En la clinica psichiatrica Waldhaus vegn intensivà il tractament da
persunas attempadas che s'orientescha pli ferm vid ils basegns dals
pazients e dals confamigliars. La collavuraziun cun autras instituziuns
duai daventar pli effectiva e pli transparenta.
Ils 30 d'avust 1998 ha lieu ina scuntrada da confamigliars sin duas
partiziuns gerontopsichiatricas, ed ils 3 da settember 1998 organisescha
la clinica ina dieta d'experts cul tema "Psichiatria d'attempads en la
chasa da tgira e la clinica".
Igl è in fatg enconuschent che nus umans daventain per differentas
raschuns adina pli vegls. Quest process n'è betg reversibel; nus al
pudain be acceptar, perquai che nus tuts essan pertutgads.
Umans attempads guardan enavos sin blers decennis d'experientscha da
vita ch'han furmà lur persunalitad. La chapientscha per l'uman attempà
po be reussir, sch'ins resguarda las experientschas istoricas e
persunalas.
I correspunda era ad in sentiment fundamental uman da vulair restar
uschè saun sco pussaivel durant l'entira vita. Savens restrenschan lura
gist las malsognas psichicas la qualitad da vita ed il bainstar en la
terza vegliadetgna a moda considerabla. Per pudair resguardar meglier la
structura da vegliadetgna che sa mida sco er ils problems psichiatrics
spezials ha la clinica psichiatrica Waldhaus creà il process essenzial
"gerontopsichiatria" che s'occupa directamain dal provediment e dal
tractament psichiatric optimal da persunas attempadas.
Disturbis psichics per raschuns da vegliadetgna
Umans attempads pateschan per exempel pli savens da depressiuns che
pon avair d'ina vart motivs biologics, da l'autra vart era raschuns
psicosozialas. Disturbis psichics da quest gener respundan per regla
bain ad in tractament.
Tar ina malsogna degenerativa dal tscharvè, la malsogna d'Alzheimer,
esi almain pussaivel da cuntanscher in retard dal decurs grazia als meds
ch'ins ha oz a disposiziun.
Demenzas u auters disturbis organics dal tscharvè èn malsognas
cronicas u progressivas. La finamira dal tractament è perquai in
levgiament dals mals sco er ina megliera adattaziun ad ina vita cun la
malsogna.
Gist en ils davos onns è sa midà bler tar il tractament da las
malsognas da persunas attempadas. Ultra dal diever da novs medicaments
giogan er la terapia d'ambient, il sustegn dals confamigliars e d'auters
tgirunzs sco er la psichoterapia ina gronda rolla.
Confamigliars ed experts
In pass en questa direcziun è ina scuntrada da confamigliars sin
nossas partiziuns gerontopsichiatricas C11 e C12, cun la finamira
d'intermediar infurmaziuns davart la clinica e sias pussaivladads da
terapia sco er da rinforzar la collavuraziun tranter pazient,
confamigliars e squadra da tgira.
Tar la dieta d'experts "Psichiatria d'attempads en la chasa da tgira
e la clinica" dals 3 da settember 1998 stat en il center il barat
d'experientschas tranter differentas instituziuns ed experts sin il
sectur da la vegliadetgna. En emprima lingia vul ins preschentar las
purschidas actualas en la lavur cun persunas attempadas e l'utilisaziun
optimala da differents servetschs tras ils pertutgads.
Gremium: Klinik Waldhaus
Quelle: rg Klinik Waldhaus