Navigation

Inhaltsbereich

Sessiun: 17.06.2009
Cun dispensar las descendentas directas ed ils descendents directs da la taglia sin il relasch è vegnida stgaffida ina regulaziun transitorica en l'art. 188f, tenor la quala la taglia sin il relasch per iertas anticipadas da descendentas e da descendents ch'èn vegnidas pajadas avant l'onn 2001 sto vegnir incassada. Suenter che quest project è entrà en vigur ha l'administraziun chantunala da taglia cumenzà cun la taxaziun da questas iertas anticipadas veglias; en il fratemp dastgassan circa 30% da questas taxaziuns avair vigur legala.

Ussa ha la dretgira administrativa dal chantun Grischun constatà surprendentamain che la basa legala per far questa taxaziun na saja betg suffizienta e che questas iertas anticipadas na dastgian betg vegnir suttamessas a la taglia. Questa decisiun n'ha dentant anc betg vigur legala, perquai ch'igl è vegnì fatg recurs cunter ella tar il tribunal federal. Sch'ella avess dad entrar en vigur pli baud u pli tard avess quai per consequenza ch'il rest da circa 70% da las iertas anticipadas, che fissan pertutgadas, na pudess betg pli vegnir suttamess a la taglia. Quai fiss in tractament enormamain inegual da cas ch'èn absolutamain identics e ch'èn pervia da quai vegnids taxads correctamain tenor la lescha da taglia. Tenor il senn per giustia da vasts circuls da la populaziun fiss ina tala taxaziun dentant fermamain malgista. Questa inegualitad è anc pli gronda, perquai ch'igl è ina spira casualitad, sch'ina persuna pertutgada è gia vegnida taxada cun vigur legala, sche la decisiun è vegnida retratga a curta vista u sche la taxaziun n'è anc betg vegnida fatga.

Per il cas che la decisiun da la dretgira administrativa dal chantun Grischun entria en vigur vegn la regenza incumbensada da stgaffir ina basa legala che permetta da restituir las taglias ch'èn vegnidas incassads sin questas iertas anticipadas u da stritgar las taglias correspundentas ch'il chantun avess anc dabun.

Puschlav, ils 17 da zercladur 2009

Nick, Barandun, Bezzola (Samedan), Bezzola (Zernez), Bühler-Flury, Casparis-Nigg, Caviezel (Pitasch), Claus, Clavadetscher, Donatsch, Feltscher, Hartmann (Chur), Hartmann (Champfèr), Jenny, Kessler, Krättli-Lori, Kunz, Marti, Meyer-Grass (Claustar Vitg), Michel, Peer, Perl, Pfäffli, Ragettli, Rizzi, Thomann, Toschini, Valär, Vetsch (Pragg- Jenaz), Wettstein, Furrer-Cabalzar, Gunzinger

Session: 17.06.2009
Vorstoss: rg Auftrag

Resposta da la regenza

Iertas anticipadas èn in causal fiscal e vegnan impundidas cun la taglia sin il relasch. Fin la fin da l'onn 2000 n'è la taxaziun betg vegnida fatga il mument, cur che l'ierta anticipada è vegnida pajada, mabain pli tard cun la mort da la testadra u dal testader ensemen cun l'ulteriura facultad dal relasch. Per il 1. da schaner 2001 è la regulaziun legala vegnida midada. Dapi lura vegnan las iertas anticipadas suttamessas a la taglia il mument che la facultad vegn transferida.

Per il 1. da schaner 2008 èn las descendentas ed ils descendents vegnids deliberads da la taglia sin il relasch (art. 107 al. 2 LT). Per las iertas anticipadas ch'èn vegnidas pajadas a descendentas ed a descendents avant l'onn 2001 e che n'èn anc betg vegnidas suttamessas a la taglia ha fixà il legislatur che questas iertas anticipadas a descendentas ed a descendents duain vegnir suttamessas a la taglia cun l'entrada en vigur da la revisiun parziala. Cun l'art. 188s. al. 2 LT ha il legislatur stgaffì per quai ina basa legala en questa revisiun. Questa regulaziun è vegnida declerada en la missiva tar la revisiun parziala da la lescha da taglia e discutada en il cussegl grond; la voluntad legislativa ha prendì cleramain en mir la taxaziun da las iertas anticipadas ch'èn vegnidas pajadas tenor il dretg vegl.

Sa basond sin la disposiziun transitorica numnada ha l'administraziun da taglia cumenzà l'onn 2008 a taxar las iertas anticipadas ch'èn vegnidas pajadas tenor il dretg vegl. Numerusas imposiziuns èn entradas en vigur en il fratemp ed ils debits fiscals respectivs èn per part er gia vegnids pajads. Cun la decisiun dals 12 da matg 2009 ha la dretgira administrativa decidì ch'i manchia ina basa legala per l'imposiziun da las iertas anticipadas ch'èn vegnidas pajadas tenor il dretg vegl (SDA A 09 3). Suenter la decisiun da la dretgira administrativa ha l'administraziun da taglia suspendì las lavurs d'imposiziun, revocà las decisiuns da taxaziun ch'èn gia vegnidas relaschadas, che n'han dentant anc betg survegnì vigur legala e sistì ils incassaments.

La regenza ha contestà la decisiun da la dretgira administrativa cun in recurs tar il tribunal federal, perquai che quella cuntrafa a la clera voluntad dal legislatur. Sch'il recurs n'avess betg d'avair success u sche la dretgira administrativa – suenter in'eventuala refusa – decidess anc ina giada precis uschia, resultass da quai ina situaziun che na pudess betg pli vegnir accordada cun il sentiment per giustia. Las decisiuns da taxaziun che han gia vigur legala na pudessan betg vegnir abolidas senza ina basa legala, perquai ch'ina decisiun giudiziala n'è betg in motiv per ina revisiun e perquai che l'administraziun da taglia è liada vi da la vigur legala d'ina disposiziun. Taglias ch'èn taxadas cun vigur legala e che n'èn anc betg vegnidas pajadas, stuessan schizunt anc vegnir incassadas, perquai ch'ellas valan sco debitadas. Cas che n'èn anc betg vegnids taxads na pudessan betg pli vegnir tractads vinavant; en quests cas na vegniss fatga nagina imposiziun.

La situaziun giuridica menziunada chaschunass en questa situaziun speziala cun questa disposiziun transitorica ch'è vegnida stgaffida da nov in resultat nuncunvegnent e scurlattass la confidenza da las burgaisas e dals burgais pertutgads en il stadi da dretg. Perquai è la regenza pronta d'acceptar l'incumbensa da la fracziun e da preschentar al cussegl grond in project da lescha che permetta a l'administraziun da taglia da revegnir en ina procedura da revisiun a las taxaziuns da taglia sin il relasch legalmain valaivlas che concernan las iertas anticipadas ch'èn vegnidas pajadas tenor il dretg vegl avant l'onn 2001 e d'abolir quellas. Il project correspundent vegn suttamess al cussegl grond mo, sche la decisiun numnada da la dretgira administrativa avess da mantegnair sia valaivladad materiala.

31 d'avust 2009