Charas convaschinas, chars convaschins!
Daspö passa 150 ans vain prelet il mandat da la Regenza per la Festa
federala d'ingrazchamaint illas baselgias da nos chantun. Il mandat per
la Festa federala d'ingrazchamaint voul exprimer la colliaziun tanter la
baselgia ed il stadi e rinviar a l'importanza da las valuors
fundamentalas da la religiun cristiana per l'agir dal stadi. Ingon ha la
Regenza l'occasiun da far ün pêr ponderaziuns fundamentalas davart la
relaziun actuala tanter la baselgia ed il stadi, tanter la religiun e la
società.
La società dad hoz perda vi e plü l'orientaziun. Las valuors fixas
da la convivenza sociala chi valaivan fin uossa scroudan, sainza cha
valuors equivalentas subaintran in lur pè. Il möd da pensar e d'agir
solidaric vain s-chatschà vi e plü d'ün individualissem fich marcant,
chi'd es l'expressiun d'ün'exageraziun da la libertà persunala sco valur
fundamentala. Fatschendas decisivas da grand'importanza per la società e
pel stadi vegnan missas a chantun sül terrain püramaing privat. Las
decisiuns da valuors, las fixaziuns da valuors, l'orientaziun da la vita
e las persvaziuns sun exclusivmaing fatschendas privatas e privadas
d'üna discussiun publica. A la lunga nu po la società però exister
sainza ün consens impegnativ davart las valuors. In nos temp ha la
baselgia perquai la gronda ed a listess mumaint però eir fich
pretensiusa mischiun da transmetter las valuors eticas e moralas
fundamentalas a la società ed a seis commembers e d'avair uschè ün effet
positiv sün nossa convivenza. Quai succeda in prüma lingia tras
l'exaimpel vivü. L'ingaschamaint social da la baselgia es üna
provocaziun permanenta, eir publica e politica: nempe da nu laschar a
l'abandun ils debels, ils amalats ed ils dischavantagiats. L'orientaziun
etica e la conscienza da la società e dal singul vegnan sustgnüdas eir
inavant da las posiziuns cleras da la baselgia in dumandas importantas
da la vita. Quistas posiziuns sun ün elemaint indispensabel per fuormar
l'opiniun. Il stadi nu pudarà bainschi brich sieuer adüna e dapertuot la
vusch da la baselgia; ma el es bain cusglià, sch'el dà udientscha a
quista vusch e sch'el tilla tegna adaquint per trar sias decisiuns. Be
scha la baselgia ed il stadi coopereschan in möd constructiv, schi pon
gnir evas ils problems cumplexs, culs quals nossa società vain
confruntada hoz.
La Festa federala d'ingrazchamaint stess esser perquai per nus tuots
ün'occasiun speciala per ponderar davart las consequenzas da tscherts
svilups da la società e per ans trar adimmaint las valuors fundamentalas
da la cretta cristiana chi sun: charità, toleranza, chüra e güstia.
Quistas valuors sun las premissas principalas per üna vaira cumünanza
statala. Ponderain che cha minchün da nus po far concretamaing sün seis
lö, in sia famiglia, in sia professiun, in sias funcziuns publicas ed in
seis uffizis, per cha quistas valuors as manifestan darcheu in nossa
società. Provain d'agir adüna tenor quists princips eir in situaziuns
plü difficilas. Nus vulain appellar da S'ingaschar per quista mera!
Cun quistas ponderaziuns As vulain nus racumandar, charas
convaschinas e chars convaschins, sco eir tuot noss conumans e nus svess
in man dal Segner.
Cuoira, settember 1998 In nom da la Regenza
Il president: Luzi Bärtsch
Il chancelier: dr. Claudio Riesen
Gremi: Regenza
Funtana: rg Chancellaria chantunala dal Grischun