Navigation

Inhaltsbereich

Dumonda Tenchio concernent la reducziun d'uffizis postals en il Grischun

Sessiun: 21.04.2009
Tenor l'art. 6 da l'ordinaziun da posta (OPO; CS 783.01) maina la Posta en tut il pajais ina rait cumpletta d'uffizis postals e garantescha che las prestaziuns dal servetsch universal sajan disponiblas en tut las regiuns per tut las gruppas da la populaziun en ina distanza raschunaivla. Ils uffizis postals han da porscher las prestaziuns dal servetsch universal. En il rom da sias pussaivladads economicas adatta la Posta plinavant la rait d'uffizis postals als basegns da sia clientella.

La rait d'uffizis postals vegn restructurada e reducida dapi onns. Dapi l'onn 2001 è il dumber d'uffizis postals sa reducì en Svizra da 3200 a 2380, pia per passa 25%. La Posta svizra ha plinavant cuntanschì l'onn 2008 in resultat solid. Il gudogn dal concern dad 825 milliuns francs è stà per 84 milliuns francs sut il resultat da l'onn precedent (909 milliuns francs).

La rait d'uffizis postals duai puspè vegnir restructurada en vista a l'avertura totala dal martgà postal ch'è previsa l'onn 2012. Tut tenor il resultat pudess ina part dals uffizis postals vegnir serrada u transfurmada en in'agentura u en servetsch a domicil; serradas na sajan dentant – tenor la Posta svizra – betg ina finamira. En l'internet ha la Posta svizra publitgà ina glista ch'è datada cun ils 14 d'avrigl 2009 e che cuntegna ils lieus che ston vegnir examinads fin l'onn 2011. Tenor questa glista èn pertutgads ils uffizis postals en ils suandants 47 lieus dal chantun Grischun:

Alvagni Vitg, Ardez, Champfèr, Cresta (Avras), Curaglia, Danis, Donat, Falera, Fideris, Filisur, Ftan, Giuvaulta, Haldenstein, Jenaz, Langwies, Lavin, Li Curt, Lostallo, Lumbrein, Maladers, Morissen, Pasqual, Rabius, Riom, Roten, Saas, Sagogn, Samignun-Compatsch, San Bernardin, San Carlo (Puschlav), San Vittore, Schanf, Scharàns, Seewis Vitg, Stampa, Stussavgia Plaz, Sumvitg, Sursaissa Affeier, Tarasp, Tschiertschen, Tschierv, Tumein, Uors (Lumnezia), Vicosoprano, Vrin, Vuorz, Wiesen.

La Posta vul far questa examinaziun tenor "clers criteris", "en il dialog cun tut las parts pertutgadas" sco er "en enclegientscha cun las vischnancas". Sch'i na vegniss betg chattada ina soluziun en enclegientscha, èn las vischnancas libras d'appellar a la cumissiun independenta dals uffizis postals ch'è vegnida nominada dal departament federal per ambient, traffic, energia e communicaziun (DATEC). La Posta svizra – sco ch'ella di – vegnia a sa tegnair vi da tut las recumandaziuns da la cumissiun, er sch'ella na fiss betg obligada da far quai. La Posta decida definitivamain (art. 7 OPO).

Sch'in uffizi postal vegn serrà u sche ses servetsch vegn restrenschì, suondan savens er autras fatschentas il proceder da la Posta, uschia che la vischnanca perda – ultra da las plazzas da lavur – sia attractivitad e ristga da perder sia vitalitad. Plinavant è la Posta, tenor in studi dal DATEC da la stad 2008, l'institut bancar il pli impurtant per il traffic da pajament e per il provediment cun daner blut en Svizra – en spezial en regiuns periferas. Suenter las restructuraziuns per part massivas ch'èn gia vegnidas exequidas ils ultims onns, stoi perquai vegnir pretendì che la rait actuala d'uffizis postals vegnia mantegnida.

Dumondas:

1. Quantas plazzas da lavur èn vegnidas reducidas dapi l'onn 2001 fin oz en il chantun Grischun tras la restructuraziun dals uffizis postals?

