Dumonda Gartmann-Albin concernent la serrada previsa d'uffizis postals
Sessiun: 20.04.2009
Entaifer paucs onns ha la Posta serrà circa 1500 uffizis postals. Ussa duain vegnir examinads ils proxims 500 – 20% da la rait actuala d'uffizis postals. Dals 89 uffizis postals examinads en il chantun Grischun fissan circa la mesadad pertutgads d'ina serrada. Senza prender resguard da la populaziun e da l'economia. L'economia e la populaziun èn dependentas d'excellents servetschs da la Posta. Sche la Posta serra, serran savens er autras fatschentas. Pervia da quai èsi d'ina impurtanza centrala che la rait actuala d'uffizis postals resta mantegnida. Plinavant avess la reducziun da blers uffizis postals er la consequenza directa che plazzas da lavur vegnissan reducidas – en vista da la crisa economica ina perspectiva pauc legraivla!
Sco alternativa dals uffizis postals discurra la Posta dal servetsch a domicil e d'agenturas da posta. Il servetsch a domicil po esser bun e dretg per persunas ch'èn a chasa, sche la postina u sch'il postin arriva. A tut las autras persunas na serva el betg. En cas da las agenturas da posta è il problem il pli grond che lur existenza n'è betg garantida a lunga vista. Vitiers vegn anc ch'ellas èn savens avertas pli ditg ch'in uffizi postal, ch'ellas porschan dentant main servetschs. Uschia na pon ins betg far pajaments en in'agentura da posta, e la retratga da daners bluts n'è er betg pussaivla. Tenor in studi dal DATEC da la stad 2008 è la Posta l'institut bancar il pli impurtant per il traffic da pajament e per il provediment cun daner blut – en spezial en regiuns periferas. Tenor quest studi dal DATEC prendan bancas mo là domicil, nua ch'i sa chatta er in uffizi postal. Da quai resulta cler e net ch'i na dat naginas alternativas per uffizis postals cun ina infrastructura cumpletta.
Tenor quest studi dal DATEC è la Svizra in veritabel pajais da daners bluts. Mo circa 30% da la populaziun fan lur pajaments sur l'internet. Vitiers vegn anc ch'i vegn per gronda part pajà cun daner blut en il commerzi en detagl. En quest connex ha la Posta ina rolla centrala, perquai ch'ella proveda la populaziun da tut noss chantun cun munaida e cun bancnotas. Cun ses plans da reducziun periclitescha la Posta sia incumbensa ch'ella ha concernent il provediment da basa. Cun mintga uffizi postal che vegn serrà dat ella ultra da quai ina bella frida a la regiun pertutgada.
Il cusseglier guvernativ vegn pervia da quai supplitgà da respunder las suandantas dumondas:
1. Ha la Posta svizra infurmà il chantun Grischun davart ses plans?
2. Co fa la regenza quint da reagir sin ils plans da reducziun da la Posta?
3. Coordinescha il chantun Grischun il proceder da las vischnancas pertutgadas?
Cuira, ils 20 d'avrigl 2009
Gartmann-Albin, Pfenninger, Peyer, Arquint, Baselgia-Brunner, Bucher-Brini, Frigg-Walt, Jaag, Jäger, Menge, Meyer Persili (Cuira), Pfiffner-Bearth, Thöny, Trepp, Locher Benguerel, Michel (Cuira)
Resposta da la regenza
Per pudair ademplir sia incumbensa concernent il provediment da basa basegna la Posta la libertad d'agir d'ina interpresa. En quest rom vegn fatga l'examinaziun actuala da la rait dals uffizis postals. Tenor las indicaziuns da la Posta vegnan examinads ils proxims trais onns en tut la Svizra 420 ed en il Grischun 47 uffizis postals. La controlla, sche la Posta adempleschia sia incumbensa concernent il provediment da basa, fan actualmain duas autoritads ch'èn independentas da l'administraziun federala: L'autoritad per la regulaziun da la posta controlla regularmain la qualitad dals servetschs universals da la Posta e tracta recurs da burgaisas e da burgais che concernan il provediment da basa. Sch'i dat dispita pervia da la serrada d'uffizis postals, controlla la cumissiun dals uffizis postals, sch'ils criteris da l'ordinaziun da posta vegnan resguardads. En cas dispitaivels han las vischnancas la pussaivladad da sa drizzar a questa cumissiun. Las recumandaziuns da la cumissiun vegnan renconuschidas da la Posta da nov sco liantas.
