Dumonda Blumenthal concernent la distanza da segirezza d'implants da biogas envers il territori d'abitadi
Sessiun: 29.08.2008
Per promover l'utilisaziun da purtaders d'energia regenerabla che remplazzan ils combustibels fossils e per promover ina buna pussaivladad per ina funtauna d'entradas supplementaras ston implants da biogas sin manaschis agriculs vegnir beneventads.
Tenor l'art. 16a al. 1bis da la lescha federala davart la planisaziun dal territori (LPT) po in implant da biogas vegnir permess per in manaschi agricul, sche la biomassa che vegn elavurada ha ina stretga relaziun cun l'agricultura sco er cun il manaschi, nua che quest implant sa chatta. Tenor l'art. 34a da l'ordinaziun davart la planisaziun dal territori (OPT) valan edifizis e stabiliments per producir energia or da biomassa sco confurms a la zona d'agricultura, sche tschertas premissas èn ademplidas.
Implants da biogas che vegnan manads da bains purils èn en funcziun en in pèr lieus en il Grischun. Quels sa chattan en ina distanza relativamain gronda envers il territori d'abitadi. Da nov datti l'intenziun da construir in implant da biogas directamain sper il territori d'abitadi en la zona dal vitg e betg sin in bain puril liber.
Tar la producziun e tar l'utilisaziun da biogas datti numerus privels e differentas ristgas. Per giuditgar ils aspects da segirezza per implants da biogas agriculs vegnan applitgads en Svizra las publicaziuns da la SUVA "Sichere Biogas-Anlagen" (66055.D, 1993), il rapport nr. 530 / 1999 "Sicherheitsregeln für landwirtschaftliche Biogasanlagen" da l'institut federal da perscrutaziun per economia e tecnologia agrara a Tänikon (FAT) e la publicaziun da la SUVA "Explosionsschutz Grundsätze Mindestvorschriften Zonen" (2153.3, october 2005). Il rapport dal FAT sa referescha al stadi da la tecnica da l'onn 1998 ed è antiquà en quest senn. Las reglas da segirezza duain vegnir adattadas cuntinuadamain al stadi actual da la tecnica e las experientschas che vegnan fatgas duain vegnir resguardadas. En questas publicaziuns mancan en spezial indicaziuns davart las distanzas da segirezza envers ils territoris d'abitadi. Ina controlla dals aspects da segirezza po vegnir fatga provisoricamain sin basa da las reglas che vegnan applitgadas en la UE per implants da biogas.
Da la Germania enconuschan ins incaps en implants da biogas che mussan che avarias pon chaschunar grondas destrucziuns cun ils donns finanzials correspundents, dentant er cun consequenzas mortalas. Tenor la federaziun spezialisada tudestga Biogas e.V. eran 3'700 implants da biogas en funcziun en Germania il settember 2007. En connex cun quests implants enconuschan ins fin ussa quatter explosiuns. Quai mussa che la probabilitad d'ina explosiun è relativamain pitschna. La pussaivladad ch'i dettia in'explosiun exista dentant en mintga cas. Per construir in implant da biogas èsi pervia da quai absolutamain necessari d'evaluar in lieu da staziunament che ha ina distanza envers il territori d'abitadi ch'è gronda avunda per evitar uschia che umans en ils proxims conturns vegnian periclitads d'ina avaria.
En quest connex vegn la regenza supplitgada da respunder las suandantas dumondas:
1. È la regenza er da l'avis che las "Sicherheitsregeln für landwirtschaftliche Biogasanlagen" dal FAT sajan insuffizientas per giuditgar implants da biogas che sa chattan en vischinanza directa dal territori d'abitadi?
2. È la regenza er da l'avis che implants da biogas èn – en cas d'ina avaria – in privel potenzial per la vita e per la sanadad sco ch'i vegn documentà tras incaps?
3. È la regenza pronta da pretender en la procedura EOZ per implants da biogas en la vischinanza da territoris d'abitadi ina distanza ch'è gronda avunda per che la vita e la sanadad da las abitantas e dals abitants n'èn betg periclitadas e per che l'evaluaziun d'in lieu da staziunament per tals implants vegnia fatga cun in'attenziun speziala?
