I constat ch'i ha dà l'emprima fin d'emna da l'october 2008 tar il transport d'autos al Veraina temps da spetga da fin a trais uras. Las singulas dumondas pon vegnir respundidas sco suonda:

1. L'urari permetta dad agiuntar al tact publitgà d'ina mes'ura in'ulteriura colliaziun per ura e per direcziun. En quest connex sto dentant vegnir resguardà il temp da preparaziun che vegn duvrà per quest intent. Cunquai che la locomotiva sto l'emprim vegnir transferida a Selfranga e cunquai ch'i sto vegnir clamà al servetsch ulteriur persunal per la locomotiva, importa quest temp circa 6 uras.

2. La viafier retica ha avunda material rullant per il cas regular. La fin d'emna en dumonda circulavan dentant mo 8 – 10 vaguns da transport per autos, empè da 12 – 13 per tren, perquai ch'ina part sa chattava en il mantegniment ordinari. Pervia da questas lavurs da mantegniment n'èsi betg stà pussaivel da manar natiers quests vaguns a curta vista. Las cumposiziuns dal Veraina vegnan adattadas a las infrastructuras da chargiar ch'èn disponiblas. Cun las infrastructuras existentas n'èsi betg pussaivel da prolungar ils trens, uschiglio na pon els betg pli vegnir chargiads u stgargiads. Durant las fins d'emna da gronda dumonda poi adina puspè capitar ch'i dat temps da spetga pli lungs, malgrà che tut il material rullant circulescha. Il cunfin teoretic da la capacitad munta a maximalmain 5'828 vehichels (mo autos da persunas) per di. L'onn 2007 han dapli che 440'000 vehichels utilisà questa colliaziun. Uschia èn las frequenzas ch'eran planisadas avant la construcziun dal Veraina vegnidas surpassadas considerablamain.

3. Cun la circulaziun da trais trens per transportar autos per ura e per direcziun cun mintgamai 12 – 13 vaguns è il cunfin da la capacitad cuntanschì. La prolungaziun dals trens u la concentraziun da la purschida è mo pussaivla cun investiziuns supplementaras en l'infrastructura ed en il material rullant. Questas investiziuns na po la VR dentant betg finanziar cun agid da retgavs ch'èn vegnids generads al martgà. Quai vala tant pli che l'indemnisaziun actuala da la confederaziun per il transport d'autos tras il Veraina dastgass scrudar en l'avegnir. En vista al dumber relativamain pitschen dals dis da grond traffic cun temps da stagnaziun na sa lascha in engrondiment massiv da l'infrastructura dal Veraina betg giustifitgar per motivs da l'economia da manaschi. L'onn 2009 prenda la VR dentant per mauns in project general per examinar mesiras ch'èn finanzialmain supportablas e che gidan a meglierar la situaziun al Veraina.

7 da schaner 2009