Navigation

Inhaltsbereich

Incumbensa Thöny concernent il sustegn da la conjunctura cun agid d'in program chantunal per la sanaziun d'edifizis

Sessiun: 11.02.2009
La crisa finanziala è daventada ina crisa economica fitg gravanta. Ultra da l'acziun da salvament ch'è ida a favur da la UBS e che ha custà dapli che 60 milliardas francs, èsi inevitabel da concepir programs da conjunctura dal maun public a favur da l'economia reala. En quest connex è er il chantun Grischun obligà d'agir. La regenza grischuna ha vis il basegn d'agir. Las mesiras ch'ella propona èn dentant anc memia pauc concretas. Las sutsegnadas ed ils sutsegnads èn da l'avis che las investiziuns directas dal stadi a favur da projects persistents genereschian la valurisaziun la pli gronda e ch'ellas sajan perquai las mesiras las pli adattadas per segirar plazzas da lavur. Las investiziuns a favur da la sanaziun energetica d'edifizis èn talas investiziuns persistentas. Quellas genereschan ina valurisaziun a curta vista, ma distgargian er a vista mesauna ed a lunga vista las finanzas (custs d'energia pli bass) sco er l'ambient (consum da resursas reducì). Questas investiziuns han pia ina valur multipla. En quest senn sto vegnir valità in program cumplessiv per la sanaziun d'edifizis chantunals e d'edifizis che vegnan subvenziunads per la gronda part dal chantun sco schanza entamez la crisa.

La regenza vegn incumbensada – en il senn da las explicaziuns menziunadas qua survart – d'elavurar uschè svelt sco pussaivel per ils proxims onns in program correspundent per la sanaziun d'edifizis e per la sanaziun energetica. Quest program duai avair en mira las immobiglias chantunalas e las immobiglias d'instituziuns che vegnan subvenziunadas per la gronda part dal chantun. Ils credits d'investiziun che surpassan en quest connex il preventiv 2009 ston vegnir suttamess al cussegl grond sco credits posteriurs.

Cuira, ils 11 da favrer 2009

Thöny, Feltscher, Berther (Sedrun), Arquint, Baselgia-Brunner, Berni, Blumenthal, Brandenburger, Bucher-Brini, Casutt, Caviezel-Sutter (Tusaun), Conrad, Frigg-Walt, Gartmann-Albin, Giovanoli, Jaag, Jäger, Jenny, Koch, Kollegger, Menge, Meyer Persili (Cuira), Meyer-Grass (Claustra Vitg), Michel, Niederer, Noi-Togni, Parolini, Pedrini, Peer, Perl, Peyer, Pfäffli, Pfenninger, Pfiffner-Bearth, Thomann, Trepp, Wettstein, Furrer-Cabalzar, Hartmann (Küblis), Locher Benguerel, Züst

Session: 11.02.2009
Vorstoss: rg Auftrag

Resposta da la regenza

Il program da la regenza 2009-2012, dal qual il cussegl grond ha prendì enconuschientscha en la sessiun da zercladur 2008, cuntegna sut la maxima F ("Far activamain frunt a la midada dal clima") puncts centrals da svilup sco l'effizienza energetica e sco la protecziun da l'ambient. Quests puncts centrals vegnan concretisads e realisads cun ina gronda prioritad. Actualmain vegn fatg in concept da mantegniment e da persistenza.

Ils meds finanzials per mantegnair ils edifizis chantunals ch'èn vegnids augmentads entaifer ils ultims onns duain vegnir concentrads pli fitg ed impundids per sanaziuns pli grondas e cumplessivas. I sa tracta da sbassar cleramain il consum d'energia dals edifizis che appartegnan al chantun e da substituir uschè svelt sco pussaivel purtaders d'energia fossils tras purtaders d'energias regenerablas sco er da sustegnair quai cun la construcziun d'indrizs d'energias alternativas. Gronda attenziun duai vegnir dada a l'applicaziun da materialias da construcziun ch'èn ecologicamain irreproschablas. En cas da midadas da construcziun e da sanaziuns duai vegnir prendì en mira il standard da MINERGIE.

Quest concept da mantegniment e da persistenza duai vegnir realisà a vista mesauna. Per dentant cuntanscher uschè svelt sco pussaivel in meglierament concernent l'effizienza energetica tar edifizis chantunals cuntegna el er mesiras immediatas. En il center stattan ina priorisaziun speditiva ed ina planisaziun da projects che duain vegnir sanads e lur budgetaziun ordinaria, per che questas mesiras possian vegnir realisadas fin l'onn 2010. Il proceder ch'è vegnì tschernì ha cleras finamiras ed è effizient. Cun quai ch'el vegn extendì sin plirs projects persistents tegna el – sco aspect supplementar – er quint da las mesiras planisadas per sustegnair la conjunctura. Davart in augment da las valurs directivas concernent la politica da finanzas ch'è collià cun quai po il cussegl grond decider en il rom dal preventiv 2010.

La planisaziun e la preparaziun da la realisaziun sco er las stentas per survegnir las permissiuns necessarias basegnan in tschert avantatg da temp visavi la realisaziun dals projects e pretendan in grond sforz da tut las parts pertutgadas. Il meds finanzials che vegnan duvrads supplementarmain per la planisaziun importan circa 0.5 milliuns francs.

Per ils edifizis che vegnan subvenziunads per gronda part dal chantun (scolas, chasas da dimora) na vegn il concept da sanaziun betg fatg dal chantun. Projects da sanaziun ch'èn relevants per il consum d'energia vegnan sustegnids en quest connex cun contribuziuns en il rom dals programs da promoziun ordinaris tenor las directivas da la lescha d'energia dal chantun Grischun.

Cun quai èn ils giavischs essenzials da l'intervenziun gia vegnids integrads internamain en la planisaziun. Pervia da quai è la regenza pronta d'acceptar l'incumbensa.

27 d'avrigl 2009