Cun la midada da la lescha federala davart l'assicuranza da malsauns (LAM) ch'è vegnida concludida ils 21 da december 2007 da las chombras federalas vegn prescrit a las parts contrahentas (ospitals ed assicuranzas da malsauns) d'indemnisar il tractament staziunar en in ospital u en ina chasa da parturir il pli tard a partir dal 1. da schaner 2012 tras pauschalas che sa drizzan tenor la prestaziun e che sa basan sin structuras ch'èn unitaras en l'entira Svizra. Per quest intent ston ils partenaris da tariffa incaricar ensemen cun ils chantuns in'organisaziun che s'occupa da l'elavuraziun e dal svilup sco er da l'adattaziun e da la tgira da las structuras. Ils partenaris da tariffa ston suttametter al cussegl federal las structuras sco er las adattaziuns che l'organisaziun ha elavurà.

Ils partenaris da tariffa ed ils chantuns, che vegnan represchentads da la conferenza svizra da las directuras e dals directurs chantunals da sanadad (CDS), han concludì che la structura da tariffas ch'è unitara en l'entira Svizra duai sa basar sin in sistem per classifitgar pazientas e pazients che sa referescha a la diagnosa ("Diagnosis Related Groups" resp. "DRG") per l'indemnisaziun pauschala da las prestaziuns. Per quest intent han els fundà ina societad anonima d'utilitad publica, numnadamain la SwissDRG SA. Questa organisaziun ha l'incumbensa, ch'è prescritta da la LAM, d'elavurar ina structura da tariffas sin basa da la "DRG" e ch'è unitara en l'entira Svizra.

"DRG" è in sistem che classifitgescha las pazientas ed ils pazients che vegnan tractads en moda staziunara en gruppas omogenas areguard la medischina e cun custs da tractament sumegliants. Il criteri da classificaziun è la diagnosa principala il mument da l'extrada da l'ospital. Quella po vegnir cumplettada cun diagnosas secundaras. Mintga cas po vegnir attribuì mo ad ina "DRG". Tut tenor il grad da grevezza dals cas da malsogna che la singula "DRG" cumpiglia tutga a quella ina tscherta grevezza da custs. L'indemnisaziun da l'ospital na vegn betg calculada tenor la prestaziun da tgira che vegn effectivamain furnida e tenor il temp che la pazienta u ch'il pazient sto star en l'ospital, mabain en moda pauschala tenor la "DRG", a la quala la pazienta u il pazient è vegnì attribuì, e tenor la grevezza da custs da questa "DRG".

Il sistem da "DRG" po – sco er tut ils auters sistems d'indemnisaziun che s'orienteschan a la prestaziun – manar a la reducziun da la qualitad dal provediment terapeutic en ospitals u incitar ils ospitals da relaschar baud las pazientas ed ils pazients. Sche las pazientas e sch'ils pazients restan durant in temp pli curt en l'ospital, po quai da sia vart manar ad in augment dal dumber da reospitalisaziuns.
Tenor la posiziun da l'avust 2008 da la cumissiun naziunala d'etica en il sectur da la medischina umana èsi urgentamain necessari – per garantir ina controlla da la qualitad expressiva – d'installar in studi ch'è concepì en moda vasta per accumpagnar l'introducziun da pauschalas pro cas che sa refereschan a la diagnosa en ils ospitals. Il studi accumpagnant duai mussar las consequenzas dal sistem da "DRG" sin la qualitad dal provediment clinic, sin ils custs ed oravant tut sin ils stadis da sanadad da las differentas gruppas da pazientas e da pazients.

En connex cun l'introducziun da las pauschalas pro cas da la SwissDRG ha il cussegl d'administraziun da la SwissDRG SA concludì a chaschun da sia sesida dals 6 da favrer 2009 da far quests studis en il senn d'ina observaziun accumpagnanta. El ha incumbensà il secretariat d'elavurar in concept correspundent ensemen cun represchentantas e cun represchentants da las acziunarias e dals acziunaris sco er cun partenarias e cun partenaris adattads or da la scienza.

La regenza parta dal fatg che cun las prescripziuns dal cussegl d'administraziun da la SwissDRG SA vegnia ademplì il giavisch da la cumissiun naziunala d'etica en il sectur da la medischina umana.

Resposta a las dumondas

1. Gea, uschenavant che quai vegn fatg cun agid dal studi accumpagnant ch'è vegnì concludì dal cussegl d'administraziun da la SwissDRG SA.

2. SwissDRG è in project naziunal. Las mesiras accumpagnantas ston perquai vegnir concepidas en moda unitara en l'entira Svizra. La regenza è da l'avis ch'i na saja betg raschunaivel da realisar separadamain resp. supplementarmain mesiras accumpagnantas en il chantun.

3. Na. Contactar la cumissiun naziunala d'etica en il sectur da la medischina umana ed etablir in studi accumpagnant independent èn incumbensas da l'organisaziun ch'è vegnida incaricada dals partenaris da tariffa e dals chantuns en il senn da las prescripziuns da la LAM per introducir SwissDRG.

6 da mars 2009