Schebain che l'examinaziun dals uffizis postals che duain vegnir examinads vegn fatga en tut la Svizra tenor ils medems criteris, vegn tuttina tschertgada ina soluziun individuala ed optimala per mintga uffizi postal en il dialog cun las parts pertutgadas. Las decisiuns da la Posta vegnan prendidas en enclegientscha cun las vischnancas che pon sa drizzar en cas dispitaivels a la cumissiun dals uffizis postals ch'è independenta. A las collavuraturas ed als collavuraturs pertutgads vegn purschida da la Posta – sch'igl è insaco pussaivel – ina plazza da lavur interna en ils conturns.
Sur il departament cumpetent ha la regenza in contact regular cun ils posts responsabels da la Posta. Uschia èsi garantì ch'ella è infurmada davart la moda da proceder planisada, sch'i dat midadas ch'èn necessarias tar la rait dals uffizis postals u da la situaziun da las emploiadas e dals emploiads, per exempel er en cas da novaziuns da la concepziun dals servetschs da la Posta u da lur dumonda. Ina fixaziun sin soluziuns tecnicas tradiziunalas per servetschs ch'èn regressivs u per singuls servetschs dal provediment da basa sco per exempel il traffic da pajament cun daner blut ch'è deficitar periclitescha indirectamain l'existenza dals uffizis postals e dal service public. A partir da l'emprim quartal da l'onn 2010 vegnan las agenturas ad acceptar cartas da credit per il traffic da pajament. Uschia pon ellas augmentar considerablamain l'attractivitad per la clientella da la Posta.
1. Gea, cun las infurmaziuns correspundentas ed en il rom da contacts regulars tranter la Posta ed il chantun Grischun.
2. A chaschun da la consultaziun tar la revisiun totala da la lescha davart la posta e l'organisaziun da la posta che spetga da vegnir tractada proximamain da las chombras federalas, ha la regenza renvià a l'impurtanza speziala che la Posta ha per regiuns da muntogna e per regiuns periferas e pretendì ch'in provediment qualitativamain irreproschabel e che la finanziaziun da quel stoppian esser garantids.
Uscheditg ch'i pon vegnir chattadas en enclegientscha soluziuns per novas furmas da l'adempliment dals servetschs postals na resguarda la regenza ina intervenziun tar la direcziun dal concern da la Posta u tar ils posts federals responsabels betg sco inditgada.
3. La glista da las vischnancas pertutgadas ha la Posta publitgà en l'internet. Uschia han las vischnancas la pussaivladad da mantegnair lur interess en moda coordinada. L'elavuraziun da soluziuns individualas e fatgas sin mesira ha purtà enfin ussa bunas soluziuns per las vischnancas. Quai è vegnì confermà en discurs ch'èn vegnids manads en chaussa. Plinavant stoi vegnir renvià al fatg ch'i stattan a disposiziun tant a las vischnancas sco er a las burgaisas ed als burgais mintgamai in'autoritad ch'è independenta da l'administraziun federala sco post da consultaziun per recurs. Quai èn la cumissiun dals uffizis postals e l'autoritad per la regulaziun da la posta "PostReg". Sin dumonda vegnan l'uffizi da vischnancas ed il departament d'economia publica e fatgs socials a cussegliar ed a sustegnair las vischnancas er vinavant.
6 da fanadur 2009