Navigation

Inhaltsbereich

Incumbensa Wettstein concernent l'introducziun dal model armonisà da contabilitad 2

Sessiun: 10.02.2009
In rendaquint expressiv tenor directivas unitaras è ina premissa indispensabla per in'utilisaziun responsabla dals meds finanzials publics. El creescha la basa per che las votantas ed ils votants possian prender lur decisiuns davart il preventiv e davart il quint annual en plaina enconuschientscha da las relaziuns finanzialas effectivas e per ch'ellas e ch'els sappian, co ch'i vegn lavurà cun lur daners fiscals.

Cun il model armonisà da contabilitad 1 è – il cumenzament dals onns settanta – vegnida stgaffida la basa per concepir la contabilitad da las finanzas publicas tenor criteris unitars. Uschia èsi daventà pussaivel da cumparegliar ils quints dals chantuns e da las vischnancas e da dar explicaziuns fidadas davart la forza finanziala da las communitads publicas.

Dapi lura è la contabilitad publica sa sviluppada vinavant, perquai ch'igl èn vegnidas fatgas pretensiuns pli grondas a la transparenza e perquai che las calculaziuns da las prestaziuns e dals custs èn daventadas adina pli impurtantas. Il nov model da contabilitad 1 è pervia da quai er vegnì repassà ed approvà da la conferenza da las directuras e dals directurs chantunals da finanzas il schaner 2007 sco model armonisà da contabilitad 2 (MAC 2). Cun il MAC 2 daventa la contabilitad dal maun public pli transparenta e pli cumparegliabla ed i vegnan stgaffidas las premissas per ina gulivaziun da finanzas efficazia. Tuttina han las executivas la libertad da far ina politica da finanzas activa ed efficazia.

Consequentamain dovra il chantun Grischun dapi blers onns il model armonisà da contabilitad 1, ed er bleras vischnancas fan oz lur quints annuals tenor quest model. Quai èn pia bunas premissas per midar ussa al MAC 2. Tenor la resposta da signur cusseglier guvernativ Schmid sin la dumonda dal deputà Tscholl a chaschun da l'ura da dumondas ha la regenza l'intenziun d'introducir il MAC 2 e d'obligar las vischnancas da midar a quest sistem. Quai premetta che la basa professiunala correspundenta vegnia stgaffida e che las vischnancas vegnian sustegnidas tar l'introducziun dal MAC 2. Las sutsegnadras ed ils sutsegnaders envidan pervia da quai la regenza:

- d'applitgar il MAC 2 per la contabilitad dal chantun a partir da l'onn da preventiv 2011;
- da stgaffir la basa ch'il MAC 2 vegnia duvrà er en las vischnancas il pli tard a partir da l'onn da preventiv 2012;
- da sustegnair en moda cumplessiva las vischnancas a chaschun da l'introducziun dal MAC 2 ed a chaschun da las midadas ch'èn necessarias en quest connex.

Cuira, ils 10 da favrer 2009

Wettstein, Tscholl, Zanetti, Augustin, Barandun, Baselgia-Brunner, Berni, Bezzola (Samedan), Bischoff, Bleiker, Bucher-Brini, Bundi, Campell, Casparis-Nigg, Casty, Caviezel (Pitasch), Claus, Clavadetscher, Conrad, Donatsch, Federspiel, Feltscher, Hardegger, Hartmann (Champfèr), Hasler, Jeker, Jenny, Keller, Kollegger, Krättli-Lori, Kunz, Marti, Michel, Montalta, Nick, Perl, Peyer, Pfäffli, Pfenninger, Ragettli, Rizzi, Stiffler, Thomann, Valär, Vetsch (Pragg-Jenaz), Furrer-Cabalzar, Züst

Session: 10.02.2009
Vorstoss: rg Auftrag

Resposta da la regenza

In giavisch impurtant da la regenza èsi ch'il rendaquint dal maun public vegnia sviluppà vinavant. La regenza e la cumissiun da gestiun (CdG) sco unic gremi chantunal dal parlament sa participeschan a la consultaziun tar il manual dal model armonisà da contabilitad per ils chantuns e per las vischnancas (MAC2). La conferenza da las directuras e dals directurs chantunals da finanzas (CDF) ha approvà il manual dal MAC2 ils 25 da schaner 2008.

1. Tenor ina retschertga da la CDF s'occupan in pèr chantuns gia cun las preparativas per introducir il MAC2. La regenza fa quint d'introducir il MAC2 en l'administraziun chantunala l'onn 2011 (onn da preventiv 2012). Gia en l'ura da dumondas da la sessiun da december 2008 ha ella communitgà questa finamira. La CDF spetga ch'ils novs standards vegnian realisads "en ina moda uschè cumplessiva sco pussaivel, fidaivla als princips e svelta" (rapport da la CDF 2007/ 2008, p. 26). Quest princip vegn sustegnì da la regenza. Per pudair introducir il MAC2 sto la lescha davart las finanzas e davart la surveglianza da las finanzas (LFSF, DG 710.100) vegnir suttamessa ad ina revisiun. Ultra da quai pretenda la realisaziun dal MAC2 ch'i vegnian fatgas adattaziuns tar ils sistems da contabilitad (tranter auter in nov plan dal conto, introducziun d'ina contabilitad da la facultad investida en general).

2. Il manual davart la contabilitad da las vischnancas grischunas ch'è actualmain valaivel ha servì sco basa per introducir il MAC1. En il fratemp han tut las vischnancas introducì il MAC1. Las vischnancas grondas han er agens urdens da finanzas che correspundan al MAC1.

La conferenza dals posts chantunals da surveglianza da las finanzas communalas (CPSC) ha installà ina gruppa da coordinaziun per il MAC2 che duai preschentar in manual che vala per tut las vischnancas svizras fin la fin da l'onn 2009. I na duai betg vegnir creà in manual specific per il Grischun.

Las basas legalas chantunalas duain star a disposiziun a las vischnancas fin tar l'onn da preventiv 2012. L'introducziun dal MAC2 en las vischnancas grischunas sto vegnir prendì per mauns en moda svelta e cumpletta e sto esser terminada entaifer pauc temp. La coordinaziun cun l'introducziun tar il chantun sto vegnir garantida.

3. Er en las vischnancas èsi necessari da far lavurs preparativas (p.ex. adattar las basas legalas ed ils sistems da contabilitad, introducir la contabilitad da la facultad investida). Cur che las basas èn elavuradas, stoi vegnir cumenzà ad ura cun l'instrucziun, cun la scolaziun e cun las lavurs da realisaziun. Il chantun vegn a sustegnair las vischnancas en quest connex.

La regenza è pronta d'acceptar questa incumbensa en il senn da questas explicaziuns.

5 da matg 2009