Navigation

Inhaltsbereich

Sessiun: 10.02.2009
Sco ch'ins sa prevesa la regenza da construir a Cuira in edifizi da l'administraziun cun 600 fin 800 plazzas da lavur per l'administraziun chantunala. Il chantun ha gia acquistà il terren necessari a la Ringstrasse e prepara ussa la concurrenza per in edifizi che duai ademplir las grondas pretensiuns energeticas ed architectonicas.

Per ch'ins possia far in giudicament cumplessiv dal puntg da vista da l'economia publica, supplitgain nus la regenza da respunder las suandantas dumondas, avant ch'ella lascha elavurar in project:

1. Èsi vegnì fatg ponderaziuns, tge consequenzas che l'edifizi nov da 600 fin 800 plazzas da lavur en biros, respectivamain tge consequenzas che la perdita da questas localitads da biro ha per il martgà d'immobiglias da Cuira e conturns?

2. Tge consequenzas ha la perdita dals biros dads en locaziun respectivamain tge consequenzas ha la transfurmaziun da las localitads da biro en abitaziuns per la rendita netta da la cassa da pensiun chantunala, e tgi paja las eventualas transfurmaziuns?

3. La gronda part da las plazzas da lavur en biros sa chattan en il center da Cuira ed en ina distanza da circa 10 minutas a pe davent da la staziun principala. Ussa duain questas plazzas da lavur vegnir transferidas a l'ur da la citad. Schebain ch'il nov edifizi da l'administraziun duai ademplir "grondas pretensiuns energeticas", stoi vegnir fatg quint cun in augment dal traffic individual. Èsi vegnì fatg en quest senn ina bilantscha ecologica cumplessiva, e co sa preschenta quella?

4. Cun reunir plirs uffizis e plirs departaments duai la collavuraziun vegnir simplifitgada e meglierada. Èsi oz insumma necessari da reunir differents posts da servetsch en in lieu, malgrà ils meds da communicaziun moderns, u na pudess ina meglra collavuraziun betg plitost vegnir cuntanschida cun autras structuras da gestiun?

Cuira, ils 10 da favrer 2009

Nigg, Claus, Tenchio, Arquint, Baselgia-Brunner, Berni, Bleiker, Blumenthal, Bondolfi, Brandenburger, Brantschen, Brüesch, Bucher-Brini, Buchli, Butzerin, Caduff, Cahannes Renggli, Candinas, Casty, Donatsch, Fallet, Fasani, Feltscher, Frigg-Walt, Gartmann-Albin, Giovanoli, Hardegger, Hartmann (Cuira), Jäger, Kessler, Kunz, Loepfe, Märchy-Michel, Meyer Persili (Cuira), Möhr, Niederer, Pedrini, Peer, Peyer, Pfiffner-Bearth, Plozza, Stiffler, Thöny, Thurner-Steier, Trepp, Tscholl, Hartmann (Küblis), Locher Benguerel, Loi, Züst

Session: 10.02.2009
Vorstoss: rg Anfrage

Resposta da la regenza

La strategia d'immobiglias dal chantun metta pais sin centers administrativs regiunals e rinforza uschia las regiuns. En il futur duai vegnir realisà er a Cuira quai ch'è gia realitad en autras regiuns: L'administraziun che lavura là duai vegnir unida cun avantatg en in edifizi administrativ nov. Quai spargnass custs ed effectuass sinergias preziusas.

