Navigation

Inhaltsbereich

Dumonda Menge concernent la creaziun da punts verdas e da sutpassadis per la selvaschina per lung da la A13

Sessiun: 21.10.2008
La A13 traversa il chantun Grischun davent dal cunfin cun il chantun Son Gagl fin al cunfin cun il chantun Tessin. La via naziunala è intransibla per la selvaschina.
In team da perscrutadras e da perscrutaders da l'institut federal per la perscrutaziun da guaud, naiv e cuntrada a Birmensdorf (GNC) ha fatg analisas ed è arrivà a la conclusiun che p.ex. chavriels ch'èn separads in da l'auter tras in'autostrada u tras trassés da viafier, sa distinguan en lur patrimoni genetic.

Sche la fragmentaziun dal spazi da viver impedescha la migraziun dals animals, smanatscha a lunga vista la reproducziun tranter consanguins. Quai avess per consequenza che animals cun in patrimoni genetic unilateral reagissan mo malamain sin midadas ecologicas, sin parasits u sin novas malsognas, uschia che l'effectiv fiss periclità. Sch'ins permetta en il futur a la selvaschina (d'ungla) che viva isolada puspè da migrar pli savens e da sa maschadar cun auters effectivs, po vegnir abolì l'effect da las vias da traffic. Per quest intent basegni dentant colliaziuns sco punts verdas resp. punts da selvaschina e sco sutpassadis per ils spazis da viver isolads. En Svizra datti actualmain 25 vias da colliaziun da selvaschina da quest gener.

En la media naziunala demussa il chantun Grischun in aut grad da fragmentaziun. Colliaziuns per la selvaschina ch'èn construidas sur u sut terra na datti betg.

Perquai supplitgesch jau la regenza da respunder las suandantas dumondas:
1. Tge posiziun ha la regenza visavi la problematica descritta?
2. È la regenza pronta da prender mesiras architectonicas correspundentas en furma da punts per la selvaschina e da sutpassadis per lung da la A13?
3. Quantas vias da colliaziun per la selvaschina per lung da la A13 paran raschunaivlas a la regenza?
4. Cun tge custs èsi da far quint?
5. Pon vegnir deliberads daners da la confederaziun per quest intent?
6. Sche la construcziun da vias da colliaziun per la selvaschina duess esser chaussa da la confederaziun, è la regenza pronta d'intervegnir tar la confederaziun e da s'engaschar a favur da la construcziun da punts verdas e da sutpassadis?

Cuira, ils 21 d'october 2008

Menge, Casutt, Bucher-Brini, Frigg, Gartmann-Albin, Jenny, Keller, Koch, Kunz, Perl, Piffner-Bearth, Pfister, Thöny, Toschini, Trepp, Candinas (Mustér), Michel (Cuira), Züst

Session: 21.10.2008
Vorstoss: rg Anfrage

Resposta da la regenza

En Svizra ed en l'entira Europa centrala è la fragmentaziun dals spazis da viver tras l'infrastructura, tras ils abitadis e tras ils stabiliments industrials pelvaira in problem che po avair consequenzas sco p. ex. l'influenza negativa dal pool genetic da las populaziuns localas d'animals selvadis (isolaziun, reproducziun tranter consanguins e.u.v.). I na constat dentant betg ch'il chantun Grischun demussa in aut grad da fragmentaziun en la cumparegliaziun naziunala. Entaifer la Svizra èn ils gronds chantuns alpins ed en spezial il Grischun pertutgads cleramain main ferm da questa problematica. Il rapport da basa davart la colliaziun surregiunala dals spazis da viver di explicitamain concernent ils corridors per ils animals selvadis (uffizi federal d'ambient, guaud e cuntrada, UFAGC 2001): "La cuntrada en ils chantuns alpins ha per gronda part numerusas structuras ecologicas preziusas e demussa savens in aut grad da colliaziun. (…) Cun excepziun da tscherts trajects d'autostrada, èn ils meds da traffic plitost ina pitschna barriera per ils animals selvadis."

Tenor l'inventari naziunal vegnan menziunads per il Grischun nov corridors per animals selvadis ch'èn d'impurtanza surregiunala. Da quels vegnan dus interruts tras la via naziunala A13, numnadamain ils corridors da Maiavilla e da Haldenstein.

Davart las dumondas concretas s'exprima la regenza sco suonda:

1. La regenza prenda serius questa problematica. Perquai èn ils corridors per animals selvadis er vegnids registrads en il plan directiv chantunal. En tut las activitads da planisaziun duai uschia vegnir resguardà ch'ils secturs d'influenza da quests corridors vegnian tegnids libers.

2. En collavuraziun cun ils uffizis chantunals pertutgads ha l'uffizi da construcziun bassa dal Grischun gia instradà la sanaziun dal corridor interrut a Haldenstein. Igl è vegnì planisà da fusiunar ils vials dal nord e dal sid da la A13 al nord da Cuira ed en quest connex èsi previs da construir in passadi per animals selvadis en il sectur dal Halbmil. La realisaziun da questa e d'ulteriuras punts verdas è chaussa da l'uffizi federal da vias (UVIAS), perquai che la confederaziun ha surpiglià suletta la responsabladad per las vias naziunalas suenter l'entrada en vigur da la NGF.

3. Per lung da la A13 existan set corridors per animals selvadis d'impurtanza surregiunala. En il futur ston ins avair dapli quità ch'ils corridors existents, che n'èn anc betg interruts, vegnian valurisads areguard lur permeabilitad. I fiss er impurtant da sanar il segund corridor interrut tranter Sargans e Landquart.

4. Ina stimaziun seriusa dals custs per tut las mesiras desiderablas na po betg vegnir fatga sin fundament da la basa ch'è oz avant maun. La situaziun da partenza sco er las cundiziuns generalas sa distinguan considerablamain tar mintga project. Sulettamain il preventiv dals custs dal passadi per animals selvadis al Halbmil (A13) importa circa 11 milliuns francs.

5. Sco gia menziunà è la confederaziun suletta responsabla a partir dal 1. da schaner 2008 per la rait da vias naziunalas. Quai vala er per projectar e per construir colliaziuns a favur da corridors per animals selvadis per lung da la A13.

6. La regenza vul l'emprim spetgar tge consequenzas ch'i dat suenter la realisaziun dal passadi per animals selvadis al Halbmil. Sin basa da quai duai alura vegnir examinà e determinà – ensemen cun la confederaziun – l'ulteriur proceder, en spezial pertutgant il corridor interrut tranter Sargans e Landquart.

7 da schaner 2009