Cuira, ils 29 d'avust 2008
Blumenthal, Caduff, Berther (Sedrun), Cavigelli, Conrad, Geisseler, Keller, Kollegger, Montalta, Pfister, Portner, Quinter, Thurner-Steier
Resposta da la regenza
Implants da biogas produceschan in gas che po vegnir duvrà per far energia. Quest gas ha qualitads che sumeglian quellas dal gas natiral, cur ch'el sorta da la funtauna. Biogas che vegn furnì ad ina rait da distribuziun u che vegn duvrà sco carburant sto vegnir elavurà sco il gas natiral da la funtauna. Tals gas ston vegnir tractads cun la precauziun duida, cun l'equipament respectiv e cun las mesiras adattadas, per che las consequenzas da disturbis da la funcziun u d'accidents restian en in rom supportabel. Per pudair far in giudicament correct da tals privels e da talas ristgas en il cas singul ston vegnir resguardads differents facturs d'influenza. Latiers tutgan la moda da construcziun, la direcziun da la distgargia ed ils conturns. Ultra da la ristga d'explosiun gioga er il tractament da las substanzas nuschaivlas ch'il biogas cuntegna ina rolla. Sin basa da l'experientscha da blers onns en spezial cun l'utilisaziun da gas da citad en aglomeraziuns pon vegnir surpigliadas per gronda part las reglas renconuschidas per implants da pressiun bassa.
Dumonda 1
Il rapport da l'institut federal da perscrutaziun per economia e tecnologia agrara a Tänikon (FAT) "Sicherheitsregeln für landwirtschaftliche Biogasanlagen" (nr. 530 / 1999) è ina resumaziun da las reglas las pli impurtantas per il tractament da biogas. El sa basa e renviescha a las directivas da las organisaziuns spezialisadas respectivas che s'occupan detagliadamain cun ils differents aspects parzials che ston vegnir resguardads tar in implant da biogas. Il stadi da la tecnica preschentà n'è betg antiquà, i na basta dentant betg da sa basar mo sin questa resumaziun per tractar definitivamain tut ils aspects.
Dumonda 2
Er la regenza è da l'avis che implants da biogas possian esser in privel potenzial, tut tenor lur stadi da funcziun. L'uffizi federal d'energia (UFE) ha infurmà ils 5 da favrer 2008 ch'el haja dà l'incumbensa d'analisar las ristgas che stattan en connex cun il manaschi d'implants da biogas. Ils resultats da questa analisa n'èn dentant anc betg avant maun. Dal puntg da vista da la regenza èn els indispensabels per giuditgar definitivamain il potenzial da periclitaziun che sorta d'implants da biogas.
Dumonda 3
La regenza ha l'intenziun e sa stenta da procurar en il rom da las proceduras existentas che las distanzas da segirezza d'implants da biogas sajan grondas avunda. Las vischnancas pon sustegnair quest giavisch cun controllar ch'ils documents da las dumondas EOZ sajan cumplets.
Tenor il fegl d'infurmaziun da la SUVA "Explosionsschutz - Grundsätze, Mindestvorschriften, Zonen" stoi vegnir cumprovà en in document – avant che metter en funcziun l'implant – che las prescripziuns da la protecziun en cas d'ina explosiun sajan ademplidas. En quest connex ston vegnir eruidas las ristgas d'explosiun, previsas mesiras (manaschialas) adattadas e fixadas directivas per il manaschi. La regenza è da l'avis ch'in document concernent la protecziun en cas d'ina explosiun stoppia esser ina part integrala dals documents d'ina dumonda EOZ. Mesiras architectonicas da protecziun sco distanzas da segirezza envers ils edifizis dals conturns ston – tenor il rapport dal FAT nr. 530 – vegnir giuditgadas en il cas singul. Tenor l'opiniun da la regenza ston er questas distanzas da segirezza envers ils edifizis ed envers las vias dals conturns vegnir controlladas sin basa da l'analisa da ristgas ch'è vegnida iniziada dal UFE e cumprovadas en il rom da la dumonda EOZ.
27 d'october 2008