1. Las immobiglias ch'il chantun posseda e che na vegnan betg pli duvradas vegnissan vendidas cun la precauziun necessaria, per ch'il martgà d'immobiglias a Cuira na vegnia betg destabilisà. Tenor las infurmaziuns da spezialistas e da spezialists na scrodan ils pretschs d'immobiglias betg, sch'ils parameters usitads che valan per il commerzi cun immobiglias vegnan resguardads. Ultra da quai èsi pussaivel da far frunt a quest punct cun ina strategia da vendita precauta, vendend en etappas las immobiglias ch'il chantun posseda. Las localitads da biro che vegnan libras cuntegnan er la schanza per augmentar anc ina giada la valur da la citad interna da Cuira. Cun la midada stessan a disposiziun surfatschas d'abitar generusas u localitads da biro attractivas en ils megliers lieus d'abitar en il center da Cuira. I vegniss liber spazi d'abitar cun ina qualitad d'abitar e cun in scharm che vegnan preziads actualmain zunt fitg. Ultra da quai sa chatta quest spazi d'abitar en lieus, nua ch'i na po betg pli vegnir construì.

2. Il concept prevesess da desdir mo ina relaziun da locaziun cun la cassa da pensiun chantunala dal Grischun (CP) (Grabenstrasse 1, tschains da locaziun 322'000.– francs/onn). Tge effect che questa circumstanza ha per la rendita da la CP dependa er dal fatg, quant svelt ch'ils biros sa laschan puspè dar en locaziun. Temas fundamentalas concernent la rendita netta da la CP n'èn betg inditgadas. Transfurmaziuns vi da l'immobiglia da fatschenta na ston vegnir fatgas naginas.

3. Il lieu previs a la Ringstrasse en il nov center da svilup Cuira vest è favuraivel tant areguard las localitads sco er areguard il traffic. El è, en quai che reguarda la grondezza, la situaziun, il pretsch dal bain immobigliar sco er l'avertura, in lieu fitg attractiv per la construcziun d'in edifizi nov per l'administraziun. La buna cuntanschibladad tant cun il traffic public (VR, posta, bus) sco er cun il traffic individual (auto, velo, a pe) e la vischinanza a la polizia chantunala ed a l'uffizi per il traffic sin via pledeschan a favur da quest lieu. Grazia al svilup dals ultims onns è Cuira vest in quartier ideal per construir da nov in edifizi per l'administraziun. El simbolisescha in'atmosfera da partenza dinamica da la citad. Ina nova construcziun en il center da la citad na po percunter – areguard il traffic – betg pli vegnir realisada. Ultra da quai n'èn ils lieus actuals en la citad interna betg averts bain en quai che reguarda il traffic. L'ordinaziun vertenta per administrar las plazzas da parcar da l'administraziun chantunala limitescha gia oz bain il traffic individual motorisà. In engrondiment sin basa dal nov lieu è exclus. En vista a la bilantscha d'energia actuala dals edifizis vegls pon ins partir dal fatg che la bilantscha totala d'energia da l'edifizi nov dastgass esser fitg positiva. Per tut quests motivs n'è ina bilantscha ecologica cumplessiva betg necessaria.

4. L'administraziun chantunala dovra gia meds da communicaziun moderns ed ha ina buna collavuraziun. Grazia a la concentraziun da singulas unitads administrativas en centers regiunals e grazia ad in'optimaziun da l'utilisaziun dals biros a Cuira vegn stgaffida la basa per profitar da sinergias, per augmentar la flexibilitad, per meglierar la collavuraziun, per augmentar il niz per la clientella sco er per sbassar ils custs da las localitads en moda persistenta. Cun questa strategia d'immobiglias e cun la construcziun planisada d'in nov edifizi administrativ vegnissan reducids ils custs currents per 2 milliuns francs per onn. Per pudair trair a niz optimalmain las sinergias (servetschs concentrads), ston las plazzas da lavur, che vegnan duvradas, vegnir collocadas er a Cuira – sco en las regiuns – cun preferenza en in cumplex d'edifizis. Cun il concept da realisaziun previs construescha il chantun per damaun, dentant er en vista als proxims 50 onns. Il concept "sinergia" stat pia er per in'administraziun ch'è moderna, che tegna quint da las burgaisas e dals burgais e ch'è bain cuntanschibla.

27 d'avrigl 2009