Navigation

Inhaltsbereich

Dumonda Marti concernent la structura d'utilisaziun per las immobiglias dal chantun

Sessiun: 21.04.2009
Il chantun Grischun posseda e prenda en locaziun differentas immobiglias per pudair ademplir sias incumbensas. Tschertas immobiglias vegnan administradas directamain da l'uffizi da construcziun auta, auters edifizis per gronda part tras lur utilisadras e tras lur utilisaders, auters vegnan puspè dads en locaziun a fundaziuns u ad instituts autonoms da dretg public e la finala possedan fundaziuns u instituts da dretg public er independentamain immobiglias.

Pervia da las diversas praticas en connex cun las relaziuns da possess e da finanziaziun da tut questas furmas maschadadas n'èsi insumma betg u strusch pussaivel da las cumparegliar tant areguard il controlling da finanzas, sco er areguard il quint da stadi ed areguard il preventiv e pli e pli er areguard ils indicaturs tenor GRiforma, tenor ils quals i vegnan concedids budgets globals.

Perquai ch'i sa tracta en general d'ina valur d'immobiglias dal chantun considerabla, manca ina structura ed organisaziun survesaivla, chapaivla e classifitgada tenor ils criteris usitads da la branscha dal portafegl d'immobiglias. I sto plinavant vegnir tschentada la dumonda, en tge moda e maniera che las immobiglias pon vegnir administradas e sch'ellas duain vegnir administradas il meglier d'in unic post u sch'ina organisaziun decentrala fiss da preferir.

Areguard ulteriurs projects d'investiziun dal chantun en il sectur da las immobiglias sa tschentan las suandantas dumondas:

1. È la regenza er da l'avis che l'administraziun da las immobiglias cumpiglia soluziuns individualas ch'èn bain creschidas istoricamain, ma ch'èn memia separadas e betg unitaras sut l'aspect da GRiforma?

2. Lavura la regenza vi d'ina organisaziun transparenta per las immobiglias dal chantun e po ella s'imaginar d'introducir ina regulaziun unitara per l'utilisaziun da las immobiglias dal chantun tras fundaziuns u tras instituts autonoms da dretg public (p.ex. scolas, fatgs da sanadad)?

3. Po la regenza s'imaginar d'administrar las immobiglias dal chantun sco center da profit cun in agen quint da rentabilitad sco er cun ina finanziaziun e cun in'organisaziun specifica?

4. Vesa la regenza pussaivladads da fundar in'atgna furma d'organisaziun, p.ex. in institut autonom da dretg public u ina SA sco l'assicuranza d'edifizis, e da dar en locaziun las immobiglias – là nua che quai è raschunaivel – en il senn d'investiziuns als posts da servetsch e da las administrar uschia tras in'organisaziun separada?


Cuira, ils 21 d'avrigl 2009

Marti, Arquint, Barandun, Bezzola (Zernez), Blumenthal, Bucher-Brini, Bundi, Caduff, Casparis-Nigg, Castelberg-Fleischhauer, Casutt (Falera), Caviezel (Pitasch), Clavadetscher, Dudli, Federspiel, Gartmann-Albin, Geisseler, Hardegger, Hartmann (Cuira), Hartmann (Champfèr), Jeker, Jenny, Kessler, Koch, Kollegger, Krättli-Lori, Kunz, Mani-Heldstab, Men-gotti, Meyer-Grass (Claustra Vitg), Michel (Tavau Monstein), Nick, Niederer, Pedrini, Peer, Perl, Pfäffli, Pfenninger, Plozza, Ragettli, Ratti, Rizzi, Stiffler, Stoffel, Thurner-Steier, Troncana-Sauer, Valär, Vetsch (Claustra Vitg), Vetsch (Pragg-Jenaz), Wettstein, Hartmann (Küblis), Locher Benguerel

