Dumonda Gartmann-Albin concernent la tschertga posteriura tar la chatscha auta
Sessiun: 20.10.2008
Displaschaivlamain datti adina puspè il cas tar la chatscha che selvaschina vegn mo blessada d'in sajet.
La tschertga posteriura vegn alura fatga per regla da chatschadras e da chatschaders cun chauns da sang scolads ch'èn registrads sin ina glista da pichet.
Sch'in animal selvadi vegn ussa blessà d'in sajet, na dastga l'organ da surveglianza da chatscha dal lieu betg cumenzar a far la tschertga posteriura cun ses chaun da sang, perquai ch'i ston vegnir clamads las chatschadras ed ils chatschaders da la glista da pichet. E quai er, sche l'organ da surveglianza da chatscha avess temp per far la tschertga posteriura. Per ils territoris giu da via dovran las chatschadras ed ils chatschaders menziunads savens bler temp fin ch'ellas e ch'els èn al lieu. Sche l'animal selvadi vegn blessà d'in sajet curt avant il far notg, cumenzan ins cun la tschertga posteriura savens pir il proxim di. Per l'animal blessà vul quai dir da patir nunnecessariamain uras a la lunga.
Pervia da quai ans drizzain nus a la regenza cun las suandantas dumondas:
1. N'è la regenza betg er da l'avis che la selvaschina ch'è vegnida blessada d'in sajet stuess vegnir tschertgada e sajettada uschè svelt sco pussaivel per che sia suffrientscha na vegnia betg prolungada nunnecessariamain?
2. Co è organisada la tschertga posteriura en il chantun, co vegn fatga la scolaziun dal chaun e da la manadra u dal manader dal chaun, quant gronda è la quota da success?
3. È la regenza er da l'avis ch'i duess vegnir clamà l'emprim – en spezial en valladas giu da via – l'organ da surveglianza da chatscha, sch'el ha in chaun da sang scolà. Quel po alura decider sez, sch'el ha temp da far la tschertga posteriura e sch'el cumenza a la far u sch'el vul clamar ina chatschadra u in chatschader cun in chaun da sang? Tge è il motiv per la regulaziun, tenor la quala l'organ da surveglianza da chatscha cun chaun da sang dastga vegnir clamà pir en segunda lingia per la tschertga posteriura?
4. Tge pussaivladads vesa la regenza per optimar la tschertga posteriura durant la chatscha auta en il Grischun ed eventualmain la scolaziun da la chatschadra u dal chatschader per che la selvaschina ch'è vegnida blessada d'in sajet vegnia liberada uschè svelt sco pussaivel da sia suffrientscha?
Cuira, ils 20 d'october 2008
Gartmann-Albin, Frigg, Baselgia-Brunner, Bucher-Brini, Jäger, Menge, Meyer Persili (Cuira), Pfenninger, Pfiffner-Bearth, Thöny, Trepp, Locher Benguerel, Michel (Cuira)
Session: 20.10.2008
Vorstoss: rg Anfrage
Resposta da la regenza
1. Animals blessads, independentamain, sch'els èn vegnids sajettads malsauns u sch'els èn vegnids blessads tar in accident da traffic, ston – tenor l'avis da la regenza – vegnir spendrads uschè svelt sco pussaivel da lur suffrientscha. Quai na signifitgescha dentant betg en mintga cas, ch'ins sto cumenzar immediatamain cun la tschertga posteriura. Tut tenor la blessura, la topografia, l'aura e las uras dal di poi esser pli raschunaivel tant sut l'aspect da la tschertga sco er sut l'aspect da la protecziun da l'animal, da spustar il cumenzament da la tschertga posteriura perfin per pliras uras. Perquai ch'ina tschertga precipitada po scurrentar la selvaschina e chatschar ella anc ina giada en ina fugia dolurusa. Uschia vegn il success da la tschertga posteriura insumma mess en dumonda.
2. Avant lur emprim engaschament absolvan ils chauns da sang e lur manadras e lur manaders ina fasa da scolaziun intensiva cun blers exercizis pratics. Questa scolaziun vegn terminada cun in examen. Ultra da quai han ils chauns da sang e lur manadras e lur manaders da frequentar almain dus dis d'exercizi per onn. La scolaziun, l'examen e l'organisaziun dals dis d'exercizi vegnan fatgas en stretga collavuraziun cun il club grischun da chauns da sang. La quota da success en cas da tschertgas posteriuras importa stgars 60 pertschient. En cas da bleras tschertgas sa tracti d'uschenumnadas tschertgas da controlla che vegnan fatgas – per motivs da l'etica da chatscha – sch'in animal n'è forsa betg vegnì mazzà, dentant mo blessà.
3. L'organisaziun existenta cun chauns da sang ch'èn attribuids a centralas operativas regiunalas è sa cumprovada da princip. Per tschertgas posteriuras durant la chatscha auta sa mettan a disposiziun circa 120 chatschadras e chatschaders cun lur chauns. Uschia pon las dumondas da chauns da sang per regla vegnir ademplidas. Sche chatschadras e sche chatschaders dumondan in chaun da sang cun manadra u cun manader, vegn quel attribuì ad ellas ed ad els tras ina da las 11 centralas operativas regiunalas. L'attribuziun vegn fatga da las centralas operativas, e quai resguardond las relaziuns concretas sco l'urgenza e la disponibladad. La finamira principala è e resta quella d'evitar che la selvaschina blessada stoppia patir nunnecessariamain. Ultra da quai possedan circa 30 guardiaselvaschinas u survegliaders da chatscha in chaun da sang. Durant la chatscha ston ils organs da surveglianza da chatscha ademplir en emprima lingia incumbensas da surveglianza. Pervia da quai entran ils guardiaselvaschinas ed ils survegliaders da chatscha en acziun mo en cas extraordinaris per far tschertgas posteriuras. En quest connex ston vegnir numnadas tschertgas posteriuras en asils da selvaschina suenter accidents da traffic u en il rom da retschertgas da la polizia da chatscha. En cas da circa 700 tschertgas posteriuras poi – per motivs evidents – dar en cas singuls che la situaziun na vegn tuttina betg valitada correctamain. Sin basa da la dumonda qua avant maun duain ils process e las cumpetenzas ch'èn da princip sa cumprovads vegnir examinads ed i duai vegnir prendì en consideraziun sch'i dettia forsa pussaivladads per meglierar l'urden da las tschertgas posteriuras.
4. Il princip suprem da l'etica da chatscha è quel da mazzar directamain la selvaschina cun in culp precis e mortal, senza ch'ella stoppia patir. Pervia da quai ston las chatschadras ed ils chatschaders exercitar lur segirezza da culp sco er ir a trair per regular lur armas da chatscha. L'uffizi da chatscha e pestga sa stenta er d'augmentar la quota da success dals chauns da sang e da lur manadras e da lur manaders. Pervia da quai vegnan la scolaziun e la furmaziun supplementara da las manadras e dals manaders da chauns da sang promovidas intensivamain. Latiers tutga l'evaluaziun sistematica dals protocols da las tschertgas posteriuras. Uschia pon vegnir intermediadas enconuschientschas impurtantas ed experientschas praticas a las manadras ed als manaders dals chauns da sang. E la finala vegn dada ina gronda paisa a la scolaziun ed a la furmaziun supplementara da las chatschadras e dals chatschaders, ch'ellas e ch'els sa cumportian correctamain avant e suenter il culp.
9 da schaner 2009