais svizzer per pudair entrar en la scola da polizia. Ultra da quai prevesa la cunvegna davart la fundaziun e davart il manaschi d'ina scola da polizia da la Svizra orientala dal 1. d'avrigl 2005 (entrada en vigur il 1. da schaner 2006) en l'art. 11 concernent l'admissiun che las persunas che vegnan scoladas ston ademplir il profil d'exigenzas cuminaivel da las parts contrahentas.

En singuls cas han cumenzà chantuns e citads ils ultims onns d'acceptar – sut tschertas cundiziuns – er persunas estras sco polizistas u sco polizists. Da quels na fan dentant part nagins chantuns da l'intschess dal concordat da polizia da la Svizra orientala. Intgins auters corps da polizia pretendan sco minimum la permissiun da domicil C (polizia da la citad da Lucerna, polizia chantunala dal Giura, polizia da la citad da Cuira sco excepziun tar basegns dal servetsch correspundents) ed anc auters pretendan ina integraziun correspundenta e relaziuns necessarias (polizia chantunala da Basilea-Citad, polizia chantunala da Sviz) u la natiralisaziun avant che avair terminà la scola da polizia (polizia chantunala da Genevra).

Da las pretensiuns a las polizistas ed als polizists en il sectur da la migraziun e da l'integraziun prenda il plan dals roms da la scola da polizia da la Svizra orientala resguard avunda. El prevesa ina instrucziun en psicologia, en sociologia, en etica da professiun, en dretgs umans, en community policing, en dretg da persunas estras ed en rassissem. Uschia vegnan las aspirantas ed ils aspirants da polizia preparads correspundentamain per las sfidas futuras.

La finala stuessan persunas estras che vulessan far servetsch da polizia avair in aut grad d'integraziun ed esser famigliaras cun las cundiziuns da viver e cun las relaziuns en Svizra, en il chantun ed en la vischnanca. Tgi che ademplescha questas premissas, ademplescha il medem mument er las premissas per ina natiralisaziun ordinaria u facilitada. Pervia da quai dastgi vegnir spetgà che persunas estras sa laschian natiralisar avant che entrar en la scolaziun da basa. Uschia vegn promovida l'acceptanza da la polizia tar la populaziun precis uschia sco tar il corp da polizia.

La regenza è da l'avis ch'il dretg da burgais svizzer duai anc adina esser la premissa per vegnir admess a la scolaziun da basa poliziala sco er per entrar en il corp da polizia dal Grischun. Uschia resta la pussaivladad che polizistas e che polizists d'auters corps da polizia che premettan er il dretg da burgais svizzer possian midar al corp grischun. La regenza na vesa nagin motiv da desister dal dretg da burgais svizzer sco premissa d'admissiun per il corp da polizia dal Grischun.

5 da november 2008