Navigation

Inhaltsbereich

Incumbensa Loepfe concernent l'aboliziun dal referendum voluntar

Sessiun: 17.06.2009
En la sessiun da zercladur 2009 ha il cussegl grond refusà da suttametter la lescha generala davart la gulivaziun da finanzas al referendum voluntar tenor l'art. 16 cifra 6 da la constituziun chantunala. Uschia n'ha il cussegl grond mai fatg diever da quest instrument dapi che questa disposiziun constituziunala è vegnida introducida.

L'origin da l'art. 16 cifra 6 è collià cun l'introducziun dal referendum legislativ facultativ a chaschun da la revisiun totala da la constituziun dal chantun Grischun ch'è vegnida acceptada dal pievel ils 18 da matg 2003 / 14 da settember 2003. Cun questa disposiziun ha la cumissiun predeliberanta dal cussegl grond vulì dar la pussaivladad al parlament da sez suttametter projects da lescha impurtants al referendum dal pievel. Quella avess stuì esser ina mesira accumpagnanta per introducir il referendum facultativ.

Dapi l'introducziun dal referendum voluntar n'èn – tenor il sentiment da vasts circuls – projects da lescha impurtants sco per exempel il pachet da spargn dal chantun, la lescha da linguas, la lescha per promover l'economia publica e la revisiun da la lescha da taglia betg vegnids suttamess dal cussegl grond al referendum voluntar. Il referendum voluntar sa mussa uschia sco instrument nunadattà, perquai ch'il cussegl grond n'ha fin ussa betg gì la veglia da l'applitgar. Il medem mument han las experientschas ch'ins ha fatg fin ussa (lescha da chatscha, scumond da fimar) mussà che la barriera per far in referendum facultativ tenor l'art. 17 CC è uschè bassa che la cooperaziun directa dal pievel n'è betg vegnida restrenschida. En la debatta dal cussegl grond da la sessiun da zercladur 2009 han singulas votantas e singuls votants dubità avertamain ch'il referendum voluntar vegnia insumma concludì ina giada ed han pervia da quai pretendì avertamain da l'abolir.
Las sutsegnadras ed ils sutsegnaders incumbenseschan perquai la regenza da stritgar l'art. 16 cifra 6 senza cumpensaziun a chaschun da la proxima revisiun parziala da la constituziun chantunala.

Puschlav, ils 17 da zercladur 2009

Loepfe, Kessler, Peyer, Augustin, Barandun, Berni, Bezzola (Samedan), Bleiker, Blumenthal, Brandenburger, Brüesch, Bucher-Brini, Buchli, Bühler-Flury, Bundi, Caduff, Cahannes Renggli, Casparis-Nigg, Castelberg-Fleischhauer, Casty, Casutt (Falera), Caviezel (Pitasch), Cavigelli, Claus, Clavadetscher, Donatsch, Fasani, Feltscher, Florin-Caluori, Gartmann-Albin, Geisseler, Giovanoli, Hartmann (Cuira), Hartmann (Champfèr), Jenny, Keller, Kleis-Kümin, Koch, Kollegger, Krättli-Lori, Kunz, Mani-Heldstab, Marti, Meyer-Grass (Claustar Vitg), Michel, Möhr, Nick, Niederer, Nigg, Noi-Togni, Parpan, Peer, Perl, Pfäffli, Pfister, Plozza, Portner, Quinter, Ragettli, Righetti, Rizzi, Stiffler, Stoffel, Thomann, Thurner-Steier, Troncana-Sauer, Tscholl, Tuor, Valär, Vetsch (Pragg- Jenaz), Wettstein, Zanetti, Candinas (Mustér), Furrer-Cabalzar, Gunzinger, Märchy- Caduff (Domat)

Session: 17.06.2009
Vorstoss: rg Auftrag

Resposta da la regenza

L'uschenumnà referendum obligatoric extraordinari (referendum extraordinari da l'autoritad [per fatschentas ch'il cussegl grond vul sez suttametter a la votaziun]) ch'è reglà en l'art. 16 cifra 6 da la constituziun chantunala (CC) è vegnì integrà dal parlament en la constituziun chantunala pir a chaschun da sia revisiun totala. Oriundamain vuleva la regenza conceder ad ina minoritad qualifitgada d'in tschintgavel da las commembras e dals commembers dal parlament il dretg da far in referendum (cf. carnet da missivas nr. 10/2001-2002, 509 s.). Il parlament ha dentant vulì surdar quest dretg mo a la maioritad. I na dueva betg dar ina maschaida d'instruments parlamentars e da dretgs dal pievel. Ins ha er gì tema che la smanatscha da far in referendum – ch'è adina avant maun latentamain – pudess paralisar la lavur en il cussegl grond. Il referendum extraordinari da l'autoritad tenor l'art. 16 cifra 6 CC avess dentant stuì cumpensar l'aboliziun dal dretg da referendum per ina minoritad dal parlament (cf. PCG 2002/2003, 261 e 264).

Fin oz n'ha il cussegl grond anc mai duvrà il referendum extraordinari da l'autoritad. En cas da differentas fatschentas è l'applicaziun da quest instrument vegnida discutada intensivamain en il cussegl grond. Uschia l'ultima giada en la sessiun da zercladur 2009 en connex cun il project da la NGF. Sin basa da quests fatgs vegni pretendì cun l'incumbensa qua avant maun che l'art. 16 cifra 6 CC vegnia stritgà senza cumpensaziun e ch'il referendum extraordinari da l'autoritad vegnia abolì uschia. La regenza pledescha percunter per differents motivs da mantegnair quest instrument. I na duess betg vegnir renunzià a la flexibilitad che la constituziun dat al parlament cun il referendum extraordinari da l'autoritad da laschar participar il pievel extraordinariamain a tschertas fatschentas. En il futur pudessi senz'auter dar constellaziuns, nua ch'i fiss d'avantatg, sch'il parlament avess quest instrument. Da vulair deducir da la pratica vertenta che quest instrument saja nunduvrabel para a la regenza però dad esser memia baud. Anzi, i stuessan vegnir rimnadas anc ulteriuras experientschas. En connex cun la discussiun davart la dumonda da l'aboliziun da quest instrument na stuessi er betg vegnir emblidà ch'el è vegnì integrà da ses temp en la constituziun – ensemen cun la reducziun dal dumber da suttascripziuns necessari tar il referendum facultativ da 3'000 a 1'500 – sco equivalent per la midada dal referendum obligatoric al referendum facultativ. L'urden en la constituziun ch'è bain equilibrà en il sectur dal referendum obligatoric e facultativ na duess betg vegnir midà puspè senza ch'i saja propi necessari.

Per tut quests motivs propona la regenza da refusar l'incumbensa.

4 da settember 2009