2. En las respostas che la regenza ha dà ils 27 da favrer 2001 ed ils 11 da matg 2004 ad intervenziuns parlamentaras ha ella rendì attent ch'ella vegnia a cuntinuar cun ils discurs regulars cun las persunas responsablas da la Posta e ch'ella vegnia a defender ils interess dal chantun. Tge resultats concrets han purtà ils discurs ch'èn vegnids manads dapi il matg 2004, cunzunt concernent ina reducziun pussaivla dals uffizis postals en il chantun Grischun?

3. La conferenza da las regenzas dals chantuns alpins ha nominà l'onn 2000 ina gruppa da lavur ch'è s'occupada dal service public e da la reducziun da plazzas da lavur en il territori da muntogna. La conferenza da las regenzas – uschia la regenza en ina resposta dals 27 da favrer 2001 ad ina intervenziun parlamentara – vegnia a sa fatschentar cun la dumonda actuala da la rait d'uffizis postals ed a preschentar sias ideas sin plaun federal. Tge success ha pudì registrar la conferenza da las regenzas?

4. Ha la regenza l'intenziun da porscher maun resp. da prestar agid en il rom da l'evaluaziun da la dumonda, sch'ils uffizis postals grischuns numnads duain vegnir serrads u betg, p.ex. en il rom da las posiziuns e da las ulteriuras proceduras sin plaun federal? Sche gea, cun tge mesiras concretas? Coordinescha il chantun sias mesiras cun eventualas mesiras da las regiuns?

5. Co valitescha la regenza las consequenzas da l'avertura totala dal martgà postal l'onn 2012 per il chantun Grischun?


Cuira, ils 21 d'avrigl 2009

Tenchio, Casty, Michel (Tavau Monstein), Augustin, Barandun, Berni, Berther (Mustér), Berther (Sedrun), Bezzola (Zernez), Bleiker, Blumenthal, Bondolfi, Brandenburger, Brantschen, Brüesch, Buchli, Bundi, Caduff, Cahannes Renggli, Campell, Candinas, Casparis-Nigg, Castelberg-Fleischhauer, Casutt (Falera), Caviezel-Sutter (Tusaun), Cavigelli, Christoffel-Casty, Clavadetscher, Darms-Landolt, Dermont, Dudli, Fallet, Fasani, Federspiel, Felix, Florin-Caluori, Geisseler, Giovanoli, Hardegger, Hartmann (Champfèr), Jeker, Jenny, Keller, Kleis-Kümin, Koch, Loepfe, Märchy-Michel, Marti, Mengotti, Meyer-Grass (Claustra Vitg), Möhr, Niederer, Noi-Togni, Parolini, Parpan, Pedrini, Peer, Perl, Pfäffli, Pfister, Plozza, Portner, Quinter, Ragettli, Righetti, Sax, Stiffler, Thomann, Thurner-Steier, Toschini, Troncana-Sauer, Tuor, Valär, Vetsch (Claustra Vitg), Wettstein, Casutt-Derungs (Falera), Gunzinger

Resposta da la regenza

En il rom da l'examinaziun actuala da la rait d'uffizis postals sa basa la Posta sin sia libertad d'agir sco ina interpresa. Questa libertad la duai permetter da pudair ademplir en moda effizienta e rentabla sia incumbensa dal provediment da basa. La regenza persequitescha attentamain questa examinaziun ord ina vista cumplessiva.

1. Pervia da transfers tranter ils differents secturs da la Posta na po la dumonda da la reducziun da plazzas en connex cun la reducziun dal dumber d'uffizis postals betg vegnir respundida directamain. Durant l'onn 2001 fin l'onn 2008 ha gì lieu ina cumpensaziun parziala tras l'introducziun dal servetsch a domicil en 110 lieus e tras l'avertura da tschintg uffizis postals mobils. Il dumber d'agenturas n'è betg sa midà. Durant la perioda numnada è il dumber da collavuraturas e da collavuraturs da la Posta sa reducì da 1'711 a 1'548. Ils plans oriunds da la Posta han laschà temair ina mendra situaziun. Betg sco ultim pervia da l'engaschi da la regenza han er pudì vegnir cuntanschids tscherts success entaifer quest process da reorganisaziun. Uschia èn vegnidas stgaffidas l'onn 2008 var 150 plazzas novas en il center da videocodaziun e da remittendas a Cuira. En tuts dus lieus perifers, a Sion ed a Cuira, furnescha la Posta sias prestaziuns en quest sectur per l'entira Svizra e gida pia er a mantegnair plazzas da lavur decentralas.

