Ils motivs che pon chaschunar violenza ed exercizi da pussanza en chasas da persunas attempadas e da tgira èn multifars. Cifras exactas davart la violenza cunter persunas attempadas en instituziuns per cas da lunga durada mancan, e quai betg mo en noss chantun. I vegn stimà che 2 fin 10 pertschient da las persunas attempadas èn victimas d'abus tras tgirunzas e tras tgirunzs ubain tras confamigliaras e tras confamigliars.

Tenor la lescha da sanadad basegnan purschidas per la tgira e per l'assistenza da persunas attempadas e da persunas che basegnan tgira ina permissiun. L'ordinaziun tar la lescha da sanadad cuntegna prescripziuns detagliadas davart il dumber e davart la scolaziun da las collavuraturas e dals collavuraturs dals manaschis, e quai tut tenor ils basegns d'assistenza da las abitantas e dals abitants. La prescripziun, tenor la quala persunal spezialisà per la tgira e per l'assistenza sto esser preschent di e notg, è ina garanzia per il sustegn e per l'accumpagnament dal persunal d'assistenza. En il rom dal standard da qualitad "Exercizi da pussanza / violenza dal persunal cunter abitantas e cunter abitants" ston las instituziuns sa fatschentar tranter auter cun ils motivs che pon chaschunar violenza, cun la prevenziun e cun las purschidas pussaivlas per evitar la violenza e l'exercizi da pussanza. Il grad d'adempliment da quest standard da qualitad sto vegnir cumprovà mintga onn visavi l'uffizi da sanadad.

La regenza respunda las dumondas sco suonda:

1. En il chantun Grischun n'èn fin ussa vegnidas fatgas naginas retschertgas davart la dimensiun da la violenza cunter persunas attempadas. Retschertgas davart la violenza na fissan er betg alura expressivas, sche la noziun "violenza" vegniss definida exactamain, perquai ch'i restass in grond dumber zuppà er en cas d'ina retschertga cumplessiva.

2. Da princip gea. Conscienta da quest privel ha la regenza relaschà – en l'ordinaziun tar la lescha da sanadad – prescripziuns qualitativas e quantitativas areguard il persunal da las chasas da persunas attempadas e da tgira. Tras lur caracter preventiv duain questas prescripziuns impedir ch'il persunal è surdumandà. Ma en quest reguard è la regenza er conscienta ch'i n'è betg ina segirezza absoluta d'avair persunal ch'è scolà bain e suffizientamain.
A la regenza n'èn avant maun naginas infurmaziuns ch'il persunal da tgira fiss surdumandà en las chasas da persunas attempadas e da tgira en il chantun.

3. I n'èn avant maun naginas enconuschientschas ed experientschas fundadas davart la violenza cunter tgirunzas e cunter tgirunzs. I sa mussa dentant che tgirunzas e che tgirunzs sa drizzan adina puspè a lur superiura u a lur superiur ubain a posts da cussegliaziun, sch'ellas e sch'els èn daventads victimas da violenza. En quest cas pon questas tgirunzas e quests tgirunzs sa decider da bandunar la professiun.

4. Gea. Sin basa dal standard da qualitad che vegn descrit al cumenzament ed en la resposta 2 e ch'è orientà al process, pon ins partir dal fatg che la problematica da la violenza e da la pussanza en chasas da persunas attempadas e da tgira vegnia tematisada suffizientamain.

5. La regenza na vesa betg in basegn d'agir che surpassa las mesiras ch'èn vegnidas prendidas fin ussa.

29 da zercladur 2009