Resposta da la regenza

Il chantun è proprietari da 620 immobiglias che han ina valur d'assicuranza d'edifizis da 704 milliuns francs ed ha 243 relaziuns da locaziun che cumpiglian ina summa annuala da locaziun da totalmain 9 milliuns francs. L'uffizi da construcziun auta (UCA) administrescha tut quests quasi 860 objects ed als metta a disposiziun ad utilisadras ed ad utilisaders entaifer l'administraziun, e quai cun facturar ils custs da las localitads che vegnan calculads sco er cun dumandar in tschains da locaziun als servetschs psichiatrics dal Grischun (SPGR) ed a la scola auta da pedagogia dal Grischun (SAPGR), ils quals èn organisads sco instituts da dretg public independents. Excepziuns èn unicamain la scola auta da tecnica ed economia (SATE) ch'è naschida oriundamain d'ina fundaziun ed il center da furmaziun per la sanadad ed ils fatgs socials (CSS) ch'è daventà independent l'onn 2003. Ils ulteriurs instituts independents dal chantun, l'assicuranza d'edifizis dal Grischun (AEG) sco er la cassa da pensiun chantunala dal Grischun (CP) investeschan da lur vart activamain en immobiglias d'abitar e da fatschenta sin il martgà d'immobiglias local, e quai per investir ils daners d'assicuranza en moda uschè rentabla sco pussaivel.

Cun la promoziun da GRiforma è vegnì introducì il quint integral dals custs per in singul object. La transparenza necessaria è pia dada. La structura dal portafegl chantunal d'immobiglias correspunda als standards usitads, schebain che tranter il manaschament d'immobiglias da l'economia privata e quel da l'economia publica pon exister tut auters motivs per l'economisaziun d'agens meds u d'immobiglias da terzas persunas. Areguard la rentabilitad po la gestiun immobigliara dal chantun vegnir cumparegliada cun ils portafegls d'immobiglias privats.

Respostas a las dumondas:

1. Cun metter en vigur l'ordinaziun chantunala d'immobiglias per il 1. da zercladur 2006 èn vegnidas eliminadas numerusas soluziuns individualas pli pitschnas e pli grondas. Il UCA è responsabel sulet per l'entir manaschament da las immobiglias da l'administraziun chantunala.

2./3. L'utilisaziun da las immobiglias dal chantun è vegnida reglada cleramain ed è daventada transparenta cun reveder las disposiziuns legalas respectivas. ll chantun construescha da princip tenor la prioritad dal basegn e betg tenor la prioritad da la rendita. Sco servetsch intermediar surpiglia il UCA la rolla d'in center senza profit. Ditg cun auters pleds duai el lavurar uschia ch'el cuvra ils custs. Cun facturar ils custs da las localitads als posts da servetsch en il rom da GRiforma è la transparenza suffizienta. Oz na vesa la regenza perquai nagin motiv da bandunar il sistem actual. En cumparegliaziun cun ina soluziun d'excorporaziun na vesa ella nagins avantatgs supplementars areguard l'organisaziun, areguard la finanziaziun u areguard la qualitad.

4. Ina nova furma d'organisaziun sco p.ex. la creaziun d'in institut da dretg public independent u schizunt la fundaziun d'ina societad d'aczias na para betg opportuna a la regenza, perquai ch'il dretg da cogestiun politica dal parlment e dal suveran en cas d'investiziuns per construcziuns vegniss mess en dumonda. Plinavant è il UCA cumpetent – ultra dal manaschament d'immobiglias – per autras incumbensas (represchentanza e cussegliaziun da la regenza sco patruna da construcziun e sco proprietaria d'immobiglias, examinaziun da basegns da localitads, attribuziun d'immobiglias a las utilisadras ed als utilisaders, manaschament da projects, mantegniment/reparatura, mobiglias, nettegiament e lavurs da pedel sco er cussegliaziun d'instituziuns responsablas e da vischnancas subenziunads). Quests servetschs intermediars impurtants dal puntg da vista strategic èn integrads cunvegnentamain en l'administraziun ed en vischinanza da la regenza. In'excorporaziun da singulas spartas avess per consequenza ch'i giessan a perder sinergias ed enconuschientschas, dentant er la pussaivladad da prender directamain influenza.

8 da fanadur 2009