2. In resultat impurtant è quel ch'i dat dapli transparenza en connex cun la furniziun da prestaziuns postalas. Sur il departament cumpetent ha la regenza dapi lura in contact regular cun la Posta. Uschia vegn ella p.ex. infurmada davart novaziuns da la concepziun dals servetschs da posta u davart il svilup da la dumonda per quests servetschs. En quest connex stoi vegnir menziunà che la Posta integrescha tant las persunas pertutgadas sco er las vischnancas en mecanissems da decisiun. Sco resultat po vegnir numnada la videocodaziun ch'è menziunada sut il punct 1 e che ha purtà 150 novas plazzas da lavur a Cuira.

3. A chaschun da la consultaziun tar la revisiun totala da la lescha davart la Posta e l'organisaziun da la Posta èsi vegnì renvià a l'impurtanza speziala ch'ils servetschs da posta han per regiuns da muntogna e per regiuns periferas, ed igl è vegnì pretendì ch'in provediment da basa qualitativamain irreproschabel e che sia finanziaziun stoppian esser garantids. Dapi il 1. da schaner 2004 ha la Posta ina incumbensa d'infrastructura che l'oblighescha da manar ina rait cumpletta d'uffizis postals. Quels ston esser cuntanschibels en ina distanza adequata.

Sa referind a la quota da plazzas da lavur en ils secturs economics 2 e 3 porscha la posta – tenor atgnas indicaziuns – dapli plazzas da lavur en las regiuns periferas che en il rest dal pajais. En il chantun Grischun importa questa quota 1.65 pertschient, la media svizra importa 1.36 pertschient.

4. Cun satisfacziun prenda la regenza enconuschientscha dal fatg che la Posta vul dar da nov bler dapli impurtanza a las recumandaziuns da la cumissiun independenta dals uffizis postals. Sin dumonda da vischnancas pertutgadas han il departament ed ils posts da servetsch sustegnì en il passà questas vischnancas per chattar soluziuns individualas. La regenza è er vinavant pronta da laschar porscher quest sustegn. La regenza è da l'avis ch'ina optica surcommunala saja ina soluziun adequata; quai vala er per il fatg che las vischnancas sa coordineschan eventualmain tenor regiuns. Ina intervenziun da la regenza en il cas singul na s'impona betg.

5. La regenza persequitescha attentamain l'avertura cumpletta dal martgà da posta en las regiuns periferas. En cas d'ina ulteriura liberalisaziun pon ins – tenor la autoritad per la regulaziun da la posta – partir dal fatg che la rait d'uffizis postals e ch'ils puncts d'access a prestaziuns da posta sa midian d'in factur dals custs ad in factur dal success strategic. Ins po er far quint che la finanziaziun dal provediment da basa saja garantida er vinavant, en cas ch'il martgà vegn avert en etappas sco planisà.
In factur decisiv, per che l'ulteriur svilup dals servetschs da posta en Svizra haja success, vegn ad esser ina regulaziun correspundenta dal martgà da posta. Decisiuns impurtantas en quest connex han lieu, cur che la lescha davart la Posta e la lescha davart l'organisaziun da la Posta vegnan concepidas e cur ch'ellas vegnan tractadas da las chombras federalas.
Sco ch'igl è vegnì menziunà en la resposta 3, pretenda il chantun Grischun da la confederaziun ch'in provediment da basa qualitativamain irreproschabel e che sia finanziaziun sajan garantids.

8 da fanadur 2009