Navigation

Inhaltsbereich

Dumonda Pfäffli concernent la nova lescha federala davart la lavur illegala

Sessiun: 22.10.2008
Dapi il schaner 2008 è la nova lescha federala davart la lavur illegala en vigur. La finamira da questa lescha è quella da cumbatter la lavur illegala cun agid d'ina procedura simplifitgada areguard l'annunzia da forzas auxiliaras, cun agid da dapli controllas tras ils chantuns, cun agid da sancziuns pli rigurusas tar cuntravenziuns e cun agid d'ina campagna da sensibilisaziun dal secretariat da stadi per l'economia (SECO).

Da nov èn tut las forzas auxiliaras obligadas da pajar taxas sin lur entradas. L'anteriur import liber da 2'000 francs per onn croda. Percunter ha il SECO stgaffì ina procedura che permetta a las persunas privatas ed a las firmas pitschnas dad annunziar las forzas auxiliaras en moda pli simpla: ellas pon liquidar las formalitads cun in sulet formular, sche l'indemnisaziun da lur emploiadas e da lur emploiads importa main che 19'800 francs per onn u sche la summa totala dals salaris da las persunas engaschadas importa main che 53'040 francs. La gruppa principala ch'è pertutgada da questa regulaziun èn bain per gronda part persunas privatas che duessan registrar lur emploiadas e lur emploiads per il servetsch da chasa tar il post cumpetent.

En quest connex vegn la regenza supplitgada da respunder las suandantas dumondas:
1. Po la regenza far indicaziuns davart il dumber da las annunzias ch'èn gia vegnidas inoltradas quest onn tar il post cumpetent sin fundament da la situaziun giuridica modifitgada?
2. Datti forsa er cifras davart annunzias che derivan da regiuns che registreschan in grond dumber da forzas da lavur che turnan mintga di enavos en lur lieu da domicil ester?
3. La lescha davart la lavur illegala e las mesiras accumpagnantas concernent la libra circulaziun da persunas pretendan dapli controllas tras ils chantuns. Co realisescha il chantun Grischun questas controllas? Quant persunal vegn engaschà per quest intent?
4. Il SECO organisescha ina campagna da sensibilisaziun per cumbatter la lavur illegala. Co vegnan las persunas che possedan in'abitaziun secundara integradas en questa campagna en noss chantun?

Cuira, ils 22 d'october 2008

Pfäffli, Parolini, Tuor, Arquint, Barandun, Bezzola (Samedan), Bezzola (Zernez), Blumenthal, Brandenburger, Buchli, Bühler-Flury, Caduff, Campell, Casparis-Nigg, Casty, Casutt, Cavigelli, Clavadetscher, Donatsch, Fallet, Fasani, Federspiel, Feltscher, Giovanoli, Hardegger, Hartmann (Cuira), Hartmann (Champfèr), Jenny, Keller, Kessler, Koch, Kollegger, Krätlli-Lori, Kunz, Mani-Heldstab, Marti, Mengotti, Meyer-Grass (Claustra Vitg), Michel (Tavau Monstein), Nick, Niederer, Parpan, Pedrini, Peer, Perl, Plozza, Ragettli, Rizzi, Sax, Stiffler, Tenchio, Thomann, Toschini, Trepp, Troncana-Sauer, Valär, Vetsch (Claustra Vitg), Vetsch (Pragg-Jenaz), Wettstein, Candinas (Mustér), Degonda, Furrer-Cabalzar, Gunzinger, Strimer, Züst


Resposta da la regenza

1. L'annunzia per la procedura da rendaquint simplifitgada sto vegnir fatga tar la cassa da cumpensaziun da la AVS da l'institut d'assicuranza sociala dal chantun Grischun u tar ina da las cassas da cumpensaziun da las differentas federaziuns che n'èn per part betg domiciliadas en il chantun Grischun. Ins dastga supponer che la gronda part da las annunzias – cunzunt quellas da las chasadas privatas – vegnian fatgas tar la cassa chantunala da cumpensaziun da la AVS. Tenor l'infurmaziun dal post numnà, èn vegnidas fatgas ca. 150 annunzias dapi il cumenzament da l'onn.

2. Perquai che la cassa da cumpensaziun da la AVS na dispona betg da las adressas da domicil da las forzas da lavur che vegnan occupadas, stuess mintga cas singul vegnir examinà separadamain per respunder questa dumonda. La cassa da cumpensaziun parta dal fatg che mo paucas cunfinarias e che mo paucs cunfinaris vegnian calculads cun il sistem da rendaquint simplifitgà.

3. Tenor la cunvegna tranter la confederaziun ed il chantun Grischun concernent l'execuziun da la lescha davart la lavur illegala engascha il Grischun 150 pertschient da plazzas per l'activitad d'inspecziun. Las resursas da persunal effectivas per questa incumbensa èn pli autas. Las controllas per cumbatter la lavur illegala e las mesiras accumpagnantas en branschas senza contracts collectivs da lavur generalmain impegnativs vegnan realisadas da l'uffizi chantunal per industria, mastergn e lavur (UCIML). Perquai che las incumbensas executivas en ils secturs numnads èn sumegliantas u schizunt per part identicas, examineschan las controlladras ed ils controlladers dal martgà da lavur dal UCIML – en il rom da las controllas dals manaschis e dals plazzals – a medem temp che la lescha davart la lavur illegala e che la lescha federala davart las mesiras accumpagnantas vegnian observadas. Cun reunir las incumbensas da controlla vegnan d'ina vart distgargiadas las interpresas, perquai ch'ellas ston vegnir controlladas mo ina giada per omadus champs da regulaziun. Da l'autra vart maina questa reuniun ad in'execuziun pli effizienta. Tut en tut stattan a disposiziun al UCIML 400 pertschient da plazzas per exequir las mesiras accumpagnantas e la lescha davart la lavur illegala.

- Manader da partiziun                      50 pertschient da plazzas
- 3 inspecturs dal martgà da lavur    300 pertschient da plazzas
- Secretariat e servetsch giuridic       50 pertschient da plazzas

4. En il Grischun na vegni betg realisà ina campagna da sensibilisaziun specifica per cumbatter la lavur illegala ch'è destinada a las persunas che possedan in'abitaziun secundara.

26